“Ringani ni é longaddi ná kpa.” (Ebr. 5:12) Addinga di! Yova​—bblo pli adi longaddi dz’ djolu gble ná ke ko nzi ko ddi longa ndrŭ dho ndi djo! Longa le ddi Yova djo familia nǎ, kutaniko nǎ inga lod’radha dhi njí kana ná føri kʉ bblo pli kʉ ná pendeleo ndirigoti bbo pli kʉ ná njí. Nde ko ká ka ko njí fø njí bblo ngbaribbai?

Fø logoti bani mutume Paulo ndingʉe Timoteo dho ná i lo nǎ: “Ara anzi bbʉ ni ni bbʉ ngazødha ma, lod’radha ma, longaddidha ma na dho nari na.” Paulo pongʉeri ki: “Ni njiri fø nari na ni si ni nganga gø ndirigoti ni ddi ná lo rr ná ndrŭ ma na.” (1 Ti. 4:13, 16) Nidhó kʉ, ndrŭ dhó shinga ka ndi gø ná imba. Føri dho, ri kʉ bblo ni njí kpakpanga ni thɨ nidhó ngazødha ma, longaddidha ma na thika. I broshua le thɨ ndiro ri kó ni tsotso fø chu nǎ d’e. Akonja ri nǎ kʉ ná lo ro di.

Yova kʉ “Longaddi ná Bboke.” (Isa. 30:20) Ngbà mai i broshua ka ndi kó ni tsotso ni é bblo ngazø ná ke ndirigoti bblo longaddi ná ke ro, anonga nari kʉ ko d’ra ná imba adi si Yova dhó ro ndirigoti ke i adi ndrŭ drr bbʉbbʉlo kana. (Yoh. 6:44) Føri dho adi sala nji bí ina ndiro ni ba roho takatifu d’e. Adi njinji Mungu dzá lo na bí ina. Adrr ndrŭ dhó nganjadha Yova djo nga ni djo ri. Anji kpakpanga ni liri nidhó lo rr ná ndrŭ ji Yova ndima thí nǎ ro krʉ.

Ni dho bbʉni ni d’ra nari kʉ nzá ro le d’erie bbʉ ndrŭ dho ná imba. Ko uri u nari kʉ, njati ni li ni thí “Mungu bbʉ ná kpakpanga djo” ró, ni ka ni njí fø njí bblo pli.​—1 Pe. 4:11.

Ni lai longaddi ná kpa,

Yova dzá Dimu dhó Lo dho chutso ddá ná Baraza