1. Bi kʉ ná nrŭ ká kpakpanga nji ngbaribbai ndiro ndima njinjí bbo Mungu dzá njí kana d’e?

 NGA sini ná i saa na, ko ka konji ná njí kʉ bí. (Mt. 24:14; Lu. 10:2; 1 Pe 5:2). Ko krʉ jiri ko njínji Yova dho kothí na ro krʉ. Bí kʉ ná kpa ndima dhó njí nanga ndrindri Mungu dzá lo kana. Nja kpa ripɨ ndimae painia ma, ndima njinjí Beteli na ma, inga ndima kó Mungu dzá dza chidha dhi njí tsotso. Ndirigoti bí kʉ ná le-djoi djó tso ko nari kʉ ndimae watumishi wa huduma inga ndimae wazee. (1 Ti. 3:1, 8) Yova nanga adi jini bbo ndidzá nrŭ njínji ndi dho naridho!​—Zb. 110:3; Isa. 6:8.

2. Ko ká ka ko njiri ngba njati kiroho nǎ ko pɨ ko njí ná lo njini nzá ró?

² Ko thí ka ndi ba njedha njati ko njí Yova dzá nji kana ko pɨ ná muradi nzá ró. Inga ko ka ko rr ko che dhonalo kʉ kodhó cho ma, inga kodhó njalo ma na liri nzɨ ko nji fø lo. (Mez. 13:12) Melissa * bangʉeni fø di ná lo na. Le jingʉeri ndi njinjí Beteli na inga ndi zø masomo ya waeneza enjili wa ufalme, ro le pori: “Madho cho dangʉe fø nga djolu b’lo. Følodho kpadjo ma adi fø njí nja ddikpa nyo le nyo naribbai, nja saa na ma adi ma rr bʉ thí bʉni naribbai.”

3. Nja kpa ká njingʉeri ngba, ndiro nja njí tso kó ndima djo d’e?

³ Ni kʉ bblo kʉ ná afya na ná jadda kpadho ringani kpa dhi vi kiroho na ndiro le bbʉ nja njí kpa dho kutaniko nǎ d’e. Lorojina nja kpa ka ndimae akili na, kpa ka ndima vʉ  lonanga lelé ndirigoti kpa ka ndima jiri ndima njinjí bblo. Ro ringani kpa chulo bbo ngatsovedha djo, kpa di ndima dhó njínji bblo ndirigoti kpa di heshima bbʉ nja nrŭ dho. Njati nidhó sifa e bblo ró, ni ka niba b’o nie b’o ná pendeleo ba. Akotilo Nick dhó lo djo. Kedhó cho ngʉe 20 ná saa na, ke thí bʉngʉeni bbo ndi le lingʉe mutumishi wa huduma nzá naridho. Ke pori: “Ma ngʉ riddi ma laidjo kʉ chelo.” Ro Nick nzá d’ingʉe ji ro ri. Ke njingʉe kpakpanga lod’radha dhí njí kana ndirigoti kutaniko nǎ. I ddoro ke adi njínji ddikpa tawi nǎ komite nǎ

4. I lo nǎ ká kosi loti ngbalo djo?

⁴ Ni thí ká kiroho nǎ lo ni lie ni njí nari d’e njini nzá nari bʉ? Rie fø ró ad’ra ni nanga d’o nalo Yova dho. (Zb. 37:5-7) Ndirigoti adhunga Mungu dzá lo kana dhidhi ná le-djoi tso nidhó njí kana ni ka ni thɨ thika na lo djo, ndirigoti anji kpakpanga ni njinjí kpa bbʉ ná shauri na. Ngba ni njiri fø ró, fø pendeleo tso ka ndi kóko ni djo. Melissa dhó loroji nǎ ko chueri anziro naribbai, njaro ji niji ná njí tso nzá ka ndi kó ni djo kpadjo ri. Nde ngbaribbai ká ni ka ni b’o nidhó hwè ronga? Ndiro ko ngʉ fø lo goti ko d’e, i lo nǎ kosi i logoti ngʉ: (1) addu ká ka ndi bbʉ hwè ni dho, (2) ni ká ka niba hwè bbo ngbaribbai, ndirigoti (3) ko ká ka koli ngba muradi ko nji ndiro kodhó hwè ndrini ndri d’e.

5. Nja koe hwè na d‘e ká ringani koli ko thí ngba lo djo? (Muhubiri 6:9)

⁵ Muhubiri 6:9 na le pori naribbai. Hwè ko ka ko ba rie bblonga lu ko rine ró. (Azø.) Ddikpa le nanga di jini “nja ndi nja ná ritsi dho ró” le ka ndie hwè na ndidhó kʉ ná ritsi dho, føri ka ndie ke bani na ná hali maddi. Føri ringana, ddikpa le di nzá ka ndi bani ndidho na ná ritsi jiri ró le tsotso ro nzá ka ndi koni ri. Ro fø lo nǎ ro ká ko ka koba ngba somo? Ndiro ko ba hwe d‘e ringani koli ko thí ni kʉ kodhó ná ritsi djo ndirigoti ngba ko ka ko njí nalo djo.

