E KINDENDE kiaki mote kikilu, nga ke wau ko? Nkumbu andi Samuele. O muntu unsimbidi o ntu i Ele, ngang’ambuta a Isaele. O Elekana w’es’andi yo Kana wa ngw’andi bantwese kwa Ele.

Samuele kimbuta kia mvu nyá yovo tanu kakala. Kansi, okala muna saba kia Yave kumosi yo Ele ye nganga zakaka. Ekuma Elekana yo Kana bavanina mwan’au akete mu sadila Yave muna saba? Yambula twazaya.

Muna mvu miavioka o Kana wakendalalanga kwayingi, kadi sita kakala. Wazol’o wuta kana vo mwana mosi kaka. Ozevo, lumbu kimosi vava Kana kayenda kuna saba kia Yave wasamba vo: ‘E Yave, kumvilakani ko. Avo umpene mwan’eyakala ozevo ikumvana kwa ngeye kasadila e lumbu yawonso ya zingu kiandi.’

O Yave owidi e sambu kia Kana. Muna ngonde zalanda, owutidi Samuele. Kana wazolanga mwan’andi, wayantika kunlonga mambu ma Yave tuka kinsedia kiandi. Ovovese nkanz’andi vo: ‘Vava Samuele ketauka, i bosi ikunata kuna saba kia Yave kansadila kuna.’

I wau mpe tumwene muna fwaniswa kiaki. O Elekana yo Kana batwese Samuele. Wau vo o Samuele watoma longwa kwa mase mandi, wayangalela sadila Yave muna saba kiandi. Konso mvu o Elekana yo Kana bayiza sambilanga muna saba kiaki yo kingula mwan’au. O Kana wanatinanga mvwatu ampa una kantungilanga.

Samuele wakwamanan’o sadila Yave. Wazolwanga kikilu kwa Yave ye kwa nkangu. Kansi wan’a Ele wa ngang’ambuta, Kofene yo Finekase yimpumbulu bakala. Mambu mayingi mambi bavanganga yo vukumuna akaka mu kolamena Yave. O Ele nga wafwana kubakatula mu salu kia kinganga, kansi kavanga wo ko.

Samuele kayambula ko vo e mbi yavangwanga muna saba yamfila mu yambula sadila Yave. Wau vo ke ndonga ayingi ko yazolanga Yave, kolo kiayingi kiavioka kwa Yave muna vovana yo wantu. Tala edi diavangama vava Samuele kanungunuka e ntela:

Samuele waleka kakala vava kawa e ndinga yambokelanga. Ovutwidi vo: “Mono oyu.” Osikamene, wele kwa Ele, oku vo: “Mono oyu; kadi umbokele.”

O Ele umvutwidi vo: ‘Kibokele kwame ko, wenda leka kwaku.’ O Samuele wele leka.

O Yave obokele diaka: “E Samuele.” O Samuele otelamene, wele kwa Ele oku vo: “Mono oyu; kadi umbokele.” Kansi, o Ele umvutwidi vo: ‘Kibokele ko, e mwan’ame, wenda leka kwaku. O Samuele wele leka.

O Yave obokele diaka Samuele e mbok’etatu. O Samuele wele diaka kwa Ele oku vo: ‘Mono oyu, kadi umbokele o nkumbu wau.’ O Ele obakwidi wo vo Yave obokelanga o nleke. Ovovese Samuele vo: ‘Wenda leka, avo ubokele diaka, vova vo, ‘vov’aka, e Yave, e selo kiaku owa.’

I wau kavova o Samuele vava Yave kambokela diaka. O Yave ovovese Samuele vo otumba Ele yo wan’andi. I bosi Kofene yo Finekase bafwa vava bayenda nwana e vita y’Afelesetia. O Ele una kawa mana mabwa obwidi mambemba, e nsingu itolokele, ofwidi. E mvovo mia Yave mialungana.

Owau, o Samuele se mbuta, okitukidi mfundisi ansuka a Isaele. Vava kanuna o nkangu umvovese vo: ‘Utusolela ntinu katuyala.’ Samuele kazola dio vanga ko, kadi Yave i ntinu au. Kansi, Yave umvovese vo kawila o nkangu.