Буга чейин кеп кылынгандардын көбү — жаш кезинен «Улуу Жаратканын» эсинен чыгарбай кызмат кылган бир туугандар (Нас. 12:1). Грузиядагы 3 117 пионердин үчтөн бир бөлүгүн 25 же ага чейинки курактагылар түзөт. Жаштарга чындык жолунан чыкпоого эмне жардам берет?

Мунун бир нече себеби бар. Биринчиден, Грузияда үй-бүлө түйүнү бекем. 5 баласын чындык жолунда тарбиялаган Константине мындай дейт: «Мени чындык жолуна тарткан нерсе Жахабанын мээримдүү Ата экенин билгеним болгон. Өзүм ата болгондо балдарыма жакын болом деп максат койгом».

Үч баласы бар Малхази менен аялы үй-бүлө түйүнүн бекем кылууга бүт күчүн жумшап келишет. Ал мындай дейт: «Балдарыбыздан маал-маалы менен биздин, бири-биринин эмнесин баалаарын  сурап турабыз. Буга байланыштуу ойлорун үй-бүлөлүк изилдөөдө эркин айтууга үндөйбүз. Мунун аркасында алар башкалардын жакшы жактарын көрүүгө, аларды баалоого үйрөнүштү».

Күжүрмөн ата-энелерге жардам берүү максатында аксакалдар жыйналыштагы балдарды кичинекей кезинен эле рухий иштерге аралаштыра башташат. 11 жашында чөмүлгөн Нестори: «Аксакалдар мага кенедейимен эле ар кандай оңой тапшырмаларды беришчү. Ошонун аркасында өзүмдү жыйналышка керек сезчүмүн»,— дейт.

Аксакалдардын үлгүсү, колдоосу да зор мааниге ээ. Несторинин байкеси Коба мындай деп эскерет: «Бөбөктөрүмө караганда өспүрүм курагымда көбүрөөк бейбаш болдум. Мага жакшы үлгү көрсөткөн бир жаш аксакал мени жакшы түшүнчү, такыр  айыптачу эмес. Жахабага кайтып келишиме аябай жардам берди».

Бүгүн Нестори, Коба жана карындашы Мари алыскы аймакта чогуу кызмат кылышат. Коба: «Эми жашоом маңыздуу өтүп жатат!» — дейт.

Филиал теократиялык долбоорлорго жаштарды көп чакырып, ата-энелерди колдоп турат. Филиалдын комитетинин мүчөсү мындай дейт: «Биз жаштарды аябай баалайбыз. Аларга рухий максаттарына жеткенге жардам берүүгө аракет кылып турабыз».

Жетилген бир туугандар менен чогуу иштөө, пикирлешүү жаштарга сонун таасир этүүдө. Тбилисидеги жыйындар залын курууда эл аралык кызматчылар менен эмгектенген Мамука: «Ушундай курулуш долбоорунда иштеп жатып башкалардан жакшы нерселерди үйрөндүм. Өнөрүмдү өрчүткөндөн сырткары, рухий жактан да өстүм»,— дейт.

Ооба, үй-бүлө түйүнүнүн бекем болгону, аксакалдардын колдоосу, бир туугандардын үлгүсү Грузиядагы жаштарга жакшы таасир этип жатат. Элчи Жакандын: «Мен үчүн балдарымдын чындык жолунда жүргөнүн уккандан өткөн кубаныч жок»,— деген сөздөрү ата-энелердин сезимин таамай сүрөттөп турат (3 Жкн. 4).

2013-жылы Жетектөөчү Кеңеш бардык филиалдарды өздөрүнө караштуу аймакта дагы кайсы тилдерге адабияттарды которсо болорун аныктоого чакырган. Себеби кабарды дагы көптөр угушу керек.

 Натыйжада Грузиядагы филиал адабияттарды сван жана мегрел тилдерине которууну чечкен. Бул тилдер грузин тилине окшош келгендиктен, айрымдар аларды грузин тилинин диалектиси деп да эсептешет.

Сванетиде кызмат кылган ынталуу пионерлер мындай деп жазышкан: «Сван эли кабарга аябай кызыгат, Ыйык Китепти жогору баалайт. Башында адабияттарды албай жүргөндөр эне тилиндегисин көргөндө сүйүнүп ала башташты».

Жолугушуулар эне тилинде өткөрүлө баштаганда, мегрел тилинде сүйлөгөндөрдүн жүрөгү козголгон. Гига деген жаш пионер: «Эми жыйналыштан өз сөзүм менен жооп бере алам. Мурдагыдай болуп ойлорумду ичимен которбой калдым»,— дейт.

 Ткаядагы мегрел тилинде өткөрүлгөн жыйналышта аксакал болуп кызмат кылган Зури сезимдерин мындай деп билдирет: «Жашоомдо жүрөгүмдү козгогон кубанычтуу да, кайгылуу да окуялар көп эле болгон, ошентсе да бир да жолу көзүмө жаш алган эмесмин. Бирок жыйналыштан Падышалык ырларын мегрел тилинде биринчи жолу ырдаганда, чоң-кичине дебей, баарыбыз ыйладык».

2013-жылы 6-апрелде Грузиянын рухий тарыхында орчундуу окуя болду. Оңдолуп-түзөлүп, кеңейтилген филиалдын, жыйындар залынын жана ыйык китептик мектептин жаңы имаратынын арноо аземине Жетектөөчү Кеңештин мүчөсү Дэйвид Сплэйн  келди. Жергиликтүү бир туугандар 24 өлкөдөн келген 338 конокко эшиктерин да, жүрөктөрүн да кенен ачты.

Эртеси Дэйвид бир туугандын атайын баяндамасы бүтүндөй өлкөгө трансляцияланып, аны 15 200 киши укту. Мындай чоң рухий той Грузияда болуп көргөн эмес. Кубанычка бөлөнгөн бир туугандардын бири-бирин бекемдегени, чынында эле, жүрөк козгоорлук болду. Бир жаш бир тууганыбыз: «Бейиште жашоо кандай болорун эми түшүндүм»,— деген.

Мурун Жубайлар үчүн ыйык китептик мектеп деп аталган Падышалыктын жарчылары үчүн мектеп Жахабанын Грузиядагы эли үчүн чоң бата болду. Мектептен 2013-жылдан бери 200дөн ашуун бир тууган билим алды. Аябай ыраазы болгон бүтүрүүчүлөр жиберилген жерлерде ынталуулук менен кызмат кылып жатышат.

Падышалыктын алгачкы эр жүрөк жарчыларынын эмгегинин акыбети кайтып, кабар бүтүндөй Грузияга тарады. Алардын Кудайга жана жакындарына болгон сүйүүсү, бекем ишеними, кажыбас кайраты, демилгени колго алганы мол баталардын төгүлүшүнө жол ачты.

Грузиядагы 18 000ден ашуун бир тууган ошол алгачкы жарчылардын ишин улап, көптөргө Кудайдын Сөзүнүн күчүн сезип көрүүгө жардам берип келет (Флп. 3:13; 4:13).