O MUNTU ovondwanga vava i Setefano. Nlongoki akwikizi a Yesu. Kansi, tala dina dikumbwilanga. Mu tubwa kena matadi. Ekuma bamengenanga Setefano yamu tezo kia kumvanga e mbi yayi? Yambula twawa.

Nzambi wasadisa Setefano mu vanga masivi manene. Wantu awaya ke bayangalela wo ko. Bafidìsi Setefano e mpaka wau vo ludi kalonganga kwa wantu. Kansi, Nzambi wavana Setefano ngangu zayingi. Wavovesa wantu awaya vo luvunu balonganga. Ediadi diawokesa makasi mau. Muna kuma kiaki, bambakidi, babokele nkangu bansila umbangi waluvunu.

O ngang’ambuta oyuvwidi Setefano vo: ‘O mambu mama, nga maludi?’ O Setefano umvutwidi muna yika oma ma Nkand’a Nzambi. I bosi, umvovese mpila wantu ambi bamengena angunza za Yave, ye vova mpe vo: ‘Oyeno luna nze wantu awaya. Nwavonda Yesu wa selo kia Nzambi, yo lembi lemvokela nsiku mia Nzambi.’

Ambuta za nganga vava bawidi mambu mama basakidi funga makasi. Bankwetesele o meno. Kansi, o Setefano otadidi kun’ezulu yo vova vo: ‘Tala, mbwene Yesu otelamene kuna koko kwalunene kwa Nzambi kun’ezulu.’ Bakakidi matu mau. Babakidi Setefano bamvaikisi kuna mbazi a mbanza.

Bakatwidi e mvwatu miandi bavene mio kw’etoko dimosi, nkumbu andi Saulu. Nga omwene Saulu? Bantubidi o matadi. Setefano ofukamene yo samba kwa Nzambi nze una omwene ovava: “E Mfumu, kubayekek’esumu diadi ko.” Wazaya wo vo akaka mu yau bavukumunwa kwa ambuta za nganga. Vava kamana vova omama Setefano ofwidi.

Kele vo muntu uvangidi o bi nga ovutulanga mbi muna mbi yovo oyambulanga vo Nzambi kabavutulwila e mbi? Setefano yo Yesu ke bavutula mbi muna mbi ko kw’awana babavanga e mpasi. Yambula twatanginina mbandu au.