Жакан 14:1—31
14 Иса: «Жүрөк заада болбогула.+ Кудайга ишенгиле,+ мага да ишенгиле.
2 Атамдын үйүндө орун көп. Болбосо минтип айтпайт болчумун. Мен силерге орун даярдаганы баратам.+
3 Барып, орун даярдагандан кийин кайра келем да, жанымда болушуңар үчүн, силерди алып кетем.+
4 Мен бараткан жакка алып барчу жолду силер билесиңер»,— деди.
5 Томас+ ага: «Мырзам, биз сенин каякка баратканыңды билбейбиз. Анан кантип ал жолду билмек элек?» — деди.
6 Иса: «Мен жолмун,+ чындыкмын+ жана өмүрмүн.+ Атама мен аркылуу гана барганга болот. Менсиз эч ким бара албайт.+
7 Эгерде мени билсеңер, анда Атамды да билесиңер. Ушул убактан тартып силер аны билесиңер. Чынында, аны буга чейин эле көргөнсүңөр»,+— деп жооп берди.
8 Ошондо Филип: «Мырзам, Атаңды көрсөтчү, бизге ошол эле жетиштүү»,— деди.
9 Иса ага мындай деди: «Филип, мен ушунча убактан бери силер менен жүрөм, ошондо да мени биле элексиңби? Мени көргөн адам Атамды да көрдү.+ „Атаңды көрсөтчү“,— дегениң кандай?
10 Же мен Атам менен, Атам болсо мени менен биримдикте экенине ишенбейсиңби?+ Мен силерге айтып жаткан нерселерди өз оюман айткан жокмун.+ Мени менен биримдикте болгон Атам өзүнүн эркин мен аркылуу аткарып жатат.
11 Мен Атам менен, Атам мени менен биримдикте экенине ишенгиле. Айтканыма ишенбесеңер да, буга жасаган иштеримди көрүп ишенгиле.+
12 Силерге чындыкты айтып коёюн, ким мага ишенсе, мен жасаган иштерди ал да жасай алат. Атүгүл андан да чоң иштерди жасайт,+ анткени мен Атама баратам.+
13 Атамдан мен аркылуу* эмне сурабагыла, баарын аткарам. Ошондо Атам Уулу аркылуу даңкталат.+
14 Атамдан мен аркылуу эмне сурабагыла, аны аткарам.
15 Эгерде мени сүйсөңөр, осуяттарымды аткарасыңар.+
16 Мен Атамдан суранам, ошондо ал силерге башка жардамчыны* берет. Ал силер менен түбөлүккө болот.+
17 Ал жардамчыны — чындыкты ачып берген ыйык рухту+ — бул дүйнө ала албайт, анткени аны көрбөйт да, билбейт да.+ Силер болсо билесиңер, себеби ал силер менен жана силердин ичиңерде.
18 Мен силерди жетимсиретпейм, сөзсүз кайра келем.+
19 Бир аздан кийин дүйнө мени көрбөй калат, ал эми силер көрөсүңөр,+ анткени мен мындан ары да жашай бергендиктен, силер да жашайсыңар.
20 Ошол күнү Атам менен биримдикте экенимди, силер да мени менен, мен да силер менен биримдикте экенимди билесиңер.+
21 Ким менин осуяттарымды кабыл алып, аткарса, ал мени сүйөт. Ал эми мени сүйгөндү Атам да сүйөт. Аны мен да сүйөм, ага өзүмдү таанытам».
22 Ошондо Жүйүт+ (Искариот эмес) Исадан: «Мырзам, эмнеге өзүңдү дүйнөгө эмес, бизге таанытканы жатасың?» — деп сурады.
23 Иса мындай деп жооп берди: «Ким мени сүйсө, айткандарымды аткарат.+ Ошондуктан Атам аны сүйөт, Атам экөөбүз келип, аны менен чогуу болобуз.+
24 Ал эми ким мени сүйбөсө, айткандарымды аткарбайт. Силер угуп жаткан сөз меники эмес, мени жиберген Атамдыкы.+
25 Буларды азыр араңарда жүргөнүмдө айтып жатам.
26 Кийин Атам мен сурангандыктан* жибере турган жардамчы, ыйык рух, силерге баарын үйрөтүп, айткандарымдын бардыгын эсиңерге салат.+
27 Силер азыр мени менен чогуу тынчтыкка бөлөнүп жатасыңар. Ушундай тынчтыкты силерге мындан ары да бере берем.+ Мен силерге берип жаткан тынчтык дүйнө берген тынчтыктан башкача. Ошондуктан жүрөгүңөр түпөйүл болуп, коркунучтан кысылбасын.
28 Силерге: „Мен кетип баратам, кайра келем“,— деп айтканымды уктуңар. Эгерде мени чындап сүйсөңөр, Атама баратканыма сүйүнөсүңөр, анткени Атам менден улук.+
29 Булар аткарылганда айткандарыма ишенишиңер үчүн, мен силерге алдын ала айттым.+
30 Эми силер менен көпкө сүйлөшө албайм, анткени бул дүйнөнүн башкаруучусу+ келатат. Ал мага бийлик кыла албайт.+
31 Бирок дүйнө Атамды жакшы көрөрүмдү билиши үчүн, Атам мага эмнени осуят кылса, ошону аткарам.+ Тургула, бул жерден кетели.
Шилтемелер
^ Же: «менин атымдан». Бул 14-аятка да тиешелүү.
^ Же: «сооротуп-жубатуучуну». Бул жерде Кудайдын ыйык руху жөнүндө сөз жүрүп жатат.
^ Же: «менин атыман».
