1, 2. Mu bungu dia nti zoloko Yehova?

NGANO Nzambi Yandi zololo? Yandi tomono zolo, ntiangu watiheni kwe Yandi. Kampe yena ndiku’aku yi tomono zolo. Kâ Yehova watoko ku zolo, ntete nge wamuzolo. Bibila ditele ti: “Zolo tuzoloko, mu bungu ti Yandi watoko tu zolo.”​—1 Za 4:19, NW.

² Yehova luzolo lwandi mu mpila zazingi katusongela lo. Yehova watuhana “nzo” ya toma, mutoto, na bima biakaka bisaka ti tazolo luzingu. (Matie 5:43-48; Nzabukusu 4:11) Zololo ti tabâ na tindiku tia mbote na Yandi mpe watuhana bima biabingi bitubakisaka mu mu zaba. Bu tutangaka Bibila, Yehova tuwâka. Mpe bu tusambilaka, mbo katuwâka. (Mikunga 65:2) Yehova twarisa katutwarisaka, mpe ngolo katuhanaka mu nzila ya mpeve santu’andi ya ngolo. (Like 11:13) Mu luzolo lwandi wayizi tambika Mwana’andi wu katomono zolo mu tu kûla mu masumu na mu lufwa.​—Tanga Za 3:16 na Bisi-Rome 5:8.

3. Bwe tulendi tatamana mu bâ ndiku za Yehova?

³ Bambukila’eti mosi ya ndiku zaku. Wabâ naku  mu ntangu za mbote na za mpasi. Mu tatamana mu bâ ndiku na muntu, tufweti sarila ngolo zazingi. Mpila mosi kwa mpe na tindiku tieto na Yehova. Yehova ndiku yiyôkele bubote yena, mpe tulendi bâ ndiku zandi ntangu zazansoni. Ntiangu Bibila ditutelaka ti: “Tatamana mu bâ mu luzolo lwa Nzambi.” (Yude 21, NW) Bwe tusa mu tatamana mu bâ mu luzolo lwandi? Bibila ditele ti: “Zolo Nzambi kuzololo tâ: tatumama mu ntumunu zandi; ntumunu zandi ka zena mpasi ko.”​—1 Za 5:3, NW.

4, 5. Ngano nti biakutuma mu zolo Yehova?

⁴ “Zolo Nzambi.” Ngano ntumwa Za ntia mabanza meri nandi bu katsoneka misamu mio? Mabanza ma ngolo ma bâka na muntu ku mutima mu bungu dia Nzambi keri zolo zonzelaka. Ngano bambuka tabambuka bu wabatika mu zolo Yehova?

⁵ Bambuka’eti bwe wamona ku mutima bu wayizi bakula ti, Yehova zololo wabâ na luzingu lwa mankululu mu nza ya môna. Wayizi longoka misamu miamiansoni mi kayizi sa ngatu wabaka luzingu lo. Mpe wayizi bakula ti, bu katambika Mwana’andi ha mutoto, Yehova wayizi tusila kabu dia nzitukulu! (Matie 20:28; Za 8:29; Bisi-Rome 5:12, 18) Misamu mio miakusimba mutima bu wamona ti Yehova nge katomono zolo, ntiangu wabatika mu mu zolo nge mpe.​—Tanga 1 Za 4:9, 10.

6. (a) Nti tusaka bu tuzoloko muntu? (b) Ngano luzolo lwaku mu Yehova nti lwakutumini mu sa?

⁶ Kâ, luzolo lwa Nzambi lwabâ naku, ku mbatukulu kwa lweri. Mu tifwani, bu tuzoloko muntu ka tusukisinaka  ko kwa mu mu tela ti: “nge nzololo.” Mu bungu ti yandi zololo, mbo zolo mpe wayirika misamu mimutâka nsayi. Mpila mosi mpe, luzolo lwaku mu Yehova lwakuhana nsatu ya bela buna bu kazoloko. Luzolo lwaku bu lweri kwe kuri, wayizi tihana kwe Yehova mpe wayizi batusu. Bu wayizi tihana kwe Yandi, wayizi mu kanisina ti mbo mu sarila ntangu zazansoni. (Tanga Bisi-Rome 14:7, 8.) Ngano bwe lendi lungisila kani diaku?

7. (a) Tala ti Yehova Yandi tuzololo, nti tusa? (b) Zonzela ndambu ntumunu za Nzambi.

⁷ Mu bungu ti Yehova tuzoloko, mbo ‘tutumamaka mu ntumunu zandi.’ Bibila mbo ditulongesaka ka ntia mpila luzingu Yehova kazololo tabâ na lo. Mu tifwani, Nzambi mbo katutelaka ti bubi bwena mu sambila tima peleko muntu wakaka, mu nwa malavu mamingi, mu laba, mu huna na mu vukasa nitu na muntu wu tulembolo bâ ba kwelana.​—1 Bisi-Korente 5:11; 6:18; 10:14; Bisi-Efeze 4:28; Bisi-Kolose 3:9.

