YOSEFE wazol’o zaya kana vo mpangi zandi 10 bakinu bambi. Ubavovese vo: ‘Nu alangi, nsi eto nwizidi langa.’

Bamvovese vo: ‘Yeto awonso tu’ampangi. Tu wantu ansongi. Tu mpangi kumi ye zole. Ona wansuka osidi ye s’eto, omosi wafwa.’

O Yosefe ovunisi nze kakwikidi mu mvovo miau ko. Osidi Simone muna pelezo, vo i mpangi zakaka ubavene madia yo kubavutula kuna nsi au. Ubavovese vo: ‘Vava nuvutuka nutwas’o mbunzi eno, ona wansuka.’

Vava bavutukidi kuna Kenani bazingulwidi Yakobo w’es’au mawonso mababwila. O Yakobo okendalele kikilu. Obokomokene ye dilu oku vo: ‘O Yosefe wafwa, o Simone kena vo ko. Kiyambula nwanata mwan’ame Benyamini ko.’ Kansi, vava madia mau mamanisa, o Yakobo ubayambulwidi banata Benyamini kuna Engipito, mu sumba madia.

O Yosefe omwene mpangi zandi bekwizanga. Oyangalele kikilu mu mona Benyamini wa mbunzi andi. Kansi, ke vakedi mosi ko mu yau wazaya vo mfumu ndioyo i Yosefe. O Yosefe ovangidi diambu mu tonta mpangi zandi 10.

Okanikini selo kia nzo andi vo, zadisa madila ma wantu awaya yo madia. Sia mbungw’ame apalata, muna dila dia Benyamini. Vava bavaika muna Engipito ke balwaka tini kia nda ko, o Yosefe ovovese kwa selo yandi vo, babalanda. Vava bababaka babavovese vo: ‘Ekuma nuyiyidi mbungwa apalata ya mfumu eto?’

Bavutwidi vo, ‘ke tuyiyidi mbungwa andi ko.’ ‘Konso ona owanuka yau, yambula kafwa.’

Aselo basatidi edila dia konso muntu muna yau. Basolwele e mbungwa muna dila dia Benyamini nze una omwene vava. Aselo babavovese vo: ‘Yeno akaka lwenda kweno, vo i Benyamini ovutuka yeto.’ Adieyi bavanga ampangi zandi?

Yau awonso bavutuka yo Benyamini kuna nzo a Yosefe. O Yosefe ubavovese vo: ‘O Benyamini osala se ntaudi ame vo i yeno nuvutuka kuna nsi eno.’

O Yuda ovovele vo: ‘Ovo mvutukidi kuna nzo kondwa kwa nleke, o s’ame ofwa, kadi unzolele kikilu. Owau yambula yakala se ntaudi aku vana fulu kia nleke; vo i nleke, yambula kavutuka kuna nzo.’

O Yosefe omwene vo mpangi zandi basoba e ngindu. Bakituka se wantu ambote. Yambula twatala dina kavanga Yosefe.