1. Cho 1935 na dangʉe ná Asamble nǎ le bbʉngʉe ná hotuba ká løngʉe ddikpa jaddake ronga ngbaribbai?

DDIKPA jaddake bangʉe batiso 1926 na ná saa na, ke dho cho ngʉe 18. Kedzá gødhi nrŭ ngʉ Biblia zø Yova dzá Dimu na, fø saa na le ngʉ kpa nzi Wanafunzi wa Biblia. Fø gødhi nrŭ dho ngʉe kpetsinzø 3 ndirigoti sinzønzø 2 kpa ddingʉe longa fø nzø dho nja kpa nji njí Yova dho, ndirigoti nzø dyø Yesu Kristo d’e. Wanafunzi wa Biblia ngʉ adi rinji nari bbai, fø jaddake ngʉ adi mukati nyo ndirigoti divai jø krʉ cho ro Ukumbusho dhi saa na. Kedhó ngab’odha thika lengʉeni le i djǒ ripo ná hotuba ndi rrngʉe ná saa na, “Birobiro kʉ ná na nrŭ” (Umati mukubwa). Fø hotuba le-djo J. F. Rutherford bbʉngʉe 1935 na, Washington, D.C., U.S.A. nǎ dangʉe ná ddikpa Asamble nǎ.

2. Le-djo Rutherford ká tungʉe ngba ø bbʉbbʉlo nanga ndidhó hotuba nǎ?

² Fø hotuba nǎ le-djo Rutherford d’rangʉe “birobiro kʉ ná na nrŭ” (King James Version), ka kʉ ie ma nari Ufunuo 7:9 tilo ndi djo ro. Kpø fø saa djo, Wanafunzi wa Biblia ngʉ riddi nari kʉ birobiro kʉ ná nrŭ kʉ ra nǎ si ra ná kpa dhó sehemu ya pili, sese ndima dho udha kʉ ro. Le-djo Rutherford d’rangʉeri Maandiko chulú nari kʉ, birobiro kʉ ná nrŭ nga kʉ ra nǎ si ra ná kpa ri, ro ri kʉ  * “ziki kubwa nǎ ro si gø” ná nrŭ, ndirigoti fø nrŭ si di choro nŭnŭ i dz’ djo. (Ufu. 7:14) Yesu tsongʉeni i:  “Ma kʉ nja chembø na maddi nga ndima kʉ i kala nǎ ro, fø chembø dho ringani ma ddá chutso ndirigoti kpa si ma chu rr, kpa si ngʉ ddikpa kundi, ddikpa ke si rø ri ro.” (Yoh. 10:16) Fø kundi kʉ Yova dzá Dimu kana chí tøni ná kpa, ndirigoti kpa kʉ ngab’odha na ndima ka si di dz’ djó paradiso nǎ theinga dho. (Mt. 25:31-33, 46) Akonja ngbaribbai ma fø ø mwangaza løngʉe Yova dzá Dimu ronga nari, føri tsu ndi nǎ nari kʉ 18 dhó cho ngʉe ná fø jaddake maddi.​—Zb. 97:11; Mez. 4:18.

3-4. Cho 1935 na dangʉe ná Asamble nǎ, bí kʉ ná Yova dzá Dimu ká famungʉe ngba lo ndima dhó ngab’odha djo, ndirigoti addudho?

³ Fø Asamble nǎ bbo thongʉe nga nari ngʉe hotuba e bbʉ ná ke pongʉeri i nrŭ dho ná saa: “Njati ddikpa le churi ndi kʉ dz’ djó le kasi di ná ngab’odha na ró, kirikiri le dani røna” Fø Asamble nǎ ngʉe ná ddikpa le-djo pongʉeri, dada 10 000 djolú ná nrŭ dangʉeni røna. Le-djo Rutherford pongʉeri: “Anja! Birobiro kʉ ná nrŭ!” Føri goti nrŭ njingʉe hwè bbo. Røna dangʉeni ná nrŭ rangʉe ri utso d’i nari kʉ, ndima nzá vʉni ra nǎ nga dho ri. Kpa chungʉeri ndima nzá le d’ri che na ri nja ndimae Mungu dzá kiroho nǎ nzø d’e. Fø Asamble dzá ddo ya pili dyina 840 kʉ ná nrŭ bangʉe batiso, fø nrŭ kana bí kʉ nari ngʉe nja kʉ ná chembø.

