MVU 10 miavioka tuka Nebukandesa kanatina awonso Aneyisaele akwa ngangu kuna Babele. Owau, tala diambu dibwanga ovava. E Yerusaleme iyokelo. Aneyisaele ana ke bafwidi ko mu natwa bena se akangami kuna Babele.

Sungamena vo angunza za Yave balukisanga nkangu vo, avo ke beviluka muna nzila zau zambi ko, e mbanza fwaswa ifwaswa. Kansi, Aneyisaele ke bawila angunza ko. Bakwamanana sambila nzambi zaluvunu ke mu Yave ko. Ozevo, o nkangu wafwana tumbwa. Tuzeye mambu mama kadi Yezekele wa ngunz’a Nzambi watusonga mbi bavanganga Aneyisaele.

Nga ozeye nani i Yezekele? I mosi muna yintoko-toko kanata o Nebukandesa kuna Babele, mvu 10 vitila lufwasu lwa Yerusaleme. O Daniele ye akundi andi atatu, Saderake, Misake yo Abedengo, muna kolo kiaki mpe i banatwa kuna Babele.

Ekolo Yezekele kakala kuna Babele o Yave unsongele mambu mambi mavangwanga muna tempelo kuna Yerusaleme. O Nzambi Esivi kavanga, kadi Yezekele kuna Babele kakala. Kansi Yave oyambwidi vo kamona bi wavangwanga muna tempelo. Mana kamona mangemi kikilu.

Yave ovovese Yezekele vo: ‘Tala mambu mangemi mana bevanganga nkangu muna tempelo. Tala nioka ye bulu yakaka yabandulwa muna yaka. Tala Aneyisaele besambilanga yo.’ O Yezekele omwene mambu mama yo soneka mo.

Yave oyuvwidi Yezekele vo: ‘Ng’omwene oma bevanganga ambuta za nzo a Isaele kuna sweki?’ Elo, wabamona. Lusambwadi lwa wantu, mu sambila bena nzambi zaluvunu. Bavovele vo, ‘o Yave kekutumonanga ko; o Yave oyambwidi e nsi.’

I bosi, o Yave osongele Yezekele akento akaka kun’evitu dia tempelo dina kuna node. Kuna kufongele akento awaya besambilanga Tamuze wa nzambi aluvunu. Tala wantu bena vana mwelo a tempelo, tezo kia 25. Yezekele ubamwene, batadidinge kuna este, yo sambila e ntangwa.

‘Nkangu wau ke ukunzitisanga ko,’ u kavova o Yave. ‘Ke bevanganga kaka oma mambi ko, kansi bevangilanga mo muna tempelo ame.’ Muna kuma kiaki, ‘bemona makasi mame. Kifwa nkenda ko vava befwaswa.’

Mvu ntatu kaka miavioka tuka Yave kasongela mambu mama kwa Yezekele, Aneyisaele batelamene Nebukandesa wa ntinu. Wele kubanwanisa. Vioka mvu mosi ye ndambu, esi Babele bakota muna Yerusaleme yo yoka e mbanza. Akaka bavondwa ye ndonga mu yau banatwa se akangami kuna Babele.

Ekuma Yave kayambulwila mpasi zazi zabwila Aneyisaele? Ekuma kadi, ke bawila Yave ko, ngatu lemvokela nsiku miandi. Ediadi disonganga vo tufwete vanganga mana kelombanga o Nzambi.

Kuna lubantiku, Nebukandesa wa ntinu wayambula vo akaka muna nkangu basala muna nsi a Isaele. Osidi Ngedaleya wa Nyuda se nkengi au. Kansi, akaka muna Aneyisaele bavondele Ngedaleya. Nkangu umwene wonga vo esi Babele balenda vutuka yo kubavonda mu kuma ki’evangu diadi. Ozevo, bakomene Yeremiya katina yau kuna Engipito.

I nsala yasal’e nkatu e nsi ya Isaele. Mvu 70 ke mwakala muntu ko muna nsi. Kansi, Yave wasia nsilu vo vava kilunga mvu 70 ovutula nkangu andi muna nsi au. Adieyi diabwila nkangu a Nzambi kuna Babele banatwa? Bika twatala.