LONGANEDHA DHI RI 49
DYI 147 Nŭnŭ di ná shinga dhi tsodha
Nidhó lo ká u ni njí addu ndiro ni ba cho ró nŭnŭ di ná shinga d’e?
“Ngbà chu le Ddu nyi ndirigoti nì udha dhǒ ke djo ná ndrŭ krʉ [si] cho ró nŭnŭ di ná shinga ba.”—YOH. 6:40.
RI NǍ LO
Ngbaribbai ma ché na le d’ri ná ndrŭ ma, nja chembø ma na ka ndima ba faida Yesu Kristo bbʉngʉe ndi nari nǎ ro nari.
1. Addudho i ká bí kʉ ná ndrŭ adi riddi theinga dho le di nari nzá ka ndi ka ri?
BÍ KɄ ná ndrŭ adi ri nja nari kʉ, bblo nyo le nyo nari ma, mazoezi le nji bí ina nari ma na adi rili ledhó afya é bblo. Ro, kpa churi chu nari kʉ fø ritsi ma nzá ddi ka ndi cho le tso ngó le ngʉ nari ma, dhe le dhe nari ma na ró ri. Njaro kpa adi riddi ri nzá ka ndi ka le di cho ró nŭnŭ ri. Ro, Yesu pongʉeri nari kʉ, ri ka ndi kaka ndrŭ di “cho ró nŭnŭ nga dho,” ddiddi Yohana 3:16 ndirigoti 5:24 ri dhǒ nari bbai.
2. Yohana 6 ká po ngbá lo nŭnŭ di ná shinga djo? (Yohana 6:39, 40)
2 Ddikpa cha, Yesu ngungʉe bí kʉ ná ndrŭ ddù chulu mukati ma, bbe ma na na. a Føri ngʉe ké dho le nga ke ni ná lo, ro bbʉ-dyi ke pongʉe nari ngʉe bbo pli ka ndi kée le nanga ná lo. Fø ndrŭ kparɨ rangʉe ke ulu Kapernaumu na chøchø Galilaya nǎ dda tso ró ro, ke pongʉeri ndrŭ dho ri ka ndi kaka ndrŭ gaga ndirigoti ndrŭ di cho ró nŭnŭ nga dho. (Azø Yohana 6:39, 40.) Addinga nidhó checheni ná bbakau ma, nidhó familia nǎ ndrŭ ma na ronga ká fø lo lø ngbaribbai ma nari djo di. Yesu pongʉe ná fø lo ri dhǒ checheni ná ndrŭ krʉ si gaga ndirigoti ni ma, ji ni ji ná ndrŭ ma na krʉ si cho ró nŭnŭ di ná shinga hwè nji! Nì mai ri kʉ fø ro, Yesu pongʉe Yohana sura 6 nǎ ná fø lo nzá bí kʉ ná ndrŭ famungʉeri ndirigoti njʉ ma ri kʉ kpakpa dhé bí kʉ ná ndrŭ famu fø lo. Ke ká pongʉe ngbá lo?
3. Yohana 6:51 nǎ ká Yesu pongʉe ngbá lo?
3 Yesu ngungʉe fø bí ndrŭ ddù chulu ná føri lingʉeri kpa ddinga ndima bbui Yova ngungʉe Mana na ngødja nǎ nari djo. Yesu ngʉ loti na ná ndrŭ chugʉeri bblo nari kʉ, maandiko nzi Mana “ra nǎ ro si ná mukati.” (Zb. 105:40; Yoh. 6:31) Yesu tingʉe lo Mana djo ndi ri na ndi ddi bbo na mana kʉ ná lo nga fø ndrŭ dho d’e. Mana ngʉe ddù chulu Mungu ngʉ bbʉ ná nyo, ro ri ngʉ nyo ná ndrŭ krʉ cherieni b’lo. (Yoh. 6:49) Føri ró ro njonjo, Yesu nzingʉe ndi “ra nǎ ro si ná bbʉbbʉ mukati,” “Mungu dhó mukati” ndirigoti “shinga dhi mukati.” (Yoh. 6:32, 33, 35) Yesu dhongʉe ndima kana kʉ Mana na ná bbo pli kʉ ná njonjonga. Ke pongʉeri ɨ: “Ma kʉ shinga dhi mukati ra nǎ ro ndi si ro. Njati ddikpa le nyó i mukati ró, le si di shi theinga dho.” (Azø Yohana 6:51.) Wayahudi nzá famungʉe fø lo na mana bblo ri. Kpa nzá famungʉe Yesu pongʉe ndi kʉ ra nǎ ro si ná “mukati” ndirigoti fø mukati kʉ bblo pli kpa bbui dho Mungu ngʉ bbʉ ná Mana djolu nari ro ri. Yesu pongʉe bbo na mana kʉ ná i lo: “Ma si bbʉ ná fø mukati kʉ ma ndí.” Føri na mana ká ngʉe addu? Ko dho ringani ko famu fø lo na mana bblo dhonalo fø lo goti si ri li ko ma, ko lai ji ko ji ná ndrŭ ma na dho ri kaka ko ba cho ró nŭnŭ di ná shinga. Akonja Yesu pongʉe ná fø lo na mana ká ngʉe addu ma nari.
SHINGA DHI MUKATI NDIRIGOTI KE NDÍ
4. Nja ndrŭ nanga ká jingʉeni Yesu pongʉe ná fø lo dho nzá addudho?
4 Yesu pongʉeri ndi si ndi “ndí bbʉ dz’ djó ndrŭ dhó shinga djotsina” ná fø lo rrngʉe ná nja ndrŭ nanga kangʉeni bbo. Njaro ká kpa ngʉ riddi Yesu si ndi ndí nganga bbʉ ndima nyó? (Yoh. 6:52) Føri goti ke pongʉe nja bbo kangʉeni kpa lu ná i lo ki: “Njati ni nyó ndrŭ Ddu ndí nzá ndirigoti ni jø ke ju nzá ró, ni nǎ shinga kʉ nga.”—Yoh. 6:53.
5. Ká addudho ko ka ko uri u nari kʉ Yesu ngʉ ripo ndrŭ jø ndi ju ná føri ngangʉe ke ró ju nganga ri?
5 Noa cho na Mungu pongʉeri nzɨ ndrŭ nyo ju. (Mwa. 9:3, 4) Yova ki ngʉngʉe fø lo djolu vi Israeli dho ke bbʉngʉe ná yadha nǎ. Ddikpa ke inga le nyó ju ró, ringangʉeni ke “le hwi hwi.” (Law. 7:27, maelezo ya chini) Yesu pongʉeri Wayahudi