1-2. a) Tintwari na Bingana 16:31, bwe tufweti bongelaka mpangi zeto za nuna za kwikama? b) Ntia biyuvu tuhanina mvutu mu timoko ti?

BANTU bakwendaka ku parke ya Arkansas, ku États-Unis, balendi mona diamant zibâka ha mutoto. Kâ, diamant zango ka zena za tsema ko ngatu bayirikila zo bijoux. Buna, bantu babîngi bamonaka diamant zo balendi lembo bakula ti matari mo, bimvwama biena.

² Bu tutomo tala, mpangi zeto za nuna za kwikama, ntiana diamant zo, ntalu zena. Zu dia Nzambi mbo difwanakasaka mvu zawu na mpu ya timfumu. (Tanga Bingana 16:31; 20:29) Kâ, tulendi lembo sa keba mu mpangi zo za ntalu. Mpangi za ntwenia zibakulaka ti mpangi za nuna ntalu zena, zilendi baka bimvwama biyôkele bimvwama bia tinsuni. Mu timoko ti, mbo tuhanina mvutu mu biyuvu bitatu: Mu bungu dia nti Yehova kabongelaka mpangi za nuna za kwikama ntiana bimvwama? Ngano Yehova ntia tibuka kahanaka kwe mpangi zo mu organizasio’andi? Nti tulendi sa mu baka ndandu mu tifwani tiawu?

3. Tintwari na Mikunga 92:12-15, mu bungu dia nti bantu ba nuna ba kwikama bena ntalu kwe Yehova?

³ Mpangi za nuna za kwikama ntalu zena kwe Yehova Nzambi’eto. Zebi ka ntia mpila bantu bena, mpe bifu biawu bia mbote bia kazololo. Mbo kabâka mu nsayi mu ntangu bantu ba nuna bakabanaka na bantwenia, ndwenga zi babaka mu tisalu tiawu tia kwikama ti basala mu luzingu lwawu. (Yobe 12:12; Bin. 1:1-4) Kwe Yehova, tifu tiawu tia korela ntalu tiena.  (Mal. 3:16) Ni bu sa ti misamu miamingi babwabana na mio mu luzingu lwawu, kani kabwe timinu tiawu mu Yehova ka tiawola ko. Tivuvu tiawu mu bungu dia bilumbu bia ku matu ngolo tiena yôka mu ntangu yi balongoka matieleka. Mpe Yehova mbo kabazoloko mu bungu ti mbo batatamanaka mu zonzela nkumbu’andi ni bu sa ti ba nuna bena.​—Tanga Mikunga 92:12-15.

4. Nti bilendi tindisa mpangi zeto za nuna?

⁴ Tala ti nuna ta nuna, bâ na lukwikulu ti Yehova mbo kabambukilaka tisalu ti wasala mu ntama. (Ebr. 6:10) Na luhemo lwalwansoni, wayizi yika moko mu tisalu tia samuna, mpe musamu wo nsayi wutâka kwe Tata’eto dia ku mazulu. Wayizi korela misamu miamingi mia mpasi​—ni bu sa ti mio mihemonaka mutima—​mpe wayizi tatamana mu sarila mitieno mia buderede mia Bibila, wayizi nata madema, mpe wayizi kubika bantu bakaka. Wayizi sarila ngolo zaku zazansoni mu yukunu na nsobolo zazingi za mu organizasio ya Yehova. Wayizi yika moko, mpe wayizi tindisa bantu bakaka bê mu tisalu tia ntangu zazansoni. Yehova nge katomono zolo mu bungu dia tifu tiaku tia kwikama. Yehova kanisini ti: “Ka yambirikaka bantu bê ba kwikama kwe Yandi ko”! (Mik. 37:28) Heni lukwikulu ti: “Tii bu lubâ na nsuki za mpembe, mbo niluyika moko.” (Iza. 46:4) Buna, kutâkandi ti mu bungu dia mvula zaku, kusiri’â mfunu ko mu organizasio ya Yehova. Nguria ntalu wena!

