Kâni, mabundu mamansoni ka mena mpila mosi ko. Mu Bibila bifwani biabingi bie mô bia mabundu mavwezaka Nzambi. Mabundu mango mu bikunku biole bia nguri mena.

Tikunku 1: Mabundu masambilaka nzambi za bungungu

 Bibila nzambi za bungungu dizonzelaka ntiana “bungungu,” “mpamba,” na “tima tilembolo salu.” (Yeremi 10:3-5; 16:19, 20) Nzambi, Yehova a kwe kanda dia Israele kalomba ti: “Kufweti’â wabâ na nzambi zakaka ko ha meso mani.” (Ndukulu 20:3, 23; 23:24) Bala ba Israele bu basambila nzambi zakaka, “Yehova wadasuka.”​—Lutangu 25:3; Levitike 20:2; Mfundisi 2:13, 14.

 Nzambi ni bo kwa kabongelaka nsambululu kwe bô “ba batâka nzambi.” (1 Bisi-Korente 8:5, 6; Bisi-Ngalate 4:8) Yandi walomba kwe bô beri dingaka mu mu sambila mu bika mu vukana na bô bê na nsalulu za mabundu ma bungungu, bu katâ: “Dukeno ha kati diawu, mpe hambaneno na bawu.” (2 Bisi-Korente 6:14-17) Tala ti mabundu mamansoni mpila mosi mena, mpe kwe Nzambi manataka, mu bungu dia nti Nzambi kahanina ntumunu yo?

Tikunku 2: Mabundu masambilaka Nzambi ya matieleka mu mpila yi kalembo tambulaka

 Ntangu zakaka, bala ba Israele Nzambi beri basambilaka mu nkwikulu na mu nsalulu za nsambululu ya nzambi za bungungu. Kâ Yehova wakala bu beri vukasaka nsambululu ya matieleka na ya bungungu. (Ndukulu 32:8; Lubambu 12:2-4) Yezu wasemba mfumu za mabandu beri sarilaka bumbaki mu ntangu’andi, mu bungu dia mpila yi beri sarilaka Nzambi. Ha meso ma bantu beri songelaka ti ba kwikama beri kwe Nzambi, kâ beri “vwezaka misamu mia nguri mia Musiku, wuzololo tâ buderede, bulemvo na kwikama.​—Matie 23:23.

 Mpila mosi mpe bwawu bu, dibundu kwa disikanaka mu matieleka dinataka bantu kwe Nzambi. Matieleka mango mu Bibila mena. (Za 4:24; 17:17; 2 Timote 3:16, 17) Mabundu malongesaka misamu mitelamanaka Bibila, bantu mahambasaka na Nzambi. Ndongosolo zazingi bantu zi babanzaka ti mu Bibila zatûka​—ntiana butatu, tilundi tilembo fwaka, benga dia tiya​—mu nsambululu za nzambi za bungungu zatûka. Nsambululu yisingasaka ndongosolo zo “ka yena salu ko,” peleko ya mpamba yena, mu bungu ti ntumunu za Nzambi yiyingasaka mu bikulu.​—Marke 7:7, 8.

 Nzambi bungungu kayinaka. (Tite 1:​16) Mu bakisa bantu mu pusana kwe Nzambi, dibundu difweti sobesa luzingu lwawu, ka zonza kwa mpamba ko kwa. Mu tifwani, Bibila ditêle: “Tala ti muntu tisari tia Nzambi tiena, kâ ka zabirilaka ludimi lwandi ko, mutima’andi kata huna, mpe nsambululu’andi ya mpamba yena. Nsambululu ya verela mpe yilembolo mvindu ha meso ma Tata’eto Nzambi ni eyi: sarisa bala ba nsana na bamâfwawu mu mpasi zawu, mpe lembo yola kani tona dia nza.” (Zaki 1:26, 27; note) Bible du roi Jacques ntêlo ya “dibundu dia verela” yisarilaka mu bungu dia nsambululu ya bunkete na yikondolo bungungu.