8, 9. Ngano bwe tuzabila mabanza ma Yehova mu misamu mi tulembo bakilaka misiku mu Bibila? Hana tifwani.

⁸ Mu tâ Yehova nsayi, ka tufweti’â tatumama kwa mu ntumunu zandi ko. Ka tu hana misiku mu bungu dia musamu ni musamu ko. Ntangu zakaka ka tubaka musiku mu Bibila ko wudelakane na musamu we neto. Kâ, bwe tulendi bongela nzengolo za mbote? (Bisi-Efeze 5:17) Mu Bibila, mitieno mie mo; mitieno ni matieleka ma nguri matulongesaka mabanza ma Yehova. Bu tukwe tangi Bibila, mbo tutomo mu zaba. Mbo tuzaba mabanza mandi, mio mi kazololo  na mi kalembolo zolo.​—Tanga Mikunga 97:10; Bingana 6:16-19; tala note ya 1.

⁹ Mu tifwani, mu bonga nzengolo ya tala bima mu tele peleko mu Internet, Yehova ka tuhanaka musiku ko. Kâ, mitieno katuhana mitubakisaka mu bonga nzengolo za mbote. Mu ntangu yi, mu nsaka, miangu miamingi na misamu mia nsoni bata sarila. Mu Bibila, Yehova tu telele ti “ka zololo’â bantu babansoni bazololo miangu ko” mpe “mbo kafundisa bô basarilaka bunsuza.” (Mikunga 11:5; Bahebre 13:4) Ngano bwe mitieno mio milendi tu bakisa mu bonga nzengolo za mbote? Bu tulongokaka misamu mi yinaka Yehova, ntiana nsalulu za bunsuza, tufweti bika mu vutu mia yirika.

10, 11. Mu bungu dia nti tutumamaka kwe Yehova?

¹⁰ Mu bungu dia nti tutumamaka kwe Yehova? Ka mu tina kwa nsembolo peleko misendo milendi tu natina nzengolo za mbi ko. (Bisi-Ngalate 6:7) Kâ, kwe Yehova tutumamaka mu bungu ti Yandi tuzololo. Ntiana mwana bu kazoloko mu tâ tata’andi nsayi, beto mpe tuzololo tatâ Tata’eto we ku mazulu nsayi. Ka kwena tima ko tiyôkele mu zaba ti Yehova nsayi yi bâka nandi mu beto!​—Mikunga 5:12; Bingana 12:2; tala note ya 2.

¹¹ Ka tutumamaka kwe Yehova ko mu bungu ti ka twena mu mpasi ko, peleko mu bungu ti ka kwena tima tiakaka ti tulendi sa ko. Ka tusolaka mpe misiku na mitieno mi tutumamana ko peleko mi tulembo tumamana. (Lubambu 12:32) Kâ, mbo tumutumamanaka mu ntangu zazansoni, ntiana bwa tela wo titsoniki timosi tia Mikunga: “Wa kangama ndiena mu  ntumunu zaku, yee, za nzololo.” (Mikunga 119:47; Bisi-Rome 6:17) Tuzololo talanda tifwani tia Noa: yandi wasongela ti Yehova keri zoloko bu kasarila misamu miamiansoni mi kamutuma. Bibila ditele ti Noa “ni nkatika buna” kayirikila mio mia mu lomba Yehova. (Mbatukulu 6:22) Ngano zololo Yehova katâ bo mu bungu dia nge mpe?

12. Ngano bwe tulendi tela Yehova nsayi?

¹² Ngano Yehova bwe kamonaka ku mutima bu tumutumamanaka? Mutima’andi tutâka nsayi. (Bingana 11:20; 27:11) Banza’eti: Nzambi yasala bima biabiansoni tutâka nsayi bu tumutumamanaka! Kâ kani kabwe ka tutumaka mu ngolo ko mu mu tumamana. Ni Yandi watuhana timpwanza tia sola. Wuzololo tâ ti tulendi sola beto beni mu yirika mbote peleko mu yirika mbi. Yehova zololo ti luzolo lweto mu Yandi lwatutuma mu bonga nzengolo za mbote, ngatu tabâ na luzingu lwa mbote.​—Lubambu 30:15, 16, 19, 20; tala note ya 3.

13, 14. Bwe tuzabiri ti, ka wena musamu wa nguria mpasi ko mu tumama kwe Yehova? Hana tifwani.

