“Mbangi za Yehova nsayi yeri nawu kwe bantu, kâ na kwe mbwa zani mpe. Lumbu timosi, Elaine weri ha prezentware, wahana bisikiti kwe mbwa. Ha manima, ntangu zazansoni zi tweri bâka penepene na prezentware, mbwa mbo zeri dingaka mu pusana ha prezentware mu baka ‘bisikiti.’

“Ha manima ma bala ba ngonda, mbwa zayizi zolo bisikiti biawu, mpe nayizi sa bimoko bia nkufi na Mbangi za Yehova. Kâ ka ndieri’â zoloko ko mu tomo zonzaka na bawu. Mvula yôka 70 zeri nani, mpe ka nazaba nkwikulu za Mbangi za Yehova ko. Mu bungu ti mabundu mamingi ma bangerezo makuniongesa, nayizi banza ti bubote bwingi bweri mu longoka Bibila me beni.

“Mu ntangu yo, nayizi mona Mbangi za Yehova mu mbuka zakaka zeri ha prezentware. Bawu mpe nsayi yeri nawu. Ntangu zazansoni biyuvu biani bitariri misamu mia Bibila beri haninaka mvutu, mpe lukwikulu lwani mu bawu lwayizi kula.

“Lumbu timosi, Elaine wakundiyula: ‘Ngano mbo kwikilaka ti bibulu kabu dia Nzambi diena?’ Navutula ti: ‘Yee, ntembe kâni!’ Ha manima Elaine wakuntangila Izaya 11:6-9. Mu ntangu yîna, nadinga mu zaba misamu miamingi mia Bibila, kâ ka ndieri’â zolo ko mu bonga mikanda mia Mbangi za Yehova mu tanga mio.

“Mu bilumbu bialanda, nayizi sa bimoko bia nkufi bieri na nsasa na Elaine mpe na bakala diandi, Brent. Bakundonga mu tanga buku dia Matie tii buku dia Bisalu mu bakula nsasa ya bâ Mukristo. Nalanda malongi mawu. Ha manima ma mwa ntangu, mu été 2016 nayizi tambula mu longoka Bibila na Brent mpe na Elaine.

“Na timina diadiansoni ndieri kêlaka ndongokolo’ani ya Bibila na tukutakanu ku Nzo ya Nsambululu. Nayizi mona ti wa sakumunu ndiena, mpe nsayi yeri nani mu longoka misamu mi tâka Bibila. Ha manima ma mvula mosi, nayizi bâ Mbangi ya Yehova ya batusu. Bwawu bu, bu ndiena na mvula 79, nzebi ti mu nzila ya mbote ndiena. Yehova wakunsakumuna bu kakungana bweso bwa bâ mu kanda diandi.”