Vova mana una yindula. Mokena yo mase maku, ubazayisa vo dina bavangidi mpasi dina kutwasila. Nanga dilenda kubasadisa batoma kusasila e diambu kimana wakulula e ntokani zaku.

 Avo mase maku ke bazolele ko yovo ke balendele kusadisa ko, olenda mokena yo muntu ankaka wazikuka.—Ngana 17:17.

 O Se diaku kuna zulu otamba matu mu wá, kadi yandi “Owanga e sambu.” (Nkunga 65:2) Ziula o ntim’aku kwa yandi “kadi mfunu kekunuvuanga.”—1 Petelo 5:7.

 Kulundi makasi mu ntima ko. Vava Daniele kakala ye mvu nsambwadi, mase mandi bavonda longo. Daniele wavova vo: “Mase mame nsatu zau kaka basianga e sungididi, ke batuyindulanga nkutu ko, ke bazaya mpe ko vo e nzengo babaka mpasi zatutwasilanga mu ntima.”

 Nkia mpasi zilenda lwakila Daniele avo kayambwidi lunda makasi muna ntim’andi ko?—Muna zaya e mvutu, Tanga Ngana 29:22.

 Kuvangi mambu mekutwasila mpasi ko. Denny wavova vo: “Vava mase mame bavonda longo, kia kala ye kiese ko, e ngindu zame zatokana kwayingi. Kialendanga vuvika ngindu zame ko kuna sikolo. Muna mvu wauna kiabaka ko muna kizame kia nsuk’a mvu. Kuna kwalanda ... yayantika sevesa wan’a sikola yo kubanuanisa.”

 Adieyi obenze, nkia diambu o Denny kavavidinge muna sevesa wan’a sikola yo kubanuanisa?

 Aweyi o nkanikinu una muna Ngalatia 6:7 ulenda sadisila wantu bena nze Denny, bayambula vanga mambu malenda kubatwasila e mpasi?

 Ntangwa yayingi ifwete vioka muna fokola e mpasi za ntima. Kansi avo e zingu kiaku kivutukidi una kiakala, se wavutukila o luvuvamu lwa ntima.