5. Ntia musamu bantu ba nuna bafweti lundaka mu mabanza mawu?

⁵ Bantu ba nuna balendi bâ salu mu organizasio ya Yehova mu mpila zazingi. Ni bu sa ti, kampe ka basâla na ngolo zazingi ko ntiana mu ntama, misamu miamingi bazebi mi balongoka tûka mivu. Yehova lendi tatamana mu ba sarila mu mpila zazingi, ntiana bu tumona wo mu bifwani bia ntama na bia mu ntangu yi.

6-7. Hana bifwani bie mu Bibila bia bantu ba nuna babaka tusakumunu twa Nzambi mu bungu dia kwikama kwawu.

⁶ Tulendi baka bifwani bia mbote mu Bibila bia bantu bayizi tomo sarila Yehova ku bununu. Mu tifwani, Mose wayizi bâ mbikuri ya Yehova kampe bu keri na mvula 80, mpe wayizi bâ ntwarisi ya bala ba Israele. Yehova  watatamana mu sarila mbikuri’andi Daniele, ni bu sa ti mvula kampe yôka 90 zeri nandi. Mpe ntumwa Za kampe mvula yôka 90 zeri nandi bu katsoneka mukanda wa Nzabukusu mu lubakusu lwa Nzambi.

⁷ Bisari biabingi biakaka bia kwikama bialembo tomo bâ bia zabakana, kampe ka waketi’â bâ musamu wa mpasi ko mu lembo ba kipa. Kâ, Yehova bawu keri kipaka mpe wasenda kwikama kwawu. Mu tifwani, Simeyo weri muntu wa sungama mpe weri tînaka Nzambi, ka batomo’â mu zonzelaka ko mu Bibila, kâ Yehova wazaba ka ntia mpila muntu weri, mpe wamuhana bweso bwa mona Yezu bu keri mwana bebe na mu bikula mu bungu dia yandi na nguri’andi. (Like 2:22, 25-35) Tadimbitileno mu mbikuri ya yikento Ane, weri mufwiri. Mvula 84 zeri nandi, kâ kani kabwe keri’â mangaka ko ku Tempelo. Yehova wamusakumuna mu bungu ti ku Tempelo keri vulu kwendaka, mpe wamuhana bweso bwa mona Yezu bu keri mwana bebe. Simeyo na Ane ntalu beri kwe Yehova.​—Like 2:36-38.

8-9. Ntia lubakusu mpangi za zikento ze mifwiri zihanaka?

⁸ Lumbu ti mpe, bisari biabingi bia kwikama bia nuna bie bifwani bia nkatika bia mbote mu bungu dia bantwenia. Tazonzeleno tifwani tia mpangi ya yikento ye na nkumbu Lois Didur. Mvula 21 kwa zeri nandi bu kayizi bâ mupasuri-nzila wa munene ku Canada. Ha manima, yandi na bakala diandi John bayizi yôkesa mvula zazingi mu tisalu tia tizunga. Ha manima bayizi sala ku Betele ya Canada mvula yôka 20. Lois bu kayizi bâ na mvula 58, yandi na John babalomba mu tambula dema dia môna ku Ukraine. Ngano nti basa? Ngano babanza ti batinunina mu kwe sala ku nsi yakaka? Bayizi tambula dema dio, mpe John wayizi bâ mu Komite ya Filiale ya ku Ukraine. Ha manima ma mvula 7, John wayizi fwa, kâ Lois wabonga nzengolo ya tatamana mu tisalu tiandi. Lumbu ti, bu kena na mvula 81, Lois mbo katatamanaka mu sala, mpe kanda dia Betele dia ku Ukraine yandi ditomono zolo.

⁹ Lumbu ti mifwiri ntiana Lois ka bavulu’â basilaka keba ko ntiana mu ntangu babakala bawu beri ba moyo; kâ ntalu bena. Yehova mbo katomo zoloko mpangi za zikento zayika babakala bawu moko tûka mivu mpe zitatamanaka mu mu sarila na kwikama kwakwansoni. (1 Tim. 5:3) Mbo batomo tindisaka ba twenia.

