Muna Bibila, sono kia Levitiku 19:28 kaka kiyikanga e fu kia zenga e nsamba. E sono kiaki kivovanga vo: “Ke nuyizengi nsamba ko.” Nzambi wavana nsiku wau kwa Aneyisaele, ediadi diabaswaswanesanga ye nkangu miankaka mina miazengesanga e nsamba muna nitu zau mu soneka e nkumbu yovo sinsu ya nzambi zau. (Nsiku 14:2) O nsiku wau kwa Aneyisaele wavewa, ke wavewa kwa Akristu ko. Kansi diambote mu fimpa o nkanikinu ubongelo nsiku wau.

Nga Akristu balenda zengesa e nsamba?

 E sono ya Bibila ilende, ilenda kusadisa mu toma fimpa e diambu diadi:

•   “Akento bafwete kuyiviengesela . . . kuna zitu.” (1 Timoteo. 2:9) Akento ye akala bafwete lemvokelanga nkanikinu wau. Tufwete zitisanga ngindu z’akaka yo venga kubatesesa masakuba mu kuma kia mvuatu mieto.

•   “Akaka bezengesanga e nsamba muna nitu zau mu songa e mpila wantu bena yovo kuyisana. Akaka bezengesanga e nsamba mu songa vo bena yo nswa wavanga konso diambu bazolele muna nitu zau. Kansi e Bibila kikasakesanga Akristu vo: ‘Nutambika e nitu zeno se kimenga kia moyo, kiavauka, kiatondakana kwa Nzambi, se salu kieno kiavauka muna nyindu asikila.’ (Roma 12:1) Sadila o ‘nyindu aku asikila’ mu fimpa e kuma ozolele zengesela e nsamba. Avo wantu ozolele tanginina yovo songa vo mu buka kingandi wina, sungamena dio vo e nsamba ke zivunzukanga ko ye o muntu olenda kuyibanza. O fimpa e kuma ozolele zengesela e nsamba, dilenda kusadisa mu baka nzengo zambote.—Ngana 4:7.

•   “E makani ma nkwa fululu nluta metwasanga, kansi akwa ntim’a duku-duku sukama besukama.” (Ngana 21:5) Nkumbu miayingi, o wantu bebakanga e nzengo za zengesa e nsamba mu nzaki zawonso. Ke bezayanga wo ko vo ediadi dilenda kubatwasila mfwilu muna zingu, musungula muna mambu matadidi ngwizani au ye akaka ye salu. Kuna diak’e sambu, ovunzunuisa e nsamba nzimbu zayingi difwanga ye ndunzi zayingi ditwasanga. Lufimpu ye ulolo wa tupitalu tuziulwanga mu vunzuna e nsamba, tusonganga vo wantu ayingi bazengesa e nsamba, bekuyibanzanga.