Mary na bakala diandi, John, a ku mbuka yi kwizi salaka bantu babingi ba ku nsi ya Philippines babâka, mpe nsayi yayingi ye nawu mu basamunina nsangu za mbote. Mu ntangu ya COVID-19, Mary wabatika ndongokolo za Bibila zazingi ku nsi’andi na ku mbuka zakaka. Bwe kasa?

Mary mbo keri vulu yulaka kwe milongoki miandi mia Bibila: “Ngano muntu zebi ta zolo mu longoka Bibila?” Tala ti batambula, mbo keri lombaka kamumona. Tiyuvu tia mpila yo ndandu za mbote tivulu nataka. Mu bungu dia nti? Mu bungu ti bantu bazoloko Zu dia Nzambi, mbo bazoloko mu zonzela misamu mi balongokaka kwe kanda diawu na kwe ndiku zawu. Tiyuvu tio ntia ndandu tianata?

Jasmin mulongoki wa Bibila wa Mary, wamusongela kwe ndiku zandi za ziyà zeri dingaka mu longoka Bibila. Mosi mu bawu, Kristine, watomo zolo ndongokolo’andi ya Bibila mpe walomba kwe Mary balongokaka mbala zole mu lumingu. Mu ntangu Mary yi kamuyula tala ti muntu kazaba weri dingaka mu longoka Bibila, Kristine wamuvuturila: “Yee, mbo nikusongela kwe ndiku nzani.” Mu tumingu tweri landaka Kristine wasongela Mary kwe ndiku zandi za ziyà zeri zoloko mu longoka Bibila. Ha manima, Kristine wamusongela kwe ndiku zakaka mpe bawu mpe bamusongela kwe ndiku zakaka.

Kristine wazolo mpe kanda diandi dieri ku Philippines diazaba matieleka matariri Bibila. Mpe wazonzela wo kwe mwana’andi wa mukento, Andrea. Ku mbatukulu, Andrea mbo keri banzaka ti ‘Mbangi za Yehova ka bena dibundu dia matieleka ko, ka bakwikilaka mu Yezu ko, mpe Ancien Testament kwa basarilaka.’ Kâ, ha manima ma ndongokolo yimosi wasoba mabanza. Mu ntangu yi keri longokaka mbo keri tâka: “Tala ti Bibila têle wo, wa matieleka wena!”

Ntangu bu yeri kwe yôke, Andrea wasongela kwe Mary ndiku zandi zole, na mpwana’andi ya ku tisalu ngatu babatika mu longoka. Mu ntangu Mary yi keri longokaka na Andrea, tantine’andi weri lembo monaka, Angela, ndongokolo’awu ya Bibila keri landaka. Tilumbu timosi, Angela walomba kwe Andrea kamusongela kwe Mary, mpe walomba ndongokolo ya Bibila. Angela watomo zolo misamu mi keri longokaka, mu ngonda yimosi matsonoko ma Bibila mamingi kasimba mpe walomba mu longoka mbala yà mu lumingu! Na lubakusu lwa Andrea, wabatika mu landa tukutakanu mu nzila ya vidéoconférence.

Mu ntangu Mary yi kabakula ti bakala dia Kristine, Joshua, mala keri balandaka bu beri longokaka,  Mary wamulomba tala ti lendi bâ nawu tintwari. Joshua wakarisa: “Mbo niluwirikila, kâ ka lukundyula’andi biyuvu; lwamana kundyula biyuvu mbo nikwenda kwani.” Minite 5 ha manima, Joshua wayula biyuvu biabingi yôka Kristine, mpe wadinga ti timoko tiatatamana.

Tiyuvu tiayula Mary, tiamuhana lenda mu bâ na milongoki mia Bibila miamingi. Mu bungu ti milongoki miamingi mieri, wakubika misamu ngatu balongoka na mpangi zakaka. Mary wabatika ndongokolo za Bibila za 28 mu nsi ziyà za swaswana.

Jasmin, mulongoki’andi wa ntete wabaka bateme mu avril 2021. Kristine wabaka bateme mu mai 2022 mpe wakâla ku Philippines mu kwe bâ na kanda diandi. Milongoki miole Kristine mi kasongela kwe Mary miabaka mpe bateme. Ngonda zeri landaka, Angela wabaka bateme, mpe bwawu bu mupasuri-nzila wena wa ntangu zazansoni. Bakala dia Kristine, Joshua, na mwana’awu wa mukento, Andrea, na bantu bakaka ngolo bata sa mu kula mu timpeve.

Mu mbandu ya ntete, nsangu za mbote mbo zeri yanganaka kwe makanda na kwe bandiku. (Za 1:​41, 42a; Bis. 10:​24, 27, 48; 16:​25-33) Ngano lendi yula kwe milongoki miaku na kwe bantu bakaka balumokaka, “tala ti muntu bazebi wuta dinga mu longoka Bibila?” Tala ti yuriri tiyuvu tio tilembolo mpasi, nge mpe lendi bâ na lenda dia longoka na bantu babingi.