10. Ntia tifwani tia toma Tony katuhana?

¹⁰ Mpangi zazîngi za kwikama za nuna zibâka mu nzo zi bakipilaka bantu ba nuna ntalu mpe zena. Mu tifwani, mpangi yimosi ye na nkumbu Tony yibâka mu nzo ya mpila yo. Wabatusu ku Pennsylvanie, ku États-Unis, mu août 1942 bu keri na mvula 20. Ntangu fioti ha manima ma bateme’andi wabaka ntumunu ya kota mu l’armée. Kâ, mu bungu  ti wakala, bamutambika ku boloko mu kwe yôkesa mvula zole na ndambu. Yandi na mukento’andi, Hilda, basansa bala bole mu matieleka. Ha manima ma mivu, Tony wayizi bâ surveillant-président mu bimvuka bitatu (lumbu ti mbo batâka ntwarisi ya timvuka tia bakuluntu) mpe wayizi bâ munkengi wa lukutakanu lwa tizunga. Mbo keri twarisaka ndongokolo za Bibila ku boloko. Bu kayizi bâ na mvula 98, Tony watatamana mu sala mu bungu dia Yehova. Mbo katatamanaka mu sa miamiansoni mi kalenda mu sarila Yehova na mu sala tintwari na timvuka!

11. Bwe tulendi songela ti mpangi za nuna zibâka mu nzo zi bakipilaka bantu ba nuna ntalu zena kwe beto?

¹¹ Ngano bwe tulendi songela ti mpangi za nuna zibâka mu nzo zi bakipilaka bantu ba nuna ntalu zena kwe beto? Tala ti wudelakane na lenda diawu, bakuluntu mbo bababakisaka mu kwiza ku tukutakanu peleko mu wirikila tukutakanu na mu samuna. Tulendi songela ti bawu tukipaka, bu tukwe ba tala peleko bu tubatâ mbila mu vidéoconférence. Tuzololo tasongela ti mpangi za nuna za tuzololo, ni bu sa ti nzo zi babakipilaka mala zena na timvuka. Tala ti ka tusiri’â keba ko, tulendi kwizi yambirika bantu bo ba nuna. Kwe bakaka, wulendi bâ musamu wa fioti peleko kâni mu zonzela misamu miawu. Kâ tulendi baka ndandu zazingi mu ntangu yi tupusana kwe bawu na yi tubawirikila bu batuzonzela nsayi na misamu mi babwabana na mio mu organizasio ya Yehova.

12. Ngano nti tulendi baka mu bimvuka bieto?

¹² Tulendi kwizi yituku mu mona bifwani bia mpangi za nuna za kwikama bie neto mu bimvuka bieto. Mpangi mosi ya yikento ya nuna ye na nkumbu Harriette wasarila Yehova na kwikama kwakwansoni tûka mivu mu timvuka tia New Jersey, ku États-Unis. Ha manima, waye bâ kwe mwana’andi wa wukento. Mpangi za timvuka tiandi tia môna babonga ntangu ya mu zaba, mpe bayizi bakula ti nguria ntalu kena. Wabatindisa bu kabazonzela binsamu bia tisalu tia samuna, mu ntangu yi kalongoka yandi matieleka mu mivu mia 1920. Mu ntangu yîna, mbo keri kwendaka ku tisalu tia samuna na brosse à dents mu sake’andi​—ngatu kanga kwa baketi mu kanga. Mu 1933, mbala zole bamukanga, mpe wayôkesa lumingu lumosi ku boloko. Mu ntangu yo, bakala diandi dialembo bâ Mbangi ya Yehova, mbo keri kipaka bala bawu ba batatu. Wa matieleka, mpangi za nuna mpe za kwikama ntiana Hariette, zifweti bâ ntalu kwe beto!

