VAVA bavaika mun’esuku diantandu, Yesu ye alongoki andi bele kuna mpatu ya Ngetesemane. Owau ke nkumbu antete ko bezidi mu mpatu yayi. Yesu ovovese alongoki andi vo bayingila yo samba. Ovaukidi fiakete mu samba.

I bosi, Yesu ovutukidi kuna kwakala alongoki. Adieyi bevanganga? Balele kwau. Yesu ubasusumwini nkumbu ntatu vo bafwete yingila, kansi konso ntangwa kavutukanga wabawananga kunsi a tulu. Muna nkumbu ansuka o Yesu wabayuvula: ‘Nga yayi i ntangw’a leka? E ntangwa nyekolwa kw’atantu ame ifwene.’

Wau kevovanga kaka, bawidi mazu ma ndong’ayingi. Bezidi ye nsosolo, bota ye mini. Vava balwaka vana bakala mosi ofinamene wele kuna kakala Yesu. Umfibidi nze una omwene muna fwaniswa kiaki. Yandi i Yuda mwisi Kereote. Ekuma kafibila Yesu?

Yesu umvovese vo: ‘E Yuda nga muna mfibu okungyekwela?’ Elo, o fiba kwakala se sinsu. O Yuda i wau kasongela Yesu kwa wantu bayiza kunkanga. Atantu a Yesu bambakidi. Kansi, o Petelo kayambula ko vo banata Yesu lembi nwana. Olambwidi o koko, ovolele nsosolo andi, osakidi kutu kwa muntu vana ndambu andi. Kansi, Yesu oviakene kutu kwandi, unsaswidi.

Ovovese Petelo vo: ‘Vutula nsosolo vana fulu kiandi, nga obenze vo kilendi dodokel’o S’ame ko kampaikisila mazunda ma mbasi muna kumpuluza?’ Elo, olenda wo vanga. Kansi, Yesu kalomba lusadisu lwa mbasi ko kwa Nzambi kadi wazaya wo vo e ntangwa ya bakwa kw’atantu andi yafwana. Ikuma, wayambula vo bambaka. Owau tutala dina dibwila Yesu.