Ingeta. E ngindu zina ova yanda i nkanikinu mia Nkand’a Nzambi milenda kusadisa mu mambu ma nzimbu ye mfuka:

1.   Teka yindula vitila wasumba lekwa. ‘O makani ma nkwa fululu ulolo matwasa; kansi o nkwa nzaki-nzaki, kondwa kekondwa.’ (Ngana 21:5) Kukadi ye sutila dia sumba lekwa ko wau omwene vo e ntalu yakuluka. Toma yindula vitila wasumba, zaya una osadila e nzimbu zaku, vanga nkubika.

2.   Kukadi ye nzaki za dia mfuka ko. “O mvuam’oyala nsukami, O nsompi, ntaudi a nsompeki.” (Ngana 22:7) Avo mfuka wadia ye kulendanga yo futa ko, teza mokena yo muntu wadevesa, umvovesa vo kulenda yo futa mu lumbu kina nwawizana ko. Avo kazolele ko, undodokela. Landa o nkanikinu owu wa Nkand’a Nzambi: “Wenda wabukama, wadodokela nkw’aku. Kumwesa meso maku tulu ko, ngatu nimbisa ve yaku.” (Ngana 6:1-5) Avo mu nkumbu antete kazolele kuwila ko, kwamanana kunlomba kakudikila e lumbu.

3.   Kusie nzimbu va fulu kiantete ko muna zingu kiaku. “O nkwa loko osutila vuama, kazeye wo ko vo usukami ukunluakila.” (Ngana 28:22) E loko difilanga muntu mu dia mfuka zayingi, dilenda fila mpe muntu mu vilakana mambu ma Nzambi.

4.   Yangalela ina una yau. “Wau tuna ye madia ye mvuatu, tuyangalelanga yo.” (1 Timoteo 6:8) Nzimbu ke zitwasanga kiese ko. Wantu ayingi ova nza bena ye zingu kia kiese, kansi ke bena kwau ye nzimbu ko yovo mavua. Bena ye kiese kadi bezolanga yitu yau, akundi au ye bena ye ngwizani ambote yo Nzambi.—Ngana 15:17; 1 Petelo 5:6, 7.