Se yindula o wonga wa akento wau bamwen’e ziami kia nkatu! Maria Mandala wele ntinu kwa “Simone Petelo ye kwa nlongoki ankaka, ona Yesu kazolanga,” Yoane wa ntumwa. (Yoane 20:2) Kansi akento ankaka bena vana ziami bamwene mbasi. Muna kati kwa ziami muna diaka ye mbasi yankaka, “ovuete mvuel’ampembe.”—Maku 16:5.

Mbasi i mosi ubavovese vo: “Ke numoni wonga ko, kadi nzeye wo vo Yesu ona wavondelo vana nti nuvavanga. Kena mo ko, kadi ofulukidi kwandi nze una kavova. Nwiza tala e fulu kalekeswa. Nwenda nswalu yo zayisa kw’alongoki andi vo ofulukidi muna mafwa, kadi vita kekunuvita kuna Ngalili.” (Matai 28:5-7) Akento “bazakamene yo sivika,” bele ntinu muna samuna kwa alongoki.—Maku 16:8.

Maria owananene yo Petelo yo Yoane. Ovovele ye lemena kiawonso, oku vo: “Bakatwidi o Mfumu muna ziami, ke tuzeye ko kuna bansidi.” (Yoane 20:2) Petelo yo Yoane bele ntinu kuna ziami. Yoane osundidi Petelo e ntinu, yandi wantete olweke kuna ziami. Okengelele, omwene mo nlele mia lino, kansi kakotele mo ko.

Vava Petelo kalweke, vana vau okotele muna ziami. Omwene mo nlele mia lino yo nlele una wazingwa muna ntu a Yesu. I bosi Yoane okotele, okwikidi muna nsangu za Maria. Kana una vo Yesu wabavovesa vo fuluka ke fuluka, ke mosi ko muna yau obakwidi vo Yesu ofulukidi. (Matai 16:21) Batokanene, bele vutuki kuna nzo. Kansi, Maria osidi kwandi kuna ziami.

Vo i akento ankaka bele zayisa alongoki vo Yesu ofulukidi. Wau bena muna nzila, Yesu ubavaikidi, ubavovese vo: “Kiambote kieno!” Bamfinamene yo simbinina malu mandi, ‘bankundidi.’ I bosi, Yesu ubavovese vo: “Ke numoni wonga ko! Nwenda zayisa mpangi zame kimana benda kuna Ngalili, i kuna bekumbwena.”—Matai 28:9, 10.

Vava o ntoto wazakamene, e mbasi zizidi vana ziami, o makesa bayingilanga e ziami, “bazakamene yo kituka nze wantu afwa.” Vava bavungulukidi o zayi, bakotele muna mbanza “bazayisi kwa nganga zambuta mawonso mabwidi.” I bosi, nganga zambuta bele mokena ye akuluntu a Ayuda. Bawizanene vo bavana nzimbu kwa makesa kimana basweka e mbumba yo vova vo: “Alongoki andi bezidi kunyiya muna fuku, wau tulele.”—Matai 28:4, 11, 13.

Avo makesa ma Roma balele tulu vana fulu kia salu, balenda vondwa, dianu vo, nganga zambuta babasididi o nsilu vo: “Ke nutokani ko, avo e diadi [luvunu lwau vo ku tulu bakele] diwakanene kwa nguvulu, tunkusasila dio.” (Matai 28:14) Makesa batambwidi e nzimbu, bavangidi dina bavoveso kwa nganga zambuta. E nsangu za luvunu zimwangane kwa Ayuda awonso vo, e vimbu dia Yesu diyiyilu.

Maria Mandala wakinu kwandi kuna ziami, mu dila kena. Wau katelamene katala muna ziami, omwene mbasi zole zivuete mvuel’ambembe! O mosi ovuende vana valekeswa o ntu a vimbu dia Yesu, wankaka ovuende kuna kwakala malu. Bayuvuidi Maria vo: “E nkento, ekuma odidilanga?” Maria ubavutwidi vo: “Bakatwidi Mfumu ame, kizeye ko ko kuna bansidi.” Vava kavovele wo, Maria ovilukidi, omwene muntu ankaka. O muntu ndioyo ovutukidi e kiuvu kia mbasi yo vova vo: “Nani ovavanga?” Wau kabenze vo mvati a mpatu kwandi, Maria umvutwidi vo: “E Mfumu, avo ngeye umbongele, unsamunwina kuna unsidi, ngienda kunkatula.”—Yoane 20:13-15.

Kinga Maria mu mokena kena yo Yesu ofulukidi, kansi kanzayididi ko. Kansi vava Yesu kambokele vo, “Maria!” obakwidi vo i Yesu ndioyo, kadi otomene zaya e mpila o Yesu kekumbokelelanga. Maria okazidi ye kiese kiawonso, oku vo: “Raboni!” (i sia vo, “Nlongi!”). Wau kabakamene kwa wonga yo yindula vo Yesu se ketomboka kuna zulu, unsimbinini. “Yesu umvovese vo: “Kundaminina ko, kadi kiatombokele ko kwa Se. Kansi wenda kwa mpangi zame, ubavovesa vo, ‘Kwa Se diame itomboka, i Se dieno mpe, Nzambi ame ye Nzambi eno mpe.’”—Yoane 20:16, 17.

Maria wele ntinu kuna kwakutakena antumwa ye alongoki. Ubovovese vo: “Mbwen’e Mfumu!” i diau mpe akento ankaka basamunwini alongoki. (Yoane 20:18) Kansi kuna kwa yau e nsangu zazi za ‘uzowa kwandi.’—Luka 24:11.