6. Kpadjo ká kosi loti ngba loroji djo, ndirigoti ko kasi ngba lochu?

⁶ Ri ká ka ndi ka bbʉbbʉ ko nanga jini kodhó kʉ ná ritsi dho? O, ri ka ndi kaka. Ro ri ka ndi kaka ko nanga jini ji kodho kʉ ná ritsi dho ró. Føri ká ko ka ko nji ngbaribbai? Ko chu fø lo d’e, akotilo Matayo 25:14-30 nǎ Yesu tingʉe lo djo ná talanta dhi loroji djo. Kosi ngbaribbai ma ko ka koba hwè nari nja ndirigoti ngbaribbai ma ko nanga ka ndi jini kodhó njʉ kʉ ná hali dho nari nja.

7. Atilo Yesu bbʉngʉe ná talanta dhi loroji djo.

⁷ Fø loroji na, ddikpa ke ngʉ ripɨ ndira safari djo. Ro ke tuni nari nji, ke nzingʉe ndidhó nokpá ndirigoti ke bbʉngʉe talanta dhi mbø kpa nji na turusa d’e. * Ke bbʉngʉeri kpa kana nja ke ddiro dho kpadhó uwazo kʉ naribai. Ya kwanza kedho ke bbʉngʉe talanta tano, ddike dhona ke bbʉngʉe talanta mbili, ndirigoti ya tatu ke dhona ke bbʉngʉeri ddikpa. Aro kʉ ná nokpá njingʉe njí kpakpangana, ro ddike nzá njingʉe ddikpa njí ro maddi ndidho le bbʉngʉe ná talanta nari, ndirigoti njí dhi patro dingʉe ke di njí nǎ ro.

8. Addu ká ka ndi lieri ya kwanza nokpa e hwè na?

 ⁸ Ya kwanza nokpa bangʉe hwè bbo dhonalo kedhó patro bbʉngʉe talanta tano ke dho. Føri ngʉe bbo mbø ndirigoti ringʉ ridho kedhó patro li ndi thí li ke djó. Nde ya pili ke dhó lo ká dingʉe ngbaribbai? Fø ke thí ka ndi bae njedha dhonalo kpa nzá bangʉe talanta ddiddi ya kwanza ke ma na ri. Nde fø ke ká njingʉeri ngba?

9. Nzá Yesu d’rangʉe ya pili nokpa djo nari ká kʉ ngba lo? (Matayo 25:22, 23)

⁹ Azø Matayo 25:22, 23. Yesu nzá pongʉeri ya pili fø nokpa thí bae njedha ndi dho le bbʉngʉe talanta aro dhé naridho ri. Ndirigoti Yesu nzá pongʉe ri ro fø nokpa tsangʉe ndirigoti ndi pori: ‘Ma dho ká le bbʉ ritsi sese addudho? Ma ma ka ma njinjí ddi talanta mbʉ le bbʉ dhó ná ke bbai! Njati madzá patro nanga jini nzá ma dho ró, ma ka ma d’ø fø talanta aro d’ø dz’ na ndirigoti ma njí ma nganga dhó njí.’

10. Ya pili nokpa ká njingʉe addu ndidhó talanta na?

¹⁰ Ya kwanza nokpa bbai, ya pili nokpa ma njingʉe njí bblo pli ndi dho le bbʉ na mbø na ndirigoti ke njingʉe njí kpakpanga na ndidhó patro dho. Føri dho, ke ndringʉe talanta ki aro ndidzá patro dho. Fø nokpa dhó kpakpanga ma, kedhó njí ma na ronga lengʉeni bbo. Kedhó patro nanga nzá jingʉeni ji kpali dhé ri, ro ke dhongʉeri fø nokpa kaka le bbʉ nja njí ki ndi dho na!

