Ekipe zeto za mbangululu yôka 60 % zisalaka ntangu zazansoni, ka ku Betele’â ko, kâ mu nzo za mbangululu peleko ADT. Mu bungu dia nti mpila yo ya sarila ye ya mbote? Ntia bisalulu mpangi zibangulaka bafweti bâ na bio mu tomo sala mu nzo ya mangululu? Mpe bwe mbuka yi bâka ekipe ya mbangululu yinatinaka nsobolo mu mbangululu’awu?

 Nzo ya mbangululu mbo yisaka ti mpangi zibangulaka zabêla mu mbuka zi bavulu zonzaka zu di babangulaka. Karin, bangulaka mu zu dia Bas Allemand, têle ti: “Tûka ti basobele nzo’eto ya mbangululu mu kwizi bâ ku nzo ya mbangululu ye ku Cuauhtémoc, ku tizunga tia Chihuahua, ku Mexique, ntangu zazansoni mu Bas Allemand tuzonzaka—na mpangi zakaka zibangulaka, mu tisalu tia samuna, kâ mpe bu tukwe zebaka. Bantu batuzungiriri zu dieto bazonzaka. Bingana tuwâka bi talembo wâ tûka ntama, mpe mbo wutubakisaka mu zaba ntêlo za môna zi vulu sarilaka bantu.”

 James, salaka mu ekipe ya Frafra ku Ghana, têle ti ntangu zakaka mbo kaniongaka mu bungu ti ka sala yôkese ntangu yi keri yôkesaka na mpangi za ku Betele ko. Kâ, yandi vutulu tâ ti: “Nzololo mu sala ku nzo ya mbangululu. Mutima’ani mu nsayi wutomo bâka bu nisamunaka, mpe bu nimonaka bantu batambulaka nsangu za mbote mu bungu ti mu zu diawu bata za wîla.”

 Bwe bampangi babongelaka nzengolo mu zaba kwe bafweti tûla nzo ya mbangululu? Joseph, mpangi ya service mondial de développement-construction ya ku Warwick, ku New York, États-Unis, têle ti: “Wumosi wa misamu mia mpasi mi tubwabanaka na mio ni wena’eti, ku mbuka zakaka courant na mamba mpasi biena, peleko connexion ya Internet mpasi yena mu baka mikanda mi bafweti bangula. Buna, ntete tabonga nzengolo ya baka mbuka yibâ nzo ya mbangululu, mbuka zazîngi tutoko banzaka zi bazonzaka zu diawu.”

 Vula-vula, ka wubâka musamu wa mpasi ko mu bonga nzengolo, mpe mbongo ka zazingi’â ko zidukaka tala ti bafweti tûla nzo ya mbangululu ku nzo ya tukutakanu twa tunene peleko ku nzo za bamisionere ze mu mbuka zilembolo mpasi mu kwenda mu bungu dia mpangi zibangulaka. Tala ti mbuka zo ka zena za sârila ko, mpangi zilendi lomba mu sumba nzo mu bungu dia mpangi zibangulaka na biro zi basarila. Tala ti nsatu za ekipe ya mbangululu zisobele, buna ka wubâ musamu wa mpasi ko mu teka mbuka zo ngatu basarila mbongo zi babaka mu lungisa nsatu zakaka.

 Mu muvu wa tisalu wa 2020, tayizi dukisa kampe 7 800 000 000 FCFA (milio 13 za dollars) ngatu nzo za mbangululu zatatamana mu sala. Ekipe zisalaka mu nzo za mbangululu zifweti bâ na ordinatere, logiciels mu bungu dia tisalu, bisalulu bi basilaka enregistrer, Internet na bima biakaka bia mfunu. Mu tifwani ordinatere yifweti sarila muntu wumosi kampe 450 000 FCFA (750 dollars) yifwaka. Mu ordinatere logiciels zibâka mô zi bafweti sumba, Watchtower Translation System (WTS), logiciel yibakisaka mpangi zibangulaka mu kubika bisalu biawu na mu kulu baka bisalulu bia nguri.

 Ekipe za mbangululu zayizi baka mpe bisalulu bi basilaka enregistrer ngatu basarilaka bio tûka mu biro zawu. Bisalulu bio biayizi tomo bâ mfunu coronavirus bu yabatikiri, mu bungu ti mpangi zibangulaka zaneti bisalulu biango ku nzo zawu mu tatamana mu sa mbangululu ya mikanda na ya video.

 Mu mbuka ze nzo za mbangululu, mpangi zihanaka lubakusu mikanda mi babangulaka zitaluzulaka, mpe nzo zo zikipaka. Cirstin salaka ku nzo ya mbangululu ya Afrikaans ku hata dia Cap ku Afrique du Sud, têle ti: “Bisamuni na mipasuri-nzila miamingi mie na bweso bwa hana lubakusu lwawu kû.”

 Mpangi zo zitihanaka mbo ziyangalalaka mu bweso bo. Mpangi’eto yimosi ya yikento yitêle ti bu kahanaka lubakusu mu nzo ya mbangululu lutindusu lwalwingi kabakaka. Mpangi zakaka mazu mawu zitûlaka mu enregistrement za audio. Juana, mpangi ya yikento yibangulaka mu Totonaque ku Veracruz, ku Mexique, têle ti: “Bwawu bu, bu tweka penepene na mahata ma bazonzaka zu dieto, ka wena musamu wa mpasi kwe beto ko mu sarila mpangi za mu teritware ngatu tasa enregistrer mikanda audio na mia video.”

 Kâ, ngano nzo za mbangululu zabakisi mu tomesa mbangululu? Milio za bantu batangaka mikanda mieto basingasaka ti mbangululu yatomono toma. Cédric, salaka mu ekipe yibangulaka mu Kongo ku Congo (Kinshasa), têle ti: “Mpangi zakaka mbo zeri tâka mpila’eto ya bangula mu Kongo, ‘Kongo dia mabuku ma Organizasio,’ mu bungu ti zu dieto dia Kongo dia swaswana diabâ na dio di bavulu zonzaka. Kâ bwawu bu, batâka ti Kongo di tubangulaka dia ntangu yi diena, Kongo di zonzaka bantu bilumbu biabiansoni.”

 Andile, we mu ekipe ya mbangululu ya Xhosa, misamu ni mia mpila yo kawâ ku Afrique du Sud. Yandi têle ti: “Bantu babingi batutêlaka ti nsobolo bayizi mona mu mbangululu’eto. Mpe bala beri tangaka Nzo ya Zangama ya Munkengi mu Anglais bayikiri ya tangaka mu Xhosa. Kâ, mbangululu ya môna batomo zoloko mpe yilembolo mpasi ya La Bible Traduction du monde nouveau.”

 Mbongo zazansoni zi basarilaka mu zakasa nzo za mbangululu na mu kipa mpangi zisalaka mu nzo zo, mu makabu ma mutima zitûkaka, ma bahanaka mu bungu dia tisalu tisalamaka mu nza yayansoni, na ma basaka mu donate.dan124.com.