Vava Ayuda akaka batumbidi Yesu wau kawukidi o mbevo mu lumbu kia Vundu, Yesu ovutwidi vo: “O Se diame osalanga yamu wau, omono mpe yakinu sala.”—Yoane 5:17.

Mana kavangidi o Yesu ke makulwidi nsiku a Nzambi ko wa lumbu kia Vundu. E salu kiandi kia longa yo wuka ambevo, i mpila ketangininanga mavangu mambote ma Nzambi. Muna kuma kiaki, Yesu okwamanene vanga o wete lumbu yawonso. Kansi e mvutu kavene kwa atantu andi, ziwokese makasi mau. Dianu vo, bavavidi nkutu kumvonda. Ekuma?

Vana ntandu a vilwa wayindula vo Yesu nsiku a lumbu kia Vundu kakulwidi wau kawukidi o mbevo, bafungidi diaka makasi wau kavovele vo yandi i Mwan’a Nzambi. Muna ngindu zau, Yesu Nzambi katiangwini wau kavovele vo, Yave i Se diandi. Kuna kwa yau dina nze Yesu uyifwananese yo Nzambi. Kansi, Yesu kondwa kwa wonga ubavovese vo, ngwizani ambote kena yau yo Nzambi. Ovovele vo: “O Se ozolele o Mwana, okunsonga mpe konso dina kevanga.”—Yoane 5:20.

O se i Mvani a moyo. Kuna nz’ankulu, wasonga ludi kiaki vava kavan’o wantu o nkuma wafula mafwa. Yesu ovovele diaka vo: “Konso una o Se kefudila mafwa yo kubavan’o moyo, i una mpe o Mwana kevanina moyo kwa konso ona kazolele.” (Yoane 5:21) Ekwe mvovo mia lukasakeso mivananga e vuvu kia kusentu! Kana nkutu owau, Mwana ofulanga mafwa mu mpila yankaka. Yesu wavova vo: “Konso ona owanga diambu diame yo kwikila mpe Ndiona wantuma, una yo moyo a mvu ya mvu, ke fundiswa ko, okatukidi muna fwa wizidi muna moyo.”—Yoane 5:24.

Yamu wau ke vena lusansu ko lusonganga vo Yesu ofudidi mafwa, kansi ovovese atantu andi vo osinga wo vanga. Ovovele vo: “Kadi e ntangwa ikwiza, ina ikala vo awonso bena muna ziami bewa nding’andi yo vaika.”—Yoane 5:28, 29.

Kana una vo Yesu kiyekwa kiampwena kena kiau, otomene dio kiesesa vo Nzambi unsundidi o nene. Ovovele vo: ‘Omono kilendi kuyivangila diambu ko. . . . kadi kivavanga luzolo lwame ko, lwa ndiona wantuma kaka.’ (Yoane 5:30) Muna mvovo miami, Yesu osongele kiyekwa kiandi muna kani dia Nzambi. Wau i nkumbu antete kayikidi dio va meso ma ndonga. Kansi, atantu a Yesu bena ye kimbangi kiankaka, ke mvovo miandi kaka ko. Yesu ubasungamese vo: “Oyeno nwatuma wantu kwa Yoane [wa Mvubi], oyandi osidi e ludi umbangi.”—Yoane 5:33.

Nanga mvu miole miviokele kala tuka atantu a Yesu bawila diambu diadi. Yoane wavovesa mfumu za nsambila ya Kiyuda vo Ndiona okwiz’andandila oyikilwa vo, “Ngunza” ye “Kristu.” (Yoane 1:20-25) Muna sungamesa o zitu bakala wau muna Yoane wina muna pelezo, Yesu ovovese atantu andi vo: “Oyeno mu fikolo kaka nwazola yangalela muna ntemo andi.” (Yoane 5:35) Muna mpila yayi, kimbangi kia Yesu kisundidi eki kia Yoane wa Mvubi.

I bosi, Yesu okwamanene ovova, oku vo: “E salu nsalanga [kumosi ye salu kia wuka mbevo], isiang’o umbangi vo Se wantuma. O Se mpe ona wantuma, yandi kibeni unsididi umbangi.” (Yoane 5:36, 37) Muna bong’e nona, vava Yesu kavubwa, Nzambi wansila o umbangi.—Matai 3:17.

Kieleka, atantu ke bena diaka ye kuma kia kumbembola ko. E Sono befimpanga isianga umbangi mu kuma kia Yesu. Muna fokola e moko, Yesu ubavovese vo: “Kala vo nwakwikila muna Mose, nwadi kwikila mpe omu mono, kadi wasoneka mu kuma kiame. Avo e sono yandi nkutu ke nukwikidi yo ko, aweyi nukwikidila mana mpovele?”—Yoane 5:46, 47.