11. Ko ká ka koba hwè bbo ngbaribbai?

 ¹¹ Ko ka koe hwè na Yova dzá njí kana njati ko di rinji ko thí nǎ ro krʉ ró. “Anjinjí bbo” lod’radha dhi njí kana ndirigoti anjiri ni di njínji ddinga kutaniko nǎ nrŭ na. (Mdo. 18:5; Ebr. 10:24, 25) Adi matayarisho nji bblo njudha dho ndiro ni li nja nrŭ kpakpa njudha dhi ngana d’e. Ni dho le bbʉ nisi nji njudha dhi ngana na kipindi dho anji matayarisho bblo. Njati ni dho le bbʉ ddikpa njí kutaniko nǎ ró, nzɨ di si retar ndirigoti anjiri ni dho le pori naribbai. Nzɨ di ni dho le bbʉ ná njí be pa, adi rinji bblo. Anjiri nie ufundi na bbo ni dho le bbʉ ná njí kana. (Mez. 22:29) Ni di njínji bbo Yova dho ró, ni kana kau ka ndi ngʉ kpakpa ke ma na ndirigoti ni ka nie hwè na. (Gal. 6:4) Ndirigoti ri ka ndi liri ni nanga jini ji njati nja nrŭ ba ni jie ná fø pendeleo ma ró.​—Ro. 12:15; Gal. 5:26.

12. Melissa ma, Nick ma na tsotso ká ngba lo kongʉe ndiro kpa e hwè na bbo d’e?

¹² Ni ká no Melissa dhó longa ngba paragrafu ya 2 na le tilo ndi djo ro? Le jingʉeri ndi ra njínji Beteli na inga ndi ra Masomo ya Waeneza enjili wa ufalme nji. Ro nzá mai fø lo kangʉe ro, le pori: “Ma adi upainia dzá njínji kpakpanga na ndirigoti ma adi riji ma njínji njonjo kʉ ná ufundi na lod’radha dhi njí kana. Føri adi hwè bbʉ bbo ma dho.” Nick ká singʉe ndi thí dho njedha bbʉ nalo djolu ngbaribbai mutumishi wa huduma le lingʉe ke nzá ná saa na? “Ma lingʉe ma thí ngba ka ndi ka ma dho ná pendeleo djo, føri kʉ lo led’ra nari ma, komatere le bbʉ njudha dhi ngana nari ma na. Ma jaza ngʉe fomu Beteli nǎ njí dho, føri goti kʉ ná cho na le nzingʉe ma Beteli na.”

13. Njati nidi ni dho bbʉni ná njínji bblo ró, føri ká ka ndi bbʉ ngba faida? (Muhubiri 2:24)

¹³ Ni dho le bbʉ ná njí nidi nji bblo ró, føri ká pori ni dho le si bbo pendeleo bbʉ gosi ná saa na? Ri ka ndi njini, Nick dho ri njingʉeni nari bbai. Ro ri njini fø nzá ró, Melissa bbai ni ka nie hwè na ndirigoti ni ka ni ba hwè Yova dho ni njínji nari dho. (Azø Muhubiri 2:24.) Føri djolu pli ni ka niba hwè bbo dhonalo ni nji nalo hwè Bboke Yesu Kristo dho.

14. Kodhó miradi djo ko ngaddi Yova dzá njí kana ná saa na ká ringani ko no ngba longa?

¹⁴ Njati kodi njínji bbo Yova dzá njí kana njʉ ró, føri na mana ká kʉ ko ka koli nja muradi ko nji nzá? Ri nga kʉ fø ri! Ko ka koli konji ná muradi ka ndi kó ko tsotso ko d’ralo bblo, ko ddi longa bblo nrŭ dho ndirigoti ko kó ko djoi ma ko vei ma na tsotso. Fø lo ko ka ko njí njati kodi nja nrŭ tsotso kó nyodyu na ndirigoti kiasi na ná saa, kodhó lo ko ka konja pli nari djolu.​—Mez. 11:2; Mdo. 20:35.

15. Ni tsotso ká ngbadi ná muradi ka ndi kó ndiro nie hwè na bbo d’e?

¹⁵ Ni ká ka nili ngba muradi ni njí? Anzinga Yova tso ke kó ni tsotso ndiro ni chú ni dho ka ndi ka ná muradi d’e. (Mez. 16:3; Yak. 1:5) I lo nǎ  paragrafu ya kwanza nǎ kʉ ná muradi ro ká ni ka nili ni nji nzá? Føri kʉ le ro ngʉ painia musaidizi ma, le njínji ro Beteli na ma, inga le njí ujenzi dhi nji ro. Inga ni ka ni neri nichu ø luga ro ndiro nira lod’radha dhi njí na anzi inga nira lod’ra nja ngø na eneo na d’e. Ni ka ni chulo fø muradi djo njati nizø buku Tengenezo Yenye Kufanya Mapenzi ya Yehova nǎ sura 10 ndirigoti  ni tilo nidhó kutaniko nǎ wazee na ró. * Njati nili fø muradi ni nji ró, nja nrŭ ka ndima nja ni nji ná maendeleo ndirigoti ni ka nie hwè na bbo.

