Жахабанын Күбөлөрү Ыйык Китептин «Кудайдын рухунун жетеги менен жазылганына» жана пайдалуу экенине ишенишет (2 Тиметей 3:16). Ошондуктан Жараткан жөнүндө көбүрөөк билиш үчүн жана маңыздуу жашоо өткөрүш үчүн Ыйык Китепти окушат.

Ыйык Китепте: «Сенин ысмың Жахаба экенин, жер үстүндөгү Эң Жогорку Кудай жалгыз сен экениңди баары билсин»,— делет (Забур 83:18). Андыктан биз Жахаба Кудайга гана сыйынабыз жана анын күбөлөрү катары ысмын жар салабыз (Ышая 43:10—12).

Ошондой эле биз Исанын «Кудайдын Уулу» * экенине жана ал жерге келип, Машаяк болгонуна ишенебиз (Жакан 1:34, 41; 4:25, 26). Иса өлгөндөн кийин асманга кайткан (1 Корунттуктар 15:3, 4). Бир канча убакыттан кийин болсо Кудайдын Падышалыгынын Падышасы болуп дайындалган (Аян 11:15). Ал Падышалык — жерди Бейишке айландыра турган өкмөт (Даниел 2:44). Ал өкмөт башкарганда, «мүнөзү жумшактар жерди мураска алышат да, мол тынчтыкка ырахаттанышат» (Забур 37:11, 29).

Биз Ыйык Китептеги принциптердин бүгүнкү күндө да пайдасы чоң деп эсептейбиз (Ышая 48:17, 18). Ошондуктан ошол принциптерге тыгыз карманабыз. Алсак, Ыйык Китепте акылды жана денени булгаган нерселерден алыс болушубуз керектиги эскертилгендиктен, тамеки тартпайбыз, баңгизат колдонбойбуз (2 Корунттуктар 7:1). Ошондой эле аракечтик, жыныстык адеп-ахлаксыздык, уурулук сыяктуу Кудайга жакпаган жаман иштерге барбайбыз (1 Корунттуктар 6:9—11).