NGA ozeye mote ankento ndioyo wizidi wanana yo Davidi? Nkumbu andi Abingaile. Nkwa zayi kakala. Ovengese Davidi mu nkanu. Kansi, muna lenda wo zaya, yambula twazaya ntete mana mabwila Davidi.

Vava Davidi katina Saulu wayisweka muna nduka. Ampangi zandi ye yitu yandi yawonso vava bawa wo, bakulumukini kuna kena. Tezo kia 400 za wantu, o Davidi okitukidi se ntu au. O Davidi wele kwa ntinu a Moabe umvovese vo: ‘Yambula s’ame yo ngw’ame beza kala yaku yavana nzaya kan’adieyi dikumbwila.’ I bosi, Davidi ye wantu andi bayiswekanga muna miongo.

I nzaya kazaya Abingaile. O nkaz’andi mvwam’a muntu. Wakala ye 3.000 ma mameme, 1000 dia nkombo. O Nabale nkwa fu yambi. Kansi, Abingaile wa nkaz’andi nkwa zayi yo mote. Wazaya mpe vanga oma masonga. Wavuluza nkutu esi nzo andi. Yambula twa wa una kavangila wo.

Davidi ye wantu andi basadisa Nabale. Batanina mameme mandi. Lumbu kimosi Davidi otumini wantu benda lomba madia kwa Nabale. Matoko ma Davidi balweke kwa Nabale ekolo kasakanga mika mia mameme ye ntaudi zandi. Lumbu kia nkinzi kiakala. Nabale madia mayingi kakala mau. Ozevo, ntaudi za Davidi bamvovese vo: ‘Twakusonga e ngemba. Ke twayiyidi ememe kana dimosi ko, tusadisi muna kubalunga-lunga. Utuvana, do, konso ma kiadia.’

‘Kivana madia mame kwa wantu nze yeno ko,’ u kavova Nabale ye matingu mawonso. Oyikidi Davidi e ngik’ambi. Vava ntaudi za Davidi bavutuka, bansamunwini mambu mama mawonso, o Davidi ofungidi makasi. Ubavovese vo: “Nuvwata konso muntu nsosolo;” basimbidi e nzila mu kwenda vonda Nabale ye ntaudi zandi.

Etoko dimosi dia Nabale ona wa wa matingu mandi ovovese Abingaile mana kavanga nkaz’andi. Vana vau, Abingaile okubikidi madia. Osidi mo vana mabuluku, osimbidi e nzila. O Abingaile vava kamona Davidi okulumukini van’ebuluku, ovumbamene yo vova: ‘E mfumu kuyindula kimpumbulu kia Nabale wa nkaz’ame ko. Kadi, zowa kwandi, makizowa kevanganga. Tutwese lukau lualu. Tambula lo do, utuloloka muna mana mabwidi.’

Davidi umvovese vo, ‘u nkwa zayi. Unsimbidi mu vonda Nabale yo kunlandila kunda muna bi wandi. Nda tomboka kuna nzo aku kuna luvuvamu.’ Ke kolo ko Nabale ofwidi, Abingaile okitukidi se mosi muna akento a Davidi.