Vava kavovele diambu dia luloloko muna nzo a Simone wa mfarisi, ke kolo ko Yesu oyantikidi nkangalu wankaka, wele longi muna Ngalili. Yesu olungisi mvu miole tuka kayantikila e salu kiandi kia longa, kansi kena yandi mosi ko. Una ye ntumwa 12 kumosi ye akento ana “bawukwa yimbevo yo vaikiswa mianda miambi.” (Luka 8:2) Akaka muna yau i Maria Mandala, Susana ye Yoana wa nkaz’a selo kia Ntinu Erodi Antipa.

Ekolo wantu ayingi belongokanga oma ma Yesu, e mpaka mu kuma kia salu kiandi ziwokele mpe. Ediadi ditomene moneka vava kawukidi o nkwa nkuya una vo mpofo ye baba. Wau kavevokele muna wisa kia nkuya, muntu ndioyo oyantikidi vova yo mona. Wantu basivikidi yo vova vo: “Ondioyu, ke Mwan’a Davidi ko e?”—Matai 12:23.

O nkangu uzietele e nzo ina kena. Yesu ye alongoki andi ke balendele nkutu dia ko mu kuma kia ndonga yayingi. Kansi ke yau awonso ko bakwikidi vo Yesu i “Mwan’a Davidi,” ona wasilwa nsilu. Ankaka muna Asoneki ye Afarisi batukidi kuna Yerusaleme, bezidi kwa Yesu, kansi ka bezidi ye kani dialongoka ko ngatu yikama Yesu. Bevovesanga e ndonga vo: “Belezebube kena yandi,” dianu vo “mfumu a nkuya” kesadilanga. (Maku 3:22) Vava bawidi mavuanga mama, yitu ya Yesu bezidi kimana bambaka. Ekuma?

Yamu kolo kiaki, aleke a Yesu ke bekwikilanga ko vo yandi i Mwan’a Nzambi. (Yoane 7:5) Kuna kwa yau, Yesu otukisanga mavuanga, ke yandi ko i Yesu ona basansuka yandi kuna Nazarete. Wau bayindwidi vo ntu andi ke una diaka wambote ko, bavovele vo: “Ozengomokene.”—Maku 3:21.

Nga dialudi e? Ke vaviokele kolo kiayingi ko tuka Yesu kawukidi o nkwa nkuya, owau omonanga yo vova. Ke vena muntu ko olenda dio vunisa. Muna kuma kiaki, asoneki ye Afarisi muna fila wantu balembi kwikila muna Yesu, bansokele mambu. Bavovele vo: “Ondioyu ke mu nkatu ko kevaikisilang’e nkuya, mu Belezebube kaka, wa mfumu a nkuya.”—Matai 12:24.

Wau kazeye mana asoneki ye Afarisi beyindulanga, Yesu ovovele vo: “Konso kintinu kiavambana, bwa kibwa, konso mbanza yovo nzo yavambana ke isikila ko. Diau dimosi, avo Satana ovaikisi Satana, ukivambanese; ozevo, e kintinu kiandi aweyi kisikidila?”—Matai 12:25, 26.

Ediadi ke dilendi fidiswa mpaka ko! Afarisi bazeye wo vo akaka muna Ayuda nkuya bevaikisanga. (Mavangu 19:13) Muna kuma kiaki, Yesu oyuvuidi vo: “Avo omono muna Belezebube ivaikisilanga nkuya, o wan’eno muna nani bevaikisilanga mio?” Ediadi disongele vo, e diambu betumbilanga Yesu i diau mpe oyau bevanganga. I bosi, Yesu okwamanene songa ngindu zandi, oku vo: “Kansi, avo muna mwand’a Nzambi ivaikisilang’e nkuya, e Kintinu kia Nzambi kinuluakidi kikilu.”—Matai 12:27, 28.

Muna toma songa vo yandi osundidi Satana muna nkuma, Yesu ovovele vo: “Aweyi muntu kalenda kotela muna nzo a nkwa ngolo yo kutumuna mavua mandi, nanga vo kateka kanga o nkwa ngolo? I bosi kelenda sanza e nzo andi. Konso ona olembi kala ku sambu diame, i ntantu ame, konso ona olembi kutika yame, mwanganisa kemwanganisanga.” (Matai 12:29, 30) Dialudi, asoneki ye Afarisi Yesu besianga kitantu, ediadi disongele vo ku sambu dia Satana bena. Oyau wantu bekakidilanga balembi finama Mwan’a Nzambi ona wina ye lusadisu lwa Yave.

Yesu otumbidi selo yayi ya Satana, oku vo: “Masumu mawonso ye lutiangu lwa wan’a wantu lolokwa lulolokwa. Kansi, konso ona otianguna mwand’avelela, ke lolokwa ko yakwele mvu, kadi onete sumu dia mvu ya mvu.” (Maku 3:28, 29) Yindula e vonza kibwila wantu bevananga nkembo kwa Satana wau bemonanga mana mevangamenanga muna nkum’a mwand’a Nzambi!