Лука 20:1—47
20 Күндөрдүн биринде Иса ибадатканада элди окутуп, жакшы кабарды жарыялап жатканда, жогорку дин кызматчылар, диний мыйзамдарды окуткандар менен аксакалдар жанына барып:
2 «Айтчы бизге, буларды кылганга кандай укугуң бар? Мындай укукту сага ким берди?» — деп сурашты.+
3 Иса аларга: «Мен да силерге бир суроо берейин. Кана айткылачы,
4 Жаканга элди чөмүлдүргөнгө укукту асмандагы Кудай бергенби же адамдарбы?» — деди.
5 Ошондо алар: «Эгерде: „Кудай“,— десек, ал: „Анда эмне үчүн ага ишенген жоксуңар?“ — дейт.
6 „Адамдар“,— десек, элдин баары бизди таш бараңга алат, анткени эл Жакандын пайгамбар болгонуна ишенет»,+— деп өз ара сүйлөшүштү.
7 Анан Жаканга андай укукту ким бергенин билишпей турганын айтышты.
8 Ошондо Иса: «Анда мен да буларды кылганга мага ким укук бергенин айтпайм»,— деди.
9 Андан кийин Иса элге мындай мисал келтирди: «Бир киши жүзүм отургузат да,+ жүзүмзарын багбандарга ижарага берип, өзү бир топ убакытка башка өлкөгө кетет.+
10 Түшүм жыйнай турган убак келгенде, жүзүмзарынын түшүмүнөн тиешелүү үлүшүмдү беришсин деп, багбандарга кулун жөнөтөт. Бирок алар аны сабап, куру кол кетирип жиберишет.+
11 Жүзүмзардын ээси дагы бир кулун жөнөтөт. Алар аны да сабап, кордоп*, куру кол кетирип жиберишет.
12 Ал үчүнчүсүн жөнөтөт. Багбандар аны да жарадар кылып, жүзүмзардын сыртына чыгарып салышат.
13 Ошондо жүзүмзардын ээси: „Эмне кылсам? Сүйүктүү уулумду жиберип көрөйүн.+ Балким, аны сыйлашар“,— дейт.
14 Бирок багбандар аны көргөндө: „Бул мурасчы да! Жүргүлө, өлтүрүп салалы, ошондо мурасы биздики болуп калат“,— деп өз ара сүйлөшүшөт.
15 Ошентип, аны жүзүмзардын сыртына чыгарып, өлтүрүп салышат.+ Эми жүзүмзардын ээси багбандарды эмне кылат?
16 Ал барып, аларды өлтүрүп, жүзүмзарын башкаларга ижарага берет».
Муну уккандар: «Кудай анын бетин ары кылсын!» — дешти.
17 Ошондо Иса аларга тике карап: «Анда Ыйык Жазмадагы: „Куруучулар жаратпай койгон таш бурчка коюла турган негизги таш болуп калды“,— деген сөздөр эмнени билдирет?+
18 Ким ал ташка жыгылса, соо калбайт.+ Ал эми таш кимдин үстүнө куласа, ал жанчылып калат»,— деп айтты.
19 Диний мыйзамдарды окуткандар менен жогорку дин кызматчылар Исанын бул мисалды өздөрүнө карата айтканын түшүнүп, аны ошол замат кармаганга аракет кылышты, бирок элден коркушту.+
20 Алар Исаны колго түшүрүш үчүн артынан аябай аңдышты. Анан ага бир нече кишини жиберишти. Ал кишилерди өздөрүн адил кылып көрсөтүп, Исаны сөзүнөн кармаш үчүн жашыруун жалдашкан эле.+ Аны кармаган соң өкмөттөгүлөр менен башкаруучунун колуна салып беришмек.
21 Ал кишилер Исадан: «Устат, сенин туура сүйлөп, туура окутарыңды, баарына бирдей карай турганыңды, Кудайдын жолу жөнүндө үйрөткөндөрүңдүн баары туура экенин билебиз.