⁴ Fø hotuba goti anziro djo ko tielo ná jaddake ma, nja bí kʉ ná nrŭ kpari ma na bbangʉe Ukumbusho dhi saa na ndima e mukate ma nyo, divai ma jø nari tso bba. Bí kʉ ná nrŭ rrngʉe ndima ddikpa nyenyenga kʉ ná le-djo bbai, i ndi pongʉeri ro: “1935 na dangʉe ná Ukumbusho nǎ ma nyongʉe mukati ndirigoti ma jøngʉe divai ya mwisho. Ma rangʉe ri utso d’i nari kʉ ma nzá Yova vʉ ndidhó roho takatifu chulú ra nǎ nga dho ri, ro fø nga ringana ma kʉ na ná ngab’odha kʉ ma ka si di dz’ djó paradiso nǎ theinga dho.” (Ro. 8:16, 17; 2 Ko. 1:21, 22) Fø nga djó ro birobiro kʉ ná nrŭ dhó hesabu adi ra anzi, ndirigoti kpa njí nji ddinga che na le d’ri ná shi kʉ njʉ ná kpa ma na. *

5. Yova dhó nganjadha kae ngbaribbai bbabba mukati nyodha ma divai ma na jødha tso ná nrŭ djo?

⁵ Yova dhó nganjadha kae ngbaribbai 1935 goti bbangʉe mukati nyodha tso, ndirigoti divai jødha tso ná nrŭ djo? Ri ká ka ndie ngba njati ddikpa Yova dzá Dimu di mukati ma nyo, ndirigoti divai ma jø, ro luti le ra ri utso d’i ndi nzá le d’ri che na føri dho ro? (1 Ko. 11:28) Nja kʉ ná kpa ngʉ adi mukati ma nyo, divai ma jø dhonalo kpa nzá chungʉe ndima kʉ na ná ngab’odha ro ri. Ro njati kpa rá ri utso d’i ndima nji kosa mukati ndimae nyo, ndirigoti divai ndimae jø nari na ndirigoti kpa jiri ndima nji njí Yova dho ró, kpa tso ka ndi uni u nja kʉ ná chembø kana. Ngbamai kpa ra ri famu nari kʉ ndima nzá ka ndima nyo mukati, ndirigoti ndima jø divai ri ro, kpa adi si ngodhé Ukumbusho dhi ngana dhonalo kpa adi Yova ma Yesu ma na njingʉe ndima dho nalo nja mana bbo.

6. Yesu ká jangʉe ngba lo malaiká dho?

⁶ Ziki kubwa si si ná ddo kʉ chøchø nari dho, ri kʉ bblo ko chu lo Ufunuo sura 7 po che na le d’ri ná Wakristo djo, ndirigoti birobiro kʉ ná nja chembø djo nalo. Yesu pongʉeri malaiká lø tho ngala djo ro si ná ngasadha dhi vʉvʉ tso. Kpa nzá ka ndima bba fø vʉvʉ sa nga ri kpø che na le d’ri ná kpa tso ro le du kashe, ndirigoti kpa tso uni Yova na ná nga djo. (Ufu. 7:1-4) Fø chí tøni ná kpa si ba ná ledha kʉ, kpa kasi pinyo Yesu ma na ra nǎ, ndirigoti ndimae kuhani. (Ufu. 20:6) Yova ma, Yesu ma, malaiká ma na ka sie hwè na bbo, 144 000 kʉ ná kpa ka si ndima dhó ledha ba ra nǎ nari ndima ka si nja ná saa na.

7. Ufunuo 7:9, 10 nǎ, ká le dhongʉe ngba nrŭ Yohana dho, ndirigoti fø nrŭ ká ngʉ addu nji? (Anja ri chuti kʉ na ji.)

⁷ B’lo ndi nja 144 000 kʉ ná pikpa ndirigoti kuhani nari goti, Yohana njangʉe “birobiro kʉ ná nrŭ” Armagedoni nǎ ro ndima gø ro. Ya pili kʉ ná kundi nǎ nrŭ kʉ bí, ya kwanza kʉ ná kundi nǎ nrŭ djolú. (Azø Ufunuo 7:9, 10.) Kpa njøngʉe “sau kanzu”, fø kanzu na mana kʉ kpa die “tse ndima tse ro” Stani dzá i dz’ djó ndirigoti kpa tøeni chí Yova ma dho Yesu ma na. (Yak. 1:27) Kpa ngʉ høhø Yova ma Yesu ma na nji ndima gødha dho nalo dho, kpa ngʉe che bi na ndima tho thi hwè na ndima kʉ ro. Dhonalo kpa chueri Yova li Yesu ndie pi.​—Anja Yohana 12:12, 13.

