Шемуелдин 1-китеби 11:1—15
11 Амондун тукумдарынан+ болгон Нахаш кошууну менен келип, Гилаттагы Жабештин+ тушуна жайгашты. Жабештин тургундары Нахашка: «Биз менен келишим түз, биз сага кызмат кылалы»,— дешти.
2 Нахаш аларга: «Келишим түзүш үчүн силерге бир шарт коём: ар бириңердин оң көзүңөрдү оём. Бүт ысрайыл элин ошентип маскара кылам»,— деди.
3 Жабештин аксакалдары: «Бизге жети күн убакыт бер. Бүт Ысрайыл жерине кабарчыларды жиберели. Эгер бизди куткарар эч ким чыкпаса, сага багынып беребиз»,— дешти.
4 Кабарчылар Шабул жашаган Гибага+ барып, бул сөздөрдү элге айтышты, ошондо эл боздоп ыйлады.
5 Ошол маалда Шабул малын талаадан айдап келаткан эле. Ал: «Эмне болду? Эл эмнеге ыйлап жатат?» — деп сурады. Ага Жабештин тургундары айткандарды айтып беришти.
6 Ошондо Шабулга Кудайдын ыйык руху таасир этип,+ анын каары кайнады.
7 Ал эки буканы союп, аларды жиликтеп, кабарчыларга берди да, бүт Ысрайыл жерине: «Шабул менен Шемуелдин артынан барбагандардын бодо малы ушундай болот!» — деп айттырып жиберди. Ошондо элди Жахаба жиберген коркунуч басып, баары бир кишидей болуп жолго чыгышты.
8 Шабул аларды Безекте санап чыкканда, Жүйүт уруусундагы эркектердин саны 30 000, калган уруулардагы эркектердин саны 300 000 болду.
9 Шабул менен жоокерлери кабарчыларга: «Гилаттагы Жабештин тургундарына: „Эртең чак түштө куткарыласыңар“,— деп айткыла»,— дешти. Кабарчылар барып, муну Жабештин тургундарына айтышканда, алар аябай сүйүнүп кетишти.
10 Алар Нахашка: «Эртең силерге багынып беребиз, бизди эмне кылам десеңер, өзүңөр билгиле»,— деп коюшту.+
11 Эртеси күнү Шабул элди үч топко бөлдү. Алар эртең мененки күзөт маалында* Амондун тукумдарынын+ конушуна кирип барышты да, аларды чак түшкө чейин кырышты. Аман калгандары болсо бириндеп, туш тарапка качып кетишти.
12 Эл Шемуелге: «„Бизге Шабул падышалык кылмак беле?“ — дегендер кимдер эле?+ Аларды алып келгиле, өлтүрөбүз»,— деди.
13 Бирок Шабул: «Бүгүн эч кимди өлтүргөнгө болбойт,+ анткени Жахаба бүгүн ысрайыл элин куткарды»,— деди.
14 Кийинчерээк Шемуел элге: «Жүргүлө, Гилгалга барып,+ Шабулдун падыша болгонун дагы бир жолу жарыялайлы»,— деди.+
15 Ошентип, бүт эл Гилгалга барып, Жахабанын алдында Шабулду падыша көтөрүштү. Анан Жахабанын алдында тынчтык курмандыктарын чалышты.+ Шабул менен бүт ысрайыл эли кубанып-шаттанып, майрамдашты.+
Шилтемелер
^ Б. а. түнкү экилерден таңкы алтыга чейинки убакыт.
