Ntumwa Paulo watsoneka kwe Bakristo ba ku Tesalonike, bu katâ: “Tala ti muntu ka wuta tumamana misamu mi tutêle mu mukanda wu ko, mu sileno nsimu.” (2 Tes. 3:14) Mu ntama, bakuluntu lenda dia bâ nawu dia sa tinzonzi tia ndwengosolo mu sungika muntu weri lembo zitisaka malongi ma Zu dia Nzambi mu timvuka. Ha manima, bisamuni ka biaketi’â vutu bâka tintwari na muntu wu basila nsimu ko.

Kâ tufweti sa nsobolo. Diangana, malongi ma Paulo musamu mazonzelaka wufweti yirika muna Mukristo tintwari na misamu miakaka. Buna, ka wufwanane’â ko ti bakuluntu basa tinzonzi tia ndwengosolo mu sila muntu nsimu. Ngano nsobolo ya nti? Tatala misamu mizungiriri malongi ma Paulo.

Paulo watâ ti bantu bakaka mu timvuka babâ na “ndiatulu ya vwandi.” Bawu, ka beri’â zitisaka malongi ma Nzambi ko. Mu vizite’andi yatêkela, yandi wahana ntumunu yi: “Tala ti muntu ka wuzololo’â ko mu sala, ka diandi mpe.” Kâ, bantu bakaka beri kalaka mu sala mu lungisa nsatu za zawu, ni bu sa ti lenda diabâ nawu. Misamu mia bantu bakaka mpe beri kotaka. Bwe Bakristo baketi bongela bantu babâ na vwandi?—2 Tes. 3:​6, 10-12.

Paulo watâ: “Mu sileno nsimu.” Ntêlo ya Greke yi basarila yilendi zolo tâ tomoeno sa keba mu muntu wo. Paulo, ka kwe bakuluntu’â ko kwa kahana malongi mo, kâ kwe bantu babansoni mu timvuka. (2 Tes. 1:1; 3:6) Buna muna Mukristo waketi mona ti Mukristo wakaka weri lembo zitisaka malongi ma Nzambi wafweti sola mu “lembo vutu bâ na” muntu wo we na vwandi.

Ngano wuzololo tâ ti muntu wo, ntiana muntu wu bakatula mu timvuka beri mu bongelaka? Kâni, mu bungu ti Paulo wavutu tâ: “Tatamaneno mu mu semba ntiana mpangi.” Buna muna Mukristo mbo waketi tatamana mu bâ tintwari na muntu wo mu tisalu tia samuna na ku tukutakanu, kâ mbo waketi sola mu lembo bâ na yandi mu misamu miakaka ntiana nsaka. Mu bungu dia nti? Paulo watâ: “Ngatu kafwa nsoni.” Bu bamana mu sila nsimu, Mukristo we na vwandi wulendi fwa nsoni mpe lendi soba ndiatulu.—2 Tes. 3:​14, 15.

Bwe Bakristo balendi sarila malongi mo lumbu yi? Ntete, tufweti bâ na lukwikulu ti ndiatulu yo ya nkatika ya “vwandi” yena, ntiana bwa tâ Paulo. Yandi keri’â zonzelaka bantu bê na ngindu ya swaswana na ya beto ko, peleko balandaka misamu mi bazololo. Mpe keri’â zonzelaka bantu batufwemesaka ko. Kâ, Paulo bantu beri solaka mu lembo zitisa malongi ma mbote ma hanaka Nzambi keri zonzelaka.

Lumbu ti, tamana mona Mukristo we na ndiatulu ya bukolo ya mpila yo, a mbo tubonga nzengolo ya lembo vutu bâka na yandi bu tuvukanaka na bantu bakaka peleko bu tusaka nsaka. Mu bungu ti nzengolo yena yi tufweti bonga beto beni, ka tufwetiʼâ tazonzela musamu wo ko, tala ti ka bantu ba kanda dieto’â ko. Mpe mbo tutatamana mu bâ na muntu wo ku tukutakanu na mu tisalu tia samuna. Bu kasoba ndiatulu, buna mbo tu kârila tindiku tia delakana.