¹³ Tulendi banza ti musamu wa mpasi wena mu tutumama mu ntumunu za Yehova, tulendi banza mpe boloko diena tamana tumama mu ntumunu zango. Kâ Bibila ditomono tâ ti: “Ntumunu zandi ka zena mpasi ko.” (1 Za 5:3) Ntelo ya “mpasi” mu zu dia Greke yizololo tâ “dema.” Verse zakaka mbo zisarilaka ntelo yo, mu zonzela ntumunu zilembolo delakana peleko bantu be na miangu, bayelaka mu yirika  mbi kwe bantu bakaka peleko bayelaka mu ba tuma. (Matie 23:4; Bisalu 20:29, 30) Nouvelle Bible Segond mbo yibangulaka 1 Za 5:3 mu mpila eyi: “Ntumunu zandi ka zena dema ko.” Ntumunu za Yehova ka zena dema ko, ka zena nguria mpasi ko mu tumamana. Misamu miamiansoni mi tu lombaka Yehova mia mbote miena.

¹⁴ Tabonga tifwani: Ndiku’aku tabakisa mu soba nzo. Turiri bima biabiansoni mu sake zazingi. Sake zakaka ka zena dema ko, kâ zakaka bantu bole bafwanakane mu nanguna zo. Ngano ndiku’aku mbo kakulomba wananguna sake ya dema nge kaka? Kâni! Mu bungu ti kazololo’â ko wamona mpasi. Ntiana ndiku yo, kani kabwe Yehova ka tu lomba ko tasa tima tie nguria mpasi. (Lubambu 30:11-14) Yehova beto katomono zaba. “Tomono zaba ka mu ntia tima tasalamana, mbo kabambukaka ti mutoto twena.”​—Mikunga 103:14.

15. Mu bungu dia nti tulendi bâ na lukwikulu ti, ntumunu za Yehova mu bungu dia mbote ya beto beni kahanina zo?

¹⁵ Mose watâ kwe bala ba Israele, tala ti Yehova ntumunu keri bahanaka, ni mu bungu dia mbote ya bawu beni; bu baketi za tumamana, mbo baketi tatamana mu bâ ba moyo. (Lubambu 5:28-33; 6:24) Mpila mosi mpe mu ntangu yi. Misamu miamiansoni mi tu lombaka Yehova mbo mitomesa luzingu lweto. (Tanga Izaya 48:17.) Yehova, Tata’eto, zebi mina mitufwanakane ntangu zazansoni. (Bisi-Rome 11:33) Bibila ditele ti: “Nzambi nkwa luzolo.” (1 Za 4:8) Wuzolo tâ ti Yehova bu katâka musamu peleko bu kasaka tima, mu luzolo kwa kasilaka tio!

16. Bwe tulendela mu tumama kwe Yehova, ni bu sa ti bantu ba masumu twena, mpe ni bu sa ti Satana tayâla nza?

 ¹⁶ Musamu wa mpasi wena mu tumama ntangu zazansoni kwe Yehova. Nza yi tubelaka, Satana tayayâla. Yêla kayêlaka mu tuma bantu bayirika mbi. (1 Za 5:19) Tufweti mpe telamana masumu meto. Mabanza na mbanzulu za mbi zilendi tu tuma mu kolama kwe Nzambi. (Bisi-Rome 7:21-25) Kâ luzolo lwe neto mu Yehova, ngolo lutuhanaka mu yirika mbote. Ngolo zi tusarilaka mu tâ Yehova nsayi, za kamonaka, mpe mbo katubakisaka bu katuhanaka mpeve santu’andi ya ngolo. (1 Samwele 15:22, 23; Bisalu 5:32) Mpeve yo mbo yitubakisaka mu bâ na bifu bia mbote, ntiangu tulendaka mu tumama kwe Nzambi.​—Bisi-Ngalate 5:22, 23.

17, 18. (a) Ngano nti tulongoka mu buku di? (b) Ngano timoko tita kwiza ntia misamu tizonzela?

¹⁷ Mu buku di, mbo tulongoka mpila ya luzingu lu fweti bâ neto mu tâ Yehova nsayi. Mbo mona, ka bwe tulendi sarila mitieno na ntumunu zandi za ndiatulu ya buzitu mu luzingu lweto. Bambuka ti, Yehova ka tumaka bantu mu ngolo ko bamutumamana. Bu tusolaka mu mu tumamana, luzingu lweto mbo lukwizi tomaka, mpe tulendi bâ na vuvu tia mbote mu bungu dia bilumbu bita kwiza. Kâ, wuyôkele mfunu, bu tutumamaka kwe Nzambi, mbo tumusongelaka ti Yandi tuzololo.​—Tala note ya 4.

¹⁸ Yehova watuhana ngindu ngatu tasaka luswaswanu lwa misamu mia mbote na mia mbi. Tala ti tulongele ngindu’eto, mbo yitubakisa mu ‘tumama mu ntumunu zandi’. Kâ, ngindu ni nti? Mpe bwe tulendi longela ngindu zeto? Ni mio tulongoka mu timoko tita kwiza.