TALA e nzaza idimukanga. Mabaya mu bwa mena. Nga omwene wantu bavaikidi muna maza? Akaka balweke van’ekumu dia mbu. Tala Paulu, yambula twazaya dina dimbwididi.

Sungamena vo o Paulu mvu miole kakala mu pelezo kuna Kaisaria. I bosi, yandi ye akangami akaka banatwa mu nzaza mu kwenda kuna Roma. Baviokele muna sanga kia Kerete, balwakilu kwa tembwa kiangolo. E tembwa kiasaka e ngolo, ansau ke balenda fila diaka nzaza ko. Wau balembi mona e ntangwa, ngatu ntetembwa mu lumbu yayingi, e vuvu kiawonso kia vuluka kidimbukidi.

I bosi, Paulu otelamene vana bakala yo vova vo: ‘Ke vena muntu ko ovidisa moyo vovo nwina, nzaza kaka ivila. Kadi o fuku wau vatelamene ova ngina o mbasi a Nzambi oku vo, kumoni wonga ko, e Paulu otelama kaka vana ndose a Kaisa wa nyadi a Roma. O Nzambi ovuluza awonso bekwendanga yaku.’

O fuku wekumi ye ya, muna tezo ki’edingidingi vava tembwa kianingama, ansau bamwene vo maza makulukidi. Bamwene wonga vo e nzaza ilenda wandama muna matadi. Bakulumwini mbwa, i sia vo má kisimbininanga e nzaza mu lembi kukula. O kuma una kwakia bamwene kumu dia mbu. Bavavidi sensesela nzaza kun’e kumu dia mbu.

Vava bafinama luaka van’ekumu dia mbu, o ntu a nzaza uvakamene mun’esenge. O mavuku ma mbu mayantikidi wula e nzaza. O mfumu a makesa ovovele vo: “Awana bazeye o siensia, batakuka, bavita kun’eseke. Akaka, vana mabaya, akaka vana ma yakaka ya nzaza.” I wau mpe bavanga. I mpuluka bavuluka yau awonso, wantu 276 nze una kakanikina o mbasi.

E sanga kina bakala kiayikilwanga vo Melìta. Esi Melìta wantu ambote kikilu. Balunga-lunga awana badimuka muna maza. Vava tembwa kiadingama, Paulu wanatwa muna nzaza yakaka kuna Roma.