АКЫЛМАНДЫК — баа жеткис кенч. Акыл болбосо, ката-кемчиликтен арылмак эмеспиз. Бирок акылды каяктан алса болот? Ыйык Китептеги Накыл сөздөр китебин жазган Сулайман пайгамбар Жаратканыбыздын теңдешсиз акылмандыгы жөнүндө сөз кылган. Анын акыл-насааты дээрлик бүт адамзат окуй ала турган, Ыйык Китеп деп белгилүү болгон өзгөчө бир китепте жазылган. Кудайдын акыл-насаатын угууга баарынын мүмкүнчүлүгү бар деп эмне үчүн айта алабыз?

• Ыйык Китеп — «тарыхта эң кеңири тараган китеп». «Ал башка китептерге караганда көп тилге жана көп жолу которулган» («Уорлд бук энциклопедиясы»). Ал толугу менен жана жарым-жартылай 2600дөй тилге которулгандыктан, аны жер бетиндеги адамдардын 90 пайыздан ашууну окуй алат.

• Учурда акылмандыкты сөздүн түз маанисинде «үнүн бийик чыгарып жатат» десек болот. Анткени Матай 24:14тө: «Падышалык жөнүндөгү бул жакшы кабар дүйнө жүзү боюнча бардык элдерге күбөлөндүрүү катары таратылат. Ошондон кийин [азыркы] дүйнө түзүлүшүнүн акыры келет»,— деп жазылган.

Ал «жакшы кабарды» чыныгы акылмандык деп айтууга болот. Анткени ал кабар аркылуу Кудайдын адамзаттын көйгөйлөрүн эң туура жол менен — өзүнүн Падышалыгынын аркасында — чече турганы жарыяланууда. Ал Падышалык — Кудай орноткон жана бүт дүйнө жүзүнө бийлик кыла турган жалгыз өкмөт (Даниел 2:44; 7:13, 14). Ошол себептен Иса Машаяк Кудайдан: «Падышалыгың келсин. Асмандагыдай эле, жерде да сенин эркиң аткарылсын»,— деп тиленген (Матай 6:9, 10).

Жахабанын Күбөлөрү Кудайдын ошол Падышалыгы тууралуу 239 өлкөдө жана аймакта жар салууда. Алар муну чоң сыймык катары көрүшөт. Ооба, акылмандык, тагыраак айтканда, Кудайдын акыл-насаат сөздөрү бүгүнкү күндө, чын эле, шаарлардын кире бериштеринде «чакырып жатат». Силер анын үнүнө кулак саласыңарбы?