8. Ufunuo 7:11, 12 ká ngba lo po ko dho Yova dzá ra nǎ famiye djo?

⁸ Azø Ufunuo 7:11, 12. Ra na ká ngba lo bangʉe nga? Yohana nja Yova dzá ra nǎ famiye krʉ hwè na, dhonalo birobiro kʉ ná nrŭ kʉ Mungu njí ndirigoti nrŭ Mungu má nari dho. Yova dhó ra nǎ famiye sie hwè na ndima ka si Yohana njangʉe ná følo ndirigoti birobiro kʉ ná nrŭ gø ziki kubwa nǎ ro nari nja ná saa na.

9. Ufunuo 7:13-15 ri po nari bbai, birobiro kʉ ná nrŭ ká ngba lo nji njʉ?

⁹ Azø Ufunuo 7:13-15. Yohana ndingʉeri, birobiro kʉ ná nrŭ “ʉe ndima ro kanzu, ndirigoti kpa liri ndie sau chembø dzá ngba jù na.” Føri na mana kʉ kpadhó zamiri tsetse ndirigoti kpa tøni chí Yova dho. (Isa. 1:18) Kpa kʉ Mungu dho bbʉ ndima batiso chulú ná Wakristo, kpadhó udha kʉ kpakpa Yesu djo ndirigoti kpa kana nga kʉ chøchø Yova na. (Yoh. 3:36; 1 Pe. 3:21) Føri dho kpa kaka ndima tøni Mungu dhó thinga nji ndirigoti ndima njí “takatifu kʉ ná njí kuna ma, dyina ma” dz’ djó, kedhó hekalu la kiroho nǎ. I ddoro maddi kpa adi Mungu dhó pidhinga li anziro lod’radha dhi njí ndirigoti longa ndima di bidii na nári chulú.​—Mt. 6:33; 24:14; 28:19, 20.

10. Birobiro kʉ ná nrŭ ká u ngba lo, ndirigoti kpa ka ngba tsodha si njini nari b’o?

¹⁰ Ziki kubwa nǎ ro si gø ná nrŭ si ri u nari kʉ Yova si ndima ronga b’ob’o dhonalo “pidhinga dhi thinga djó di ná ke si ndidhó hema li kpa djo.” Bbʉbbʉ dhé nja kʉ ná chembø b’o ná fø tsodha si njini nji: “[Mungu] kasi kpa nyodda njʉ krʉ, ndirigoti dhe ro ka sie nga, le iso le pi nari ro ka sie nga, hø le hø nari ka sie nga ndirigoti le ronga ndi nari ro ma kasie ngaddi.”​—Ufu. 21:3, 4.

11-12. (a) Ufunuo 7:16, 17 ridho naribbai, birobiro kʉ ná nrŭ ká ngba ledha b’o? (b) Nja kʉ ná chembø ká ka ndima nji addu Ukumbusho dhi saa na, ndirigoti addudho?

 ¹¹ Azø Ufunuo 7:16, 17. Njʉ Yova dzá nja kʉ ná njí dhi kpa adi nzani ù dzá lodho, dhonalo kpa dho nga kʉ mbø ri, inga là dzá lodho. Nja kʉ ná kpa kʉ prizo nǎ ndima dhi udha djó. Nimai ri kʉ fø ro birobiro kʉ ná nrŭ kʉ hwè na dhonalo kʉ, kpa churi Stani dhó i dz’ si sadha ba nari goti ndima kasi kimwili nǎ nyǒ ma ba, kiroho nǎ nyǒ ma na bbo. Yova kasi Stani dhó i dz’ sa ná saa na, ke si rili birobiro kʉ ná nrŭ ronga b’oni b’o ndidhó thø ró. B’lo ziki kubwa da nari goti Yesu si chutso dda “gøgø ná nrŭ” dho nja ndima ba “shinga dhi dda” d’e. Addinga i lo djo: Birobiro kʉ ná nrŭ kʉ bblo kʉ ná ngab’odha na, njaro fø kpa ki ro nzɨ kasi dhe vi ri!​—Yoh. 11:26.