16. Ni ká ka ni njiri ngba njati rie nzá nja muradi ka ndi ka ni dho ri ró?

¹⁶ Nde ri ká ka ndie ngba njati rie nzá ko ka koli b’lo djo ko tielo ná fø muradi ko nji ri ró? Aneri nili ngba ka ndi ka ni dho ná muradi ni nji. Anja ni ka ni nji ná nja lo.

17. Ddiddi 1 Timoteo 4:13, 15 ripo naribbai ddikpa le-djo ká ka ndi nji addu ndiro ndie bblo mwalimu d’e?

¹⁷ Azø 1 Timoteo 4:13, 15. Njati nie b’lo ba batiso ná le-djo ri ró, ni ka ninji kpakpanga ndiro ni ngʉ bblo hotuba bbʉ ná ke inga bblo longaddi ná ke d’e. Ká addudho? Dhonalo njati nidi ngazø bblo, nidi hotuba bbʉ bblo ndirigoti nidi longaddi bblo ró, ri ka ndi kaka ni kó lorr ná nrŭ tsotso bblo. Amburi ni li muradi ro ni nji ndiro ni zø Broshua Fanya Bidii Katika Kusoma na Kufundisha ndirigoti ni njínji ri nǎ kʉ nalo d’e. Ane ri nǎ somo nanga ddiddi ro, anji mazoezi ri nǎ lo na ndirigoti anjínji ri nǎ ro niba nalo na ni dho le bbʉ ná njí kana. Ane shauri mushauri musaidizi dhó ro ndirigoti “kpakpanga na adi njínji ndirigoti bblo adi longaddi” * ná nja wazee dhó ro. (1 Ti. 5:17) Nzɨ di njí dhé nji broshua nǎ kʉ nalo na, ro ako lorr ná nrŭ tsotso ndiro ndima  li ndima dhó udha kpakpa ndirigoti ndima njínji ri nǎ kʉ nalo na d’e. Nidi rinji fø ró nidhó udha ma, nja nrŭ dhó udha ma na ka ndi dhidhi.

18. Ko tsotso ka ngba lo ka ndi kó tengenezo nǎ ko nji ná njí kana?

¹⁸ Ko krʉ dho le bbʉ lod’radha ndirigoti longaddidha dhi njí. (Mt. 28:19, 20; Ro. 10:14) Ni ká ka ni jiri ni thɨ nidhó lo thika nzá fø bblo kʉ ná njí kana? Ali muradi ni nji ndiro nizø broshua Kufundisha ndirigoti ni njínji ri nǎ lo na d’e. Ni tsotso ka ndi kó nalo ni ka niba Buku la Mikutano​—Utumishi na Maisha ya Mukristo nǎ ndirigoti yenga ddo kana le adi dho njudha dhi ngana na video na maddi. Adi njínji niba ná nja lo na maddi. Njati ni njinjí fø lo na krʉ ró, ni ka niba hwè tengenezo nǎ ni nji nalo kana.​—2 Ti. 4:5.

19. Ko ká ka konji addu ndiro koe Wakristo dhó sifa na d’e?

¹⁹ Nzɨ vi bblo kʉ ná muradi nili ni nji nari nga dhonalo ri ka ndi bbʉ hwè Yova thí dho. (Gal. 5:22, 23; Kol. 3:12; 2 Pe. 1:5-8) Ni ká ka ni njiri ngba ndiro ni timiza fø muradi d’e? Lorojina, njaro ni riji nidhó udha ngʉ kpakpa. Ni tsotso ka ndi ko nalo ni ka niba kodhó vichapo na ndiro nidhó udha ngʉ kpakpa d’e. Ni ka niba ni tsotso ka ndi kó nalo JW Télédiffusion nǎ, ri adi kpakpa dhó udho kʉ ná le-djoi ma, le-vei ma na dhó loroji dho njonjo kʉ ná kpakpalo tso ró ndima hwini ro. Aneri nichu ngbaribbai ma ni ka ni dyø kpadhó udha maisha nǎ nari.

20. Ko ká ka koliri kodhó hwè dhidhi ngbaribbai ndirigoti nzɨ ko thi bʉni?

²⁰ Ko krʉ ka ko vʉri ko njínji Yova dho bbo kpadjo ko nji nari djolu. Paradiso nǎ ko si njinji Yova dho kaka ná ngatsi. Nzá fø ddo d’e si go ro, njati konji Yova dzá njí kpakpanga na ró, kodhó hwè ka ndi ndrini ndri ndirigoti føri ka ndi liri nzɨ ko thí bʉni. Føri djolu pli ko ka ko bbʉ madha kodhi “hwè dhi Mungu” Yova dho. (1 Ti. 1:11) Føri dzá lodho akonji hwè ko kʉ ná na pendeleo dho!