NIOKA yayi izingamene muna nti ina nze nioka amoyo, nga ke wau ko? Ke nioka amoyo ko. Nioka yavangilwa mu nsongo. O Yave ovovese Mose kamanika yo vana nti kimana nkangu batalanga yo muna zinga. Kansi, e nioka zakaka zina vana ntoto zamoyo. Mu tatika bena o wantu yo kubayelesa. Ng’ozeye ekuma?

Ekuma kadi, Aneyisaele bayidimini Nzambi yo Mose. Bavovele vo: ‘Mu nkia kuma watuvaikisila muna Engipito twafwila mwamu makanga? Ke muna madia ko yovo maza; ka tulendi dia diaka mana yayi ko.’

Kansi, e mana madia mambote makala. Yave mu mpil’esivi kabavanina yo. Wabavana mpe maza mun’esivi. Kansi, nkangu ke watondanga Nzambi ko muna mana kabavanganga. Ikuma, Yave otwikidi nioka zazi zampondi mu tumba Aneyisaele. Zibatatikidi, ndonga muna yau bafwa.

I bosi, nkangu bezidi kwa Mose yo vova vo: “Tusumukini kweto, kadi tubadidi Yave yo ngeye; dodokela Yave katukatulwila nioka.”

O Mose osambidi nkangu. O Yave ovovese Mose kavanga niok’a nsongo, kamanika yo muna nti. Ozevo konso on’otatikilu, katala yo. O Mose ovangidi una kavova o Nzambi. Ana batatikwa vava batalanga niok’a nsongo basasuka.

Diambu dianene tulongokele mun’elongi diadi. Yeto awonso tuna nze Aneyisaele awaya batatikwa kwa nioka. Yeto awonso lufwa tuvingilanga. Tala ana bazungidi, omona vo wantu beyelanga, benunanga yo fwa. Ediadi dikutubwilanga kadi Adami yo Eva w’eyakala yo nkento antete bakolamena Yave, yeto awonso tu wan’au. Kansi, Yave wateta e nzila kimana twazinga yakwele mvu.

Yave wafila Mwan’andi Yesu Kristu ova ntoto. O Yesu muna nti kafwila, kadi wantu ayingi bambadikila vo muntu ambi. Kansi, Yave wavana Yesu muna kutuvuluza. Ovo tutadidi Yesu yo kunlanda, tuvwa moyo a mvu ya mvu. Tulongoka mayingi mu kuma kiaki kuna ntwala.