WANTU awaya mu mpasi bena. Bafwete tina, vo ke wau ko vondwa bevondwa. Oyau alangi a Isaele. O nkento okubasadisanga i Rakabi. E nzo andi vana ndambu a yaka kia mbanza a Yeriko yakala. Yambula twazaya ekuma wantu awaya benena mu mpasi.

Aneyisaele bafinamene sauka Nkoko a Yodani mu kota muna nsi a Kenani. Kansi, una ke basaukidi ko, o Yosua otumini alangi wole. Ubavovese vo: ‘Nwenda langa nsi ye mbanza a Yeriko.’

Vava alangi bakota muna Yeriko, Balueke muna nzo a Rakabi. Kansi, muntu mosi wasamunwina ntinu a Yeriko vo: ‘Aneyisaele wole bezidi langa nsi omu fuku.’ Vava kawidi wo, otumini wantu kuna nzo a Rakabi bamvovese vo: “Vaikisa wantu ana bakotele omo nzo aku.” Kansi, o Rakabi wasweka alangi. Ovovele vo: ‘O wantu bezidi oku ngina, kizeye ko ko kuna batukidi. Vava kiabukama tombe, bavaikidi, una kielo kia mbanza ke kiazikilu ko. Ovo nubalende nulenda kubabaka.’ I ndanda balanda o wantu.

Vava bavaika o Rakabi otombokele vana nludi. Ovovese alangi vo: ‘Nzeye wo vo o Yave okunuvana e nsi yayi. Kadi tuwidi e ngyumisa kayumisa maza ma Mbu Ambwaki vava nwavaika muna Engipito; ye una nwavondela ntinu a Sikone yo Onge. Wau vo inusongele e ngemba numpan’e dimbu kia ziku vo oyeno mpe nukunsonga e ngemba. Nuvuluza o s’ame yo ngw’ame ye mpangi zame, ye nsanga zame.’

Alangi bansidi o nsilu vo bekumvuluza, kansi o Rakabi kafwete vanga diambu. Bamvovese vo: ‘Kanga nsinga wau wambwaki muna zianela aku. Kutakesa yitu yaku yawonso muna nzo aku. Ozevo, vava tuvutuka mu baka Yeriko ovo tumwene o nsinga wau vana zianela aku ke tuvonda konso muntu ko muna nzo aku.’ Vava alangi baluaka kwa Yosua bamvovese mawonso mana mababwila.