NGANO wamonaka ti, bantu babîngi mu nza mbo babanzaka ti wufwanane bababongela mu mpila yimosi ya nzitukulu? Ni bu sa ti mu mpila ya nzitukulu bababongelaka, mbo babanzaka ti mpila yo ka yifweni’â ko. Mbanzulu zo mbo zisongelaka tifu tia bwimi na tia lembo tondaka bimonekaka mu tangu yi ya mansukina.—2 Tim. 3:2.

Tifu tio tia bwimi ka tiena tia lumbu ti ko. Adame na Eva basola mu bonga nzengolo za bawu beni, mpe zabanatina mpasi zazingi. Mivu miamingi ha manima, mutinu Uziya mbo keri banzaka ti lenda diabâ nandi mu yôka encens ku tempelo, kâ watomo wubakana. (2 Nta. 26:18, 19) Mu bungu ti bala ba Abrahame beri, Bafarize na Basaduseye mbo beri banzaka ti wafwanana Nzambi kababongela mu mpila ya nzitukulu.—Mat. 3:9.

Bantu bê na bwimi batuzungiriri, mpe tulendi kwizi landa mpila’awu ya banzila. (Nga. 5:26) Tulendi kwizi banza ti wufwanane mpe batubongela mu mpila ya nzitukulu. Bwe tulendi sa mu lembo bâ na mabanza mo? Tufweti toko zaba mbanzulu za Yehova mu musamu wo. Misiku miole mia Bibila mitubakisa.

Yehova tu hanaka bima biabiansoni. Tabongeno bifwani.

• Mu kati dia kanda, bakala mbo dizoloko ti mukento kamuzitisa, mpe mukento mbo kazoloko ti bakala kamusongela luzolo. (Efz. 5:33) Bantu ba  kwelana bafweti songasana luzolo, ka kwe muntu wakaka ko. (1 Kor. 7:3) Bibuti bala bawu balombaka babatumamana, mpe bala mbo badingaka ti bibuti biatomo bazolo.—2 Kor. 12:14; Efz. 6:2.

• Bakuluntu basalaka bwabwigi mu timvuka wufwanane babazitisa. (1 Tes. 5:12) Kâ bakuluntu ka bena na nswa ko wataluzula misamu mi yirikaka mpangi zawu.—1 Pi. 5:​2, 3.

• Guvernema nswa we nandi walomba mpaku kwe bantu, mpe bamuzitisa mu bungu ti Nzambi wamuhana nswa wo.—Rom. 13:​1, 6, 7.

Yehova bima biabingi katuhanaka yôka bio bie neto nsatu. Mu bungu ti bantu ba masumu twena, wufwanane tafwa. (Rom. 6:23) Kâ, Yehova tusakumunu twatwingi katuhanaka mu bungu ti beto katomono zolo. (Mik. 103:​10, 11) Tusakumunu twatwansoni Yehova tu katuhanaka bweso bwena bulembolo tufwanakana.—Rom. 12:​6-8; Efz. 2:8.

Sa keba mu bifu bia nza. Tala ti ka tusiri’â keba ko tulendi kwizi banza ti tuyôkele bantu bakaka. Mu tifwani tia bisari bi bafuta denie yimosi, Yezu wasongela mpila yi tulendi kwizi bêla na mbanzulu za nza. Bisari biakaka biasala tilumbu tia mukaka ku nsi’â mwini wa ngolo; mpe biakaka heure mosi kwa biasala. Bô basala tilumbu tia mukaka babanza ti mbongo zazingi bafweti bafuta mu bungu dia tisalu ti basala. (Mat. 20:​1-16) Bu kabangula tifwani tio, Yezu wasongela ti milongoki miandi miafweti yangalala mu bio bi ba hanaka Nzambi.

Bâ muntu wutondaka, mpe kukêlandi tima kwe bantu bakaka. (1 Tes. 5:18) Landa tifwani tia Paulo walembo lomba mbongo kwe bampangi ba ku Korinte ni bu sa ti lenda diabâ nandi dia sila bo. (1 Kor. 9:​11-14) Tufweti tondaka mu bio bi tu hanaka bantu, kâ ka tukêlakandi tima kwe bantu bakaka.

Bâ na tifu tia kuluka. Mu ntangu muntu yi katomo tizoloko, mbo kabanzaka ti wufwanane kabaka bima yôka bio bie nandi. Tifu tia kuluka mbo titubakisaka mu lembo bâ na mbanzulu zo.

Mbikuri Daniele tifwani tia mbote tiena mu bungu dia tifu tia kuluka. Kanda diandi, butoma bwandi, mayela mandi, mpe na lenda dieri  nandi mbo biaketi mu tuma mu banza ti wafwanana kabaka bweso bo bieri nandi. (Dan. 1:​3, 4, 19, 20) Daniele wa kuluka weri, mpe tifu tio tiasa ti kabâ ntalu ha meso ma Yehova.—Dan. 2:30; 10:​11, 12.

Taloseno bwimi buyangane mu nza lumbu ti. Buna tatatamaneno mu mona nsayi mu tusakumunu tu tu hanaka Yehova mu nzila ya bweso bulembolo tufwanakana.