“Lufweti bâ milongi.” (Ebr. 5:12) Banza’eti! Yehova​—Mulongi wuyôkele mu nza—​ta tu lomba, beto, mu longosa kwe bampwana’eto Yandi ni nani! Ndombolo zazansoni za longesa matieleka matariri Yehova​—mu kanda, mu timvuka peleko mu tisalu tia samuna—​bweso bwena bwa nzitukulu mpe dema diena dia mfunu. Bwe tulendi lungisila tisalu tio?

Mvutu mu misamu mia tsoneka Paulo kwe Timote yena: “Tatamana mu tihana mu ntangulu ha meso ma bantu, mu lutindusu, mu ndongosolo.” Paulo wavutu tâ: “Bu sila bo, mbo tivukisa nge beni, na bô bata ku wâ.” (1 Tim. 4:13, 16) Nsangu zi nataka luzingu zivukisaka. Ntiangu we mfunu kwe muna muntu mu tomesa lenda diandi dia tanga na dia longesa. Mukanda wu bayizi wa yirika mu ku bakisa. Tala bu basarila wo.

Yehova ni “Mulongi wa Wunene.” (Iza. 30:20) Ni bu sa ti mukanda wu wukubakisi mu tomesa lenda diaku dia longesa na dia tanga, kani kabwe kuzimbakanandi ti Yehova ni titeko tia nsangu zeto mpe ni Yandi bendaka bantu. (Za 6:44) Buna vulu mu sambilaka mu mu lomba mpeve santu. Vulu sarilaka zu diandi. Tuma bantu mu tûla mabanza mawu mu Yehova, ka mu nge beni’â ko. Sarila ngolo mu butisa mu mitima mia bantu bata ku wâ luzolo mu bungu dia Yandi.

Bakulombele mu longesa nsangu ziyôkele mfunu zi bahana kwe bantu. Lukwikulu lwe neto ti bu sikirila “ngolo zi hanaka Nzambi,” mbo tomo lungisa tisalu tio.​—1 Pi. 4:11.

Tintwari na nge mu tisalu tia ndongosolo,

Timvuka titwarisaka tia Mbangi za Yehova