¹² Nja kʉ na chembø kʉ bblo kʉ ná ngab’odha na, nari dho kpa adi mbai po Yova ma dho Yesu ma na! Nzá mai kpa le vʉ ndima ra di ra na ro, Yova ji kpa krʉ ddiddi. Fø kpa krʉ dho ringani ndima bbʉ madha Mungu ma dho Kristo ma na. Føri kpa ka ndima nji Ukumbusho dhi ngana ndima si nari na.

13-14. Ko krʉ dho ká ringani ko di si Yesu dzá dhe nga le no ná ngana addudho?

¹³ Krʉ choro, rie 1 000 nrŭ si Ukumbusho dhi nga na ri ro, fø nrŭ kana ro mukati ma divai ma na adi jø ná nrŭ dhó hesabu ngae bí ri. Føri ridho dz’ djólú gble bí kʉ ná kutaniko lú, bí kʉ ná nrŭ nzɨ adi mukati ro nyo ndirigoti divai ro jø Ukumbusho dhi saa na ri. Føri ridho nari kʉ Ukumbusho dhi ngana adi si ná bí kʉ ná nrŭ kʉ ngab’odha na ndima kasi di dz’ djo. Nde Ukumbusho dhi ngana ká kpa adi si addudho? Kpa adi si Ukumbusho na ddiddi ddikpa ke ka ndi si ndidhó kau dhó ndoa dhi ngana naribbai. Ndoa dhi ngana nrŭ adi si ndima ji ndoa chi ná nrŭ ji ndirigoti ndima ji ndima kó kpa tsotso nari dho. Føri bbai nja kʉ ná chembø adi si Ukumbusho dhi ngana ndima ji Yesu, ndirigoti ra nǎ si ra ná kpa nari dho. Nja kʉ ná chembø adi si Ukumbusho dhi ngana dho ná nja lo ki kʉ, kpa adi Yesu  bbʉngʉe ndi bbʉdha ná føri nja mana na bbo, ndirigoti kpa churi nari kʉ fø bbʉdha chulú ndima si choro nŭnŭ di ná shinga ba dz’ djo.

¹⁴ Nja kʉ ná chembø adi si Ukumbusho dhi ngana dho ná nja lo ki kʉ, kpa adi ri ji ndima dyø Yesu bbʉngʉe na yadha. Yesu ma ka ndidzá dhe nga no ndi unakpa na ná saa na, ke pongʉeri: “Anidi rinji fø ma nga nodha dho.” (1 Ko. 11:23-26) Føri dho nja kʉ ná chembø ka ndima no Yesu dzá dhe nga godhé rie go che na led’ri ná kpa kʉ dz’ djó ri ro. Ndirigoti nja kʉ ná chembø adi nja kʉ ná nrŭ nzi nja ndima no Yesu dzá dhe nga ddinga d’e.

15. Ko ká ka ko má Yova ndirigoti Yesu ngbaribbai Ukumbusho dhi nga na?

¹⁵ Ukumbusho dhi ngana ko adi madha bbʉ Mungu ma dho Yesu ma na dyi chulú ndirigoti sala chulú. I cho dhi Ukumbusho dhi hotuba djǒ si ripo “Anja Yova ma Yesu ma na nji ni dho nalo mana na bbo!” Føri ka ndi liri ko po bbai bbo Yova ma Yesu ma na dho. Ukumbusho dhi saa na, le si da mukati na ndirigoti divai na ko nji lú, føri si rili ko no​—Yesu ndí nga ndirigoti ke jù nga. Føri si rili ko nonga nari kʉ Yova ungʉe ndidzá ngba tso ndi dhe ko djotsina ndiro ko kasi choro nŭnŭ di ná shinga ba d’e. (Mt. 20:28) Ngba ji kodhi ra nǎ Baba ndirigoti kedzá ngba ná nrŭ krʉ adi ri u ndima si Ukumbusho dhi nga na.

