MUNA Nkand’a Nzambi omona nkanda uyikwanga vo Rutu. Lusansu lw’esi nzo mosi bazinganga muna lumbu y’afundisi a Isaele. O Rutu ndumba wa mwisi Moabe; ke mwisi Isaele ko. Kansi, vava kalongoka mu kuma kia Yave wa Nzambi aludi, wayantika kunzola kikilu. O Naomi nkento anunu wasadisa Rutu mu zaya Yave.

Naomi mwisi Isaele. Yandi yo nkaz’andi, yo wan’andi wole amakala bayaluka yo kwenda kuna Moabe vava mwakala mvengele muna Isaele. I bosi o nkaz’andi ofwidi. Vioka kolo, wan’a Naomi basompa ndumba zole za Moabe, Rutu yo Orepa. Kansi, vava vavioka mvu 10, wana wole a Naomi mpe bafwa. Naomi ye ndumba zole zazi bakendalala kikilu. O Naomi aweyi kevang’owau?

Lumbu kimosi obakidi e nzengo za vanga nkangalu anda mu vutuka kuna nsi andi. Rutu yo Orepa bazola zinga yandi entwadi, ikuma banlanda. Vava baluaka fitini, o Naomi ovovese kwa ndumba vo: ‘Nuvutuka kuna nzo a ngudi zeno.’

O Naomi ubafibidi, ubasindikidi. Bayantikidi o dila, kadi banzolanga kikilu. Bavovele vo: ‘Ve, kwenda tukwenda yaku kuna kwa nkangu aku.’ Kansi o Naomi ovutwidi vo: ‘Nuvutuka, e wan’ame, diambote nwasala.’ Orepa ovutukidi kwandi, kansi o Rutu kavutuka ko.

Naomi ovovese Rutu vo: ‘Orepa ovutukidi. Ngeye mpe vutuka kwaku.’ Kansi, Rutu umvutwidi vo: ‘Kundodokela yàsisa ko, ungyambula ngyenda yaku. Kadi konso kun’okwenda i nkwenda; konso kuna ozingila i nzingila. O nkangu aku i nkangu ame; o Nzambi aku i Nzambi ame. Van’ofwila i mfwila; i vau vana nziama.’ Vava Rutu kavovele omama o Naomi kakala diaka y’owu kamvutulwila ko.

Bele kwau yau ewole, yavana balueke kuna Isaele. Kuna bazingilanga. O Rutu wayantik’o kwenda muna kiana, kadi nsungi ya wonzona masa yakala. O Boaze wanyambula kawonzonwena masa muna mpatu andi. Ng’ozeye nani i ngudi a Boaze? Rakabi wa mwisi Yeriko.

Lumbu kimosi Boaze ovovese Rutu vo: ‘Yawa mawonso mu kuma kiaku ye ngemba wasonga kwa Naomi, ye nsisa wasisa s’aku yo ngw’aku ye nsi aku a ngutukila, wayiza kwa nkangu una kwateka zaya ko. Yambula Yave kasenda.’

O Rutu ovutwidi vo: ‘Yambula yamona edienga oko wina, e mfumu ame; kadi wamfiaulwisi, wau vo ovovèle kuna ngemba kwa ntaudi aku.’ Boaze wazolanga kikilu Rutu, ke kolo ko basompana. Ediadi diayangidika kikilu Naomi. Kansi e kiese kia Naomi kiawokela vava Rutu yo Boaze bawuta mwan’au antete, wayikilwanga vo Obede. I bosi Obede wakituka se nkaka a Davidi. Tulongoka mayingi mu kuma kiandi.