Bibila ditêle ti Nzambi zololo ti bantu “[babika] bunsuza bwabwansoni.” (1 Bisi-Tesalonike 4:3) Mu Bibila, ntêlo ya “bunsuza” yizololo tâ bunsuza mu makwela, tipede, na vukasa nitu kwa bantu balembolo ba kwelana.

•  Longo lwa bantu balembolo ba kwelana peleko ba kwelana mu bungu dia ti we musamu wa mfunu kwe Nzambi?

•  Bwe ta banza mu longo lwa lembo makwela mu zaba tala ti mbo bu bâ?

•  Bwe bantu ba kwela balendi bêla na longo lwa ngolo?

•   Makwela kwe Nzambi matûka. Yandi wabatika makwela bu kakwelesa bantu ba ntete. (Mbatukulu 2:22-24) Ka waya’â ko ti mukento na bakala basa longo lwa lembo makwela.

•   Nzambi zebi mio mi yôkele bubote mu bungu dia bantu. Nzambi wawaya ti makwela mavukasa mukento na bakala luzingu lwalwansoni ngatu makengerela mpe manata ndandu kwe kanda diadiansoni. Tabongeno tifwani. Mitieno mi tu hanaka Nzambi mie ntiana mitieno mi hanaka muntu wusalaka mfulu. Mitieno mi kahanaka mbo mibakisa mu tomo vukasa mabaya ma mfulu, mpila mosi mpe mitieno mia Nzambi beto mibakisaka mu bâ na kanda die mu bumosi. Mitieno mi tulombaka Nzambi mu landa, mu bungu dia mbote’eto kwa mi bâka.​—Izaya 48:17, 18.

•   Vukasa nitu ntete makwela kulendi nata mpasi zazingi. Mu tifwani, zimi di balembo waya, timbevo tisambukilaka bu bavukasaka nitu, peleko tiari tia ngolo. a

•   Vukasa nitu kabu diena dia Nzambi kwe mukento na bakala ngatu babutana. Kwe Nzambi luzingu lwa longo lwena, buna lenda dia buta kabu dia ntalu diena. Nzambi zololo ti tahana kabu dio buzitu bu tusarila dio na muntu wuta kwela. Mpila yena yazitisa makwela.​—Bahebre 13:4.

 Mu lenda makwela ka wena’â ko ti tatoko “yêla” mboko mbo tahonda mo tala ti tuzololo. Kâ longo mbo lukwizi bâka ngolo, mukento na bakala bu batomo tihanaka mpe bu basaka ngolo mu yirika misamu ba bole. b Makwela mbo masaka ti longo lwabâ ngolo.​—Matie 19:6.

 Ka kwena makwela ma lunga ko. Kâ bantu ba kwela balendi bâ na longo lwa ngolo tala ti basariri malongi ma hanaka Bibila. Mu tifwani:

•   Banzila mpwana’aku, ntete wabanzila nge beni.​—1 Bisi-Korente 7:3-5; Bisi-Filipe 2:3, 4.

•   Kurisa luzolo na buzitu mu mpwana’aku.​—Bisi-Efeze 5:25, 33.

•   Longoka mu zabirila nzonzolo’aku.​—Bingana 12:18.

•   Bâ na luvivululu mpe bâ na manzangu ma lemvokela.​—Bisi-Kolose 3:13, 14.