22 Айтчы, падышага* киши башына төлөнчү салыкты төлөгөн туурабы же туура эмеспи?» — деп сурашты.
23 Иса алардын кууланып жатканын билип:
24 «Мага тыйынды* көрсөткүлөчү. Бул жерде кимдин сүрөтү тартылып, кимдин аты жазылып турат?» — деди. Алар: «Падышанын»,— дешти.
25 Ошондо Иса: «Андай болсо, падышага тиешелүүнү падышага,+ Кудайга тиешелүүнү Кудайга бергиле»,— деди.+
26 Ошентип, алар Исаны эл алдында сөзүнөн кармай алышкан жок. Кайра, анын жообуна таң калып, унчукпай калышты.
27 Андан кийин өлгөндөрдүн тирилерине ишенбеген садукейлердин+ кээ бирлери келип, Исадан:+
28 «Устат, Муса: „Эгер кимдир бирөө бала көрбөй өтүп кетсе, аялын бир тууганы алып, анын тукумун уласын“,— деп жазган болчу.+
29 Жети бир тууган бар эле. Биринчиси аял алып, баласыз өтүп кетти.
30 Анын аялына экинчиси,
31 анан үчүнчүсү үйлөндү. Ошентип, ага жетөө тең үйлөнүштү, бирок баары бала көрбөй өтүп кетишти.
32 Акырында аял да көз жумду.
33 Өлгөндөр тирилгенде, ал кимисинин аялы болот? Анткени аны жетөө тең алышкан болчу да»,— деп сурашты.
34 Иса аларга: «Бул дүйнөнүн* адамдары аял алышат, күйөөгө тийишет.
35 Ал эми тирилгенге жана келечектеги дүйнөдө жашаганга татыктуу боло тургандар аял алышпайт, күйөөгө чыгышпайт.+
36 Алар периштелердей болушат, ошон үчүн экинчи өлүшпөйт. Ошондой эле тирилгенден кийин Кудайдын балдары болушат.
37 Ал эми өлгөндөрдүн тирилери Мусанын айткандарынан да көрүнүп турат. Тикенектүү бадал жөнүндө баяндап жатып ал Жахабаны „Ыбрайымдын Кудайы, Ыскактын Кудайы, Жакыптын Кудайы“ деп атаган.+
38 Ал — өлгөндөрдүн эмес, тирүүлөрдүн Кудайы. Себеби ал үчүн* бардыгы тирүү»,— деди.+
39 Ошондо диний мыйзамдарды окуткандардын айрымдары: «Устат, айтканыңда калет жок»,— дешти.
40 Ошондон кийин алар суроо бергенге батына алышкан жок.
41 Анан Иса аларга: «Эмне үчүн Машаякты Дөөтүнүн тукуму деп айтышат?+
42 Дөөтү өзү Забур* китебинде: „Жахаба менин Мырзама:
43 “Душмандарыңды бут алдыңа жыгып бергенимче, оң жагымда отур”,— деди“,— дебеди беле.+
44 Эгер Дөөтү Машаякты „Мырзам“ деп жатса, анда ал кантип Дөөтүнүн тукуму болсун?» — деди.
45 Бүт эл Исанын сөздөрүн угуп турганда, ал шакирттерине:
46 «Диний мыйзамдарды окуткандардан сак болгула. Алар узун кийим кийип жүргөндү, базар аянттарында башкалардын урмат көрсөтүп саламдашканын, сыйынуу жайларында алдыңкы* орундарда отурганды, тойлордо төрдөн орун алганды жакшы көрүшөт.+
47 Жесирлердин мал-мүлкүн талап-тоношот, элге көрүнүш үчүн Кудайдан узакка тиленишет. Ошон үчүн аларга алда канча катуу өкүм чыгарылат»,— деди.
Шилтемелер
^ Же: «кемсинтип».
^ Же: «императорго»; грекче кесар (Цезарь).
^ Сөзмө-сөз: «динарды». Римдиктердин күмүш тыйыны. Б14 тиркемесин кара.
^ Же: «анын көз карашы боюнча».
^ Же: «эң жакшы».