16. Nja kʉ ná chembø ma ká kʉ che na le d’ri ná kpa ma na ddiddi ngbaribbai?

¹⁶ Yova adi fø kpa krʉ nja ddiddi. Ke nzá ji che na le d’ri ná kpa i pli nja kʉ ná chembø djolú ri. Følo ko chu dhonalo kʉ ke bbʉngʉe ndidzá ngba nja ndi ø che na le d’ri ná kpa ma, nja kʉ ná chembø ma na ddinga. Ro kpa kʉ na ná ngab’odha kʉ njonjo. Kpa krʉ dho ringani ndima tøni chí Yova ma dho Yesu ma na. (Zb. 31:23) Ndirigoti anonga nari kʉ Yova dzá roho takatifu ka ndi nji njí fø kpa krʉ djo. Føri na mana kʉ Yova ka ndi bbʉ ndidhó roho takatifu kpa krʉ dho kpa dho lo ji naribbai, kpae nja chembø ma inga che na le d’ri ná kpa ma ró.

17. Go kʉ shi ná che na le d’ri ná kpa ka ngba lo b’o?

¹⁷ Che na le d’ri ná kpa nzá gøni ra nǎ nga dhi ngab’odha na gø ri. Føri kʉ Mungu bbʉ kpa dho ná ngab’odha. Fø ngab’odha djo kpa adi ngaddi, kpa adi sala nji, ndirigoti kpa adi ndima dhó ra nǎ ledha ndima si ba nari b’o. Kpa nzá chu ndima ndí kiroho nǎ ri kasi di ngba ma nari ri. (Flp. 3:20, 21; 1 Yo. 3:2) Ni mai  ri kʉ fø ro kpa ri b’o ndima si nju Yova na, Yesu na, malaiká na, ndirigoti nja kʉ ná che na le d’ri ná kpa ma na nja ndima kasi pinyodha tso nga ra nǎ d’e.

18. Nja kʉ ná chembø ká ngba lo b’o?

¹⁸ Nja kʉ ná chembø kʉ na ná ngab’odha kʉ Yova jingʉe nrŭ dho anziro ná ngab’odha, føri kʉ le di theinga dho dz’ djó. (Mhu. 3:11) Kpa dz’ djonga ndima ka si ngʉ paradiso nari b’o. Kpa b’o bbo hamu na nari kʉ ndima kasi dza chi, ndima kasi bblo kʉ ná í thɨ, ndirigoti ndima kasi ndima dhi nzø ngu kaka ná afya na. (Isa. 65:21-23) Kpa ri b’o ndima kasi bbi dz’ djolú ma​—bbobbo ngøtsi djolú ma, gogo lú ma, dda djolú ma​—ndirigoti ndima kasi lochu bbo Yova no ná ritsi djo. Føri djolú pli, bbo adi hwè bbʉ kpa dho nari kʉ kpa churi ndima kana nga sie chøchø Yova na.

19. Ukumbusho dhi saa na ká nja le ddiro ka ndi nji ngba lo, ndirigoti i cho dhi Ukumbusho kasi da ngba dyi?

¹⁹ Yova bbʉ bblo kʉ ná ngab’odha ndidzá njí dhi kpa krʉ dho. (Yer. 29:11) Ukumbusho adi rili ko krʉ bbʉ madha Mungu ma dho, Yesu ma na kpa nji ko dho ná fø lodho ndiro ko kasi choro nŭnŭ di ná shinga hwè nji d’e. Ukumbusho kʉ bbo na mana kʉ ná njudha bbʉbbʉ kʉ ná Wakristo dho krʉ cho ro. Ri si da zanji dyi, Bi 3 ddo 27, 2021 nǎ b’lo dyi tsu nari goti. Bí kʉ ná ngalú nrŭ si i cho dhi Ukumbusho nji nzá kodhó nji gʉni ná ngalú, nja nrŭ si si Ukumbusho dhi ngana nimai upinzani dhi lo kʉ ro. Nja kpa si ukumbusha nji priso nǎ ro. Yova ma, Yesu ma ndirigoti Mungu dhó ra nǎ kʉ ná familia ma na adi ko njanja Ukumbusho ko nji ná saa na. Nde, koe kutaniko nǎ ma, kikundi nǎ ma inga koe ddiro ma ró, akonji Ukumbusho bblo!