13. Ngano nti tulongokele mitariri mpangi za nuna mu organizasio ya Yehova?

¹³ Mpangi zeto za nuna nkatika mfunu zena kwe Yehova na mu oraganizasio’andi. Bayizi mona ka bwe Yehova kabasakumunina, mpe ka bwe kasakumunina organizasio’andi. Bayizi baka malongi ma mfunu mu makuba ma batâ. Bamwinakeno ntiana “biteko bia ndwenga,” mpe longokakeno misamu mi bazebi. (Bin. 18:4) Wamana bonga ntangu ya tomo kwizi ba zaba, timinu tiaku tilendi kwizi bâ nguria ngolo, mpe mbo kwizi longoka misamu miamingi!

14. Ngano Lubambu 32:7 nti yita tindisa bantwenia mu sa?

¹⁴ Bongaka ntangu ya zonzaka na mpangi za nuna. (Tanga Lubambu 32:7.) Kampe meso mawu ka masala tomo mone ko, ka basala kwe yende ntinu ko mpe malembe kwa bayika zonzaka. Kâ sala kwa batiri sala, mpe bayizi sala mu bâ na “nkumbu ya mbote” kwe Yehova. (Ekl. 7:1) Bambukaka ka mu bungu dia nti bê ntalu kwe Yehova. Tatamana mu ba songela ti  ntalu bena. Bâ ntiana Elize. Wasa fuki ngatu kabâ penepene na Eliya mu tilumbu tiawu tia mansukina. Elize mbala tatu katâ ti: “Ka nikubika ko.”​—2 Mit. 2:2, 4, 6.

15. Ntia biyuvu tulendi yula kwe mpangi za nuna?

¹⁵ Songela ti mpangi za nuna za tomo kipaka bu pusana kwe bawu na nsayi yayansoni. (Bin. 1:5; 20:5; 1 Tim. 5:1, 2) Bayula biyuvu ntiana: “Bu weri ntwenia, nti biakuhana lukwikulu ti matieleka wabaka?” “Misamu mi wabwabana na mio bwe miasila ti watomo pusana kwe Yehova?” “Nti biakubakisa mu tatamana mu bâ na nsayi mu tisalu tia Yehova?” (1 Tim. 6:6-8) Ha manima ba wirikila bu bazonzela tinsamu tiawu.

16. Bwe timoko tia mpangi ya nuna na ya ntwenia tilendi ba natina ndandu ba bole?

¹⁶ Mu ntangu mpangi ya nuna yizonzaka na mpangi ya ntwenia, ba bole ndandu babakaka. (Rom. 1:12) Mpangi za ntwenia, mbo lukwizi tomo bâ na lukwikulu ti Yehova kanda diandi kakipaka, mpe mpangi ya nuna mbo yikwizi mona ti yandi bazololo. Mbo kabâ na nsayi ya ku zonzela tusakumunu twatûka kwe Yehova tu kabaka.

17. Mu bungu dia nti tulendi têla ti mpangi zeto za nuna za kwikama mbo zikwizi tomo bâka za toma ha manima ma mivu?

¹⁷ Bu kwe yôke mivu, butoma bwa muntu mbo butsungaka, kâ bô bê ba kwikama kwe Yehova mbo bakwizi bâka nguria batoma ha meso mandi. (1 Tes. 1:2, 3) Mu bungu dia nti wena musamu wa matieleka? Mu bungu ti mu ntangu yeri kwe yôke mivu, babika mpeve ya Nzambi yabakubika mpe yababakisa mu kurisa bifu bia mbote. Bu tubonga ntangu ya tomo zaba mpangi zeto za nuna, ya ba kembesa na ya longoka mu tifwani tiawu, mbo tutomo mona ti ntalu bena!

18. Ngano nti tuzonzela mu timoko tita landa?

¹⁸ Timvuka mbo tikwizi tomo bâka ngolo mu ntangu mpangi za ntwenia zizoloko mpangi za nuna, kâ mpe mu ntangu mpangi za nuna zizoloko mpangi za ntwenia. Mu timoko tita landa mbo tuzonzela mpila mpangi za nuna zilendi songela ti mpangi za ntwenia ntalu zena mu timvuka.