Bibila beto ditindisaka mu hanaka mu mutima wumosi na mu mabanza ma delakana. Bibila beto disongelaka ti bubote wusaka kwe wô ta bwana kabu, kâ mpe, na kwe wô ta hana. (Bingana 11:25; Like 6:38) Yezu watâ: “Kâba kuyôkele nsayi na baka.”​—Bisalu 20:35.

•  Ntia ntangu lukabu lunataka ndandu?

•  Ntia ntangu lukabu lulembo delakanaka?

•  Verse za Bibila zitariri lukabu

 Nzambi zololo wô hanaka mu mutima wumosi. Bibila ditêle “Muna muntu kasa buna bu kakubikiri mu mutima’andi, ka mu mitima miole’â ko peleko ka bamutumandi, mu bungu ti Nzambi zololo wô hanaka na nsayi.”​—2 Bisi-Korente 9:7, note.

 Mu “dibundu” di tambulaka Nzambi, lukabu lwa mutima wumosi mfunu lwena. (Zaki 1:27, note) Muntu wuhanaka lubakusu na lukabu, tintwari wusalaka na Nzambi, mpe kwe Nzambi, nsalulu zandi za mbote mbo zibâ ntiana mfuka. (Bingana 19:17) Bibila dilongesaka ti Nzambi yandi beni mbo kakârisa mbote we na lukabu, bu kamusenda.​—Like 14:12-​14.

 Bu basaka makabu na mabanza ma bwimi. Mu tifwani:

•   Mu timonekesa ha meso ma bantu.​—Matie 6:2.

•   Mu baka ndandu ha manima.​—Like 14:12-14.

•   Mu yêla mu baka mvukulu.​—Mikunga 49:6, 7.

 Bu basaka makabu masingasaka bisalu na ndiatulu zi yinaka Nzambi. Mu tifwani, bubi bwena mu hana mbongo kwe muntu ngatu kabula nsaka za mbongo, kanwa bima ngolo peleko malavu mamingi. (1 Bisi-Korente 6:9, 10; 2 Bisi-Korente 7:1) Mpila mosi, ka bwena bubote ko mu hana mbongo kwe muntu we na lenda dia sala mu baka mbongo, kâ wuta kala mu sala.​—2 Bisi-Tesalonike 3:​10.

 Bu basaka makabu makabakasaka mu kipa kanda. Bibila dilongesaka ti mfumu-kanda zifweti kipaka makanda mawu. (1 Timote 5:8) Ka wubâ musamu wa mbote ko tala ti heni bima biabingi kwe bantu bakaka mpe yambirikiri kanda diandi. Mpila mosi, Yezu wasemba bô bakalaka mu kipa bibuti biawu bia nuna mu bungu ti bio bie nawu “kabu diena di batihanina kwe Nzambi.”​—Marke 7:​9-​13.