Жеремия 20:1—18
20 Жахабанын ибадатканасында башкы көзөмөлчү да болгон дин кызматчы Имер уулу Пашкур Жеремия пайгамбардын алдын ала айткан ушул сөздөрүн угуп турган эле.
2 Анан ал Жеремия пайгамбарды уруп*, Жахабанын ибадатканасындагы Жогорку Бенжемин дарбазасынын алдында турган жыгач кишенге* отургузуп койду.+
3 Эртеси күнү Пашкур Жеремияны кишенден бошотту. Ошондо Жеремия ага мындай деди:
«Жахаба сенин атыңды Пашкур* дебей, Бүт айланада коркунуч деп өзгөрттү.+
4 Жахаба мындай дейт: „Башыңа түшө турган нерседен улам өзүңдүн да, бардык досторуңдун да үрөйү уча тургандай кылам. Алар көз алдыңда душмандарынын кылычынан сулайт.+ Жүйүттүн бүт элин Бабыл падышасынын колуна салып берем. Ал айрымдарын Бабылга* туткундап кетет, башкаларын кылычтап өлтүрөт.+
5 Бул шаардын бүт байлыгын, дүнүйө-мүлкүн, баалуу нерселерин, Жүйүт падышаларынын бүт казыналарын душмандарына берем.+ Алар баарын талап-тоноп, Бабылга алып кетишет.+
6 Сен болсо, Пашкур, үйүңдөгүлөр менен бирге туткунга кетесиң. Бабылга барып, ошол жерде өлөсүң, бүт досторуң менен кошо ошол жакка коюласың, себеби аларга алдын ала айткандарыңдын баары жалган болчу“».+
7 Мен башкача ойлонсом да, оо, Жахаба, сен оюмду өзгөртүп, мени ынандырып койдуң*.
Менден күчтүү экениңди көрсөтүп, мени жеңдиң.+
Мен эртеден кечке күлкү болдум,Баарына шылдың болдум.+
8 Себеби сенин сөзүңдү айткан сайын кыйкырып:
«Зордук-зомбулук кылгандар, кыйратуучулар!*» — деп жар салышым керек.
Жахабанын сөзү үчүн эртеден кечке маскара болуп, шылдыңдалам.+
9 Ошон үчүн: «Мындан ары аны сөз кылбайм, анын атынан сүйлөбөйм»,— дедим.+
Бирок анын сөзү жүрөгүмдө алоолонуп күйгөн,Сөөктөрүмдө камалган оттой болду,Аны ичимде кармап жатып чарчадым,Ката албай калдым.+
10 Мен көп жаман кеп-сөздөрдү уктум;Туш-туштан коркунучка кабылдым.+
Алар: «Аны айыпка жыккыла; келгиле, аны айыпка жыгабыз!» — деп жатышат.
Мага жакшылык каалайбыз дегендердин баары кулашымды күтүп:+
«Жаза басып алса экен,Ошондо аны жеңебиз, өчүбүздү алабыз»,— деп жатышат.
11 Бирок Жахаба жанымдагы сүрдүү жоокердей болду.+
Ошон үчүн мени куугунтуктагандар кулашат, жеңе алышпайт.+
Алар катуу уят болушат, себеби ийгиликке жетишпейт.
Биротоло басынтылышат, анысы эч качан унутулбайт.+
12 Бирок сен, оо, асман аскерлеринин Кудайы Жахаба, адил адамды изилдейсиң;Адамдын тереңде жаткан ойлорун*, жүрөгүн көрүп турасың.+
Оо, Кудай, алардан өч алганыңды көрсөм экен,+Анткени ишимди сенин колуңа тапшырдым.+
13 Жахабаны даңктап ырдагыла! Жахабаны даңазалагыла!
Себеби ал жакырды жамандык кылгандардын колунан куткарды.
14 Мен төрөлгөн күнгө наалат!
Энем мени төрөгөн күн курусун!+
15 «Уулдуу болдуң!» — деп сүйүнчүлөп,Атамды аябай кубанткан адам каргышка калсын.
16 Ал киши Жахаба эч өкүнбөй кыйраткан шаарлардай болуп калсын.
Эртең менен кыйкырык, чак түштө согуш ураанын уксун.
17 Эмнеге ал* мени энемдин курсагында жатканда эле өлтүрүп салган жок?
Энемдин жатыны мүрзөм болуп,Энем түбөлүккө кош бойлуу болуп жүрө бермек!+
18 Курсагынан эмнеге чыктым экен?
Азап-кайгы көрүш үчүнбү?
Маскара болуп өлүш үчүнбү?+
Шилтемелер
^ Ал Жеремияны башка бирөөгө да сабатышы мүмкүн болчу.
^ Бул кишинин буту-колун, мойнун кошо кишендей турган шайманды билдирет.
^ Сыягы, «айланада калган» дегенди билдирет.
^ Вавилонго.
^ Же: «Сен мени алдадың, оо, Жахаба, мен болсо алдандым».
^ Же: «Зордук-зомбулук, кыйроо!»
^ Же: «тереңде жаткан сезимдерин». Сөзмө-сөз: «бөйрөктөрүн».
^ Же балким: «Кудай».
