NGANO wa weka kuturila watelamana misamu nge kaka? Mu “ntangu za mpasi mu vivirila” twena zilendi tu nôkesa mpe zilendi sa ti tabâ mu bukaka. (2 Tim. 3:​1, NWT) Kâ, ka tufweti’â ta telamana mpasi zo ko beto kaka. Bibila mbo disongelaka ti mfunu wena mu bâ na ndiku za mbote mu “ntangu ya mpasi”—Bin. 17:17.

Ndiku zeri saka nzietolo na Paulo zamunatina ndandu. (Kol. 4:​7-11) Mu ntangu yi kabâ mu boloko ku Rome, ndiku zandi za kipa misamu mi keri lembo lenda mu yirika. Mu tifwani, Epafrodite wanata bima bieri tambikaka bampangi ba ku Filipe kwe Paulo. (Flp. 4:18) Tisike wahana mikanda mia Paulo kwe bimvuka bia swaswana. (Kol. 4:7) Na lubakusu lwa bandiku zandi, Paulo walungisa tisalu tiandi tia samuna ni bu sa ti ku boloko kabâ yandi kaka. Bwe lendi bêla ndiku ya mbote lumbu ti?

Bifwani bia lumbu ti mbo bisongelaka ti mfunu wena mu bâ ndiku ya mbote. Mu tifwani mpangi yimosi ya yikento wayizi bâ ndiku ya mbote ya Elisabeth, weri mupasuri-nzila wa ntangu zazansoni ku Espagne. Mu ntangu nguri’andi yi bamubaka na kansere, mpangi yo ya yikento wayizi tambika kwe Elisabeth messages zazingi za sikamana mu Bibila zeri tindisaka. Elisabeth têle “ka nayizi’â bâ meno kaka ko, messages zo zayizi kungana ngolo mu telamana misamu mia muna bilumbu.”—Bin. 18:24.

Tulendi kurisa tindiku tieto na bampangi bakaka bu tubabakisa mu tisalu tia samuna peleko mu kwizaka ku tukutakanu. Mu tifwani, ngano ku lendi’â wabakisa mpangi ya nuna ko mu kwiza ku tukutakanu peleko mu samuna? Wamana sila bo, mbo yangalala mu ntangu yi luyôkesa. (Rom. 1:12) Kâ, bampangi bakaka ka balendi’â baduka ku nzo zawu ko. Bwe lendi bêla nkatika ndiku mu bungu dia bawu?

Bampangi bakaka bimbevo bie nawu mpe na misamu miakaka mi bakabakasaka mu lembo kwizaka ku tukutakanu. Tabongeno tifwani tia David wabâ na kansere. Tûka ngonda yôka 6, traitement keri bakaka mu bungu dia kansere. Mu ntangu ya traitement yandi, David na mukento’andi Lidia, ku nzo beri landilaka tukutakanu.

Bwe mpangi za timvuka za babakisila? Ha manima ma muna lukutakanu, mpangi zakaka, David na Lidia beri zonzesaka mu nzila ya vidéoconférence. Mpe mu ntangu David na Lidia yi beri hanaka mvutu ku tukutakanu, bampangi mbo beri batambikilaka messages zi tindisaka. Ntia ndandu  ya moneka? David na Lidia bayizi mona luzolo lwa bampangi ba mu timvuka.

Ngano tulendi samuna na mpangi zakota nzo? Bu tutomo yirika programe’eto, tulendi bâ na lenda dia samuna na mpangi zo. (Bin. 3:27) Ngano tulendi kubika ntangu ya tsoneka mikanda peleko ya samuna nawu mu nzila ya telefone? Bô bakota nzo balendi landa tukutakanu twa tisalu tia samuna mu nzila ya vidéoconférence. David na Lidia batomo zolo mpila yo ya sarila. David têle: “Landa timoko na lusambulu tintwari na bampangi ba mu tikunku tieto tia bisamuni, musamu wo watomo tu tindisa.” Tala ti wudelakane, ngano ntangu zakaka lendi longokaka na mulongoki’aku kwe mpangi yo ya kota nzo?

Mu ntangu yi tusamunaka na mpangi zeto zakota nzo mbo tutomo monaka bifu biawu bia mbote, mpe tindiku tieto na bawu mbo titomo kulaka. Mu tifwani, mbo tomo yangalala mpe mbo bazitisa bu mona mpila yi balongeselaka Zu dia Nzambi, mpe yi babakisilaka bantu mu pusana kwe Yehova. Mu ntangu yi kwe bakisi bampangi mu timpeve tiawu, lendi kwizi bâ na ndiku zazingi.—2 Kor. 6:13.

Paulo wabaka butindi mu ntangu Tite yi kabâ ha lweka lwandi. (2 Kor. 7:​5-7) Tinsamu tio mbo titusongelaka ti tulendi hana lutindusu kwe mpangi zeto bu tubasongelaka luzolo, kâ mpe bu tubâka ha lweka lwawu, mpe bu tusaka miamiansoni mi tulenda mu babakisa.—1 Za 3:18.

Bampangi ba ku Russie basongela tifwani tia mbote mu tindisa bampwana’awu. Tabongeno tifwani tia Sergey na tia mukento’andi Tatyana. Bapolisie bafuya nzo’awu mpe babanata ku commissariat. Tatyana bamuyambula wa ntete mpe wakâla ku nzo. Sergey têle: “Mu ntangu [Tatyana] yi kakâla ku nzo, mpangi ya yikento yeri na butindi yayizi mu tala. Bandiku bakaka bayiza, mpe bamubakisa mu sa bunkete mu nzo.”

Sergey wavutu tâ: “Bingana 17:17 nizoloko yitâka: ‘Nkatika ndiku ntangu zazansoni kazoloko mpe mpangi yena yabutuka mu bungu dia bilumbu bia matimuna.’ Verse yo yayizi tomo lungana kwe meno mu ntangu yo ya mpasi. Yehova wayizi kungana ndiku zibâka ha lweka lwani ntangu zazansoni.” a

Mu bungu ti mu ntangu za mpasi twena, ndiku ze neto nsatu zi tulendi sikamana. Mu ntangu ya mpasi ziyôkele mbo tutomo vutu bâ na nsatu ndiku zeto. Ntiangu tasa miamiansoni mi tulenda mu bâ nkatika ndiku bwawu bu!—1 Pi. 4:​7, 8.