Матай 20:1—34
20 Себеби асман Падышалыгы таң заарда жүзүмзарына+ жумушчуларды жалдаганы чыккан кишиге окшош.
2 Күнүнө бир динардан* төлөгөнгө макулдашкандан кийин ал жумушчуларды жүзүмзарына жиберет.
3 Эртең мененки саат тогуздарда* кайра чыгып, базар аянтында жумушсуз тургандарды көрөт да,
4 аларга: „Силер да жүзүмзарыма баргыла. Акыңарды төлөп берем“,— дейт.
5 Ошентип, алар иштегени кетишет. Жүзүмзардын ээси он экилерде*, анан үчтөрдө* кайра чыгып, дагы башкаларын жалдайт.
6 Акырында кечки бештерде* чыгып, дагы бирөөлөрдү көрөт да: „Эмнеге бул жерде бир күн кечке жумушсуз турасыңар?“ — деп сурайт.
7 Алар: „Бизди эч ким жалдаган жок“,— дешет. Ошондо ал: „Силер да жүзүмзарыма баргыла“,— деп айтат.
8 Кеч киргенде, жүзүмзардын ээси чарба башкаруучусуна: „Жумушчуларды чакырып, акыркысынан баштап биринчисине чейин акысын төлөп бер“,+— дейт.
9 Кечки бештерден баштап иштегендер келип, ар бири бир динардан алат.
10 Ошондо биринчи жалдангандар алардан көбүрөөк алабыз деп ойлошот. Бирок аларга да бир динардан төлөнөт.
11 Акысын алышкандан кийин алар жүзүмзардын ээсине нааразы болуп:
12 „Акыркы келгендер бир эле саат иштеди го. Сиз болсо керээли кечке ысыкта кыйналып иштеген бизди ошолорго теңеп койдуңуз!“ — дешет.
13 Ошондо жүзүмзардын ээси алардын бирине: „Дос, мен сага адилетсиздик кылган жокмун. Экөөбүз бир динарга макулдашпадык беле, чынбы?+
14 Ошон үчүн акыңды ал да кете бер. Сага канча берсем, акыркы болуп келген буга да ошончо берсем, эмне экен?
15 Же өзүмдүн акчамды өзүм каалагандай жумшаганга акым жокпу? Же менин жакшылык кылганымды көрө албай жатасыңбы?“+ — дейт».
16 Анан Иса: «Ошентип, акыркылар биринчи, ал эми биринчилер акыркы болот»,— деп айтты.+
17 Иерусалимге баратканда Иса 12 шакиртин бөлүп алып, аларга:+
18 «Мына, биз Иерусалимге баратабыз. Ал жерден адам Уулун жогорку дин кызматчылар менен диний мыйзамдарды окуткандардын колуна салып беришет. Алар ага өлүм өкүмүн чыгарып,+
19 башка элден болгон адамдарга өткөрүп беришет. Алар болсо аны шылдыңдашат, сабашат, анан устунга кадап өлтүрүшөт.+ Бирок ал үчүнчү күнү тирилет»,+— деди.
20 Анан Зебедейдин+ аялы уулдары менен Исанын жанына келди да, таазим кылып, бир нерсе суранмакчы болду.+
21 Иса андан: «Эмне өтүнүчүңүз бар?» — деп сурады. Ал: «Падышалыгыңда бул эки уулумдун бирин оң жагыңа, экинчисин сол жагыңа отургузчу»,+— деди.
22 Иса анын уулдарынан: «Эмне сурап жатканыңарды өзүңөр билбейсиңер. Мен ичкени жаткан чөйчөктөн* иче аласыңарбы?»+ — деп сурады. Алар: «Ооба»,— дешти.
23 Ошондо Иса: «Мен иче турган чөйчөктөн ичесиңер,+ бирок оң жагым менен сол жагыма кимдердин отурарын мен чечпейм. Ал орундарды Атам кимдерге даярдаса, ошолор отурат»,— деп айтты.+
24 Муну укканда берки 10 шакирт ал экөөнө ачууланышты.+
25 Ошондо Иса шакирттерин чакырып алып: «Башкаруучулардын элге үстөмдүк кыларын, аттуу-баштуулардын элдин үстүнөн бийлик жүргүзөрүн билесиңер.+
26 Бирок силердин араңарда андай болбосун.+ Араңардан ким улук болгусу келсе, ал силерге кызматчы болсун.+
27 Араңардан ким биринчи болгусу келсе, ал силерге кул болсун.+
28 Себеби адам Уулу да өзүнө кызмат кылдырыш үчүн эмес, кайра өзү кызмат кылып,+ көптөр үчүн өз өмүрүн кун* катары бериш үчүн келген»,+— деди.
29 Алар Жериходон чыгып баратканда, Исанын артынан көп эл ээрчип жөнөдү.
30 Ошондо жол боюнда отурган эки сокур киши Исанын өтүп баратканын угуп: «Мырзам, Дөөтүнүн Уулу, бизге кайрымдуулук кыла көр!» — деп кыйкыра баштады.+
31 Эл аларды тыйганга аракет кылды. Бирок ал экөө: «Мырзам, Дөөтүнүн Уулу, бизге кайрымдуулук кыла көр!» — деп ого бетер катуу кыйкыра баштады.
32 Иса токтоп, аларды чакырды да: «Силерге эмне кылып берейин?» — деп сурады.
33 Алар: «Мырзам, көзүбүз көрсүнчү»,— дешти.
34 Исанын боору ооруп, алардын көзүнө колун тийгизгенде,+ экөө тең ошол замат көрүп калды. Анан Исанын артынан ээрчип жөнөштү.
Шилтемелер
^ Римдиктердин күмүш тыйыны. 1 динар жумушчунун 1 күндүк эмгек акысы болгон. Б14 тиркемесин кара.
^ Сөзмө-сөз: «Үчүнчү саат чамасында». Күн чыккандан тартып саналчу.
^ Сөзмө-сөз: «алтынчы саат чамасында».
^ Сөзмө-сөз: «тогузунчу саат чамасында».
^ Сөзмө-сөз: «он биринчи саат чамасында».
^ Бул жерде «чөйчөк» деген сөз Кудайдын эрки боюнча Исанын Кудайга акарат кылды деп ак жерден айыпталып өлтүрүлөрүн билдирет.
