Ve kikilu!

 Ziku kia diambu: Nkumbu miayingi e ngindu za songa e nzola kwa yakala yovo nkento wa nkw’aku, za kolo kiandwele kwandi, vioka ziviokanga.

 I una kamona Lisette [nkumbu: lizet] [una ye mvu] 16, ona wayangalelanga nkw’andi a ndumba. Wavova vo: ““Muna kalasi kiame kia biologia, yalongoka vo muna ntel’a kindumba e hormonio za aleke soba zisobanga.” Ngina ye vuvu vo avo aleke ayingi balongokele diambu mu kuma kia nitu zau, balenda zaya vo evangu dia song’e nzola kwa nkw’aku a yakala yovo nkento ke dianzenza ko, ezak’e ntangwa olenda lwakilwa kwa ngindu zazi.”

 Kansi, adieyi tuvovanga avo e nzola omonanga kwa yakala yovo nkento wa nkwaku ikwamanene? Nga diambi kuna kwa Nzambi mu sungamesa muntu osongang’e nzola kwa yakala wa nkw’andi vo kavenga evangu dia ta zumba yo yakala wa nkw’andi?

 Avo mvutu zaku elo, zaya dio vo e ngindu zaku ngwizani zina ye ngindu za sia vo o muntu kafwete lungisa e zolela yandi. Nkand’a Nzambi usonganga vo wantu bena wisa kia sola, ozevo balenda kwau venga eketo diambi dia zumba.—Kolosai 3:5.

 Nsiku wa Nkand’a Nzambi wakia. Uwondelelanga awana bevavanga leka ye akala akw’au mu vanga dina dilombwanga kwa akala ye akento awonso, ‘tina e zumba.’ (1 Korinto 6:18) Ndonga ya akala y’akento bezolanga lemvokela nkanikinu mia Nkand’a Nzambi, besianga e ngolo mu songa e volo kana nkia mpasi nkutu dilenda kala. Diau adimosi mpe bafwete vanga awana belakulwanga moyo mu leka ye akala akw’au.—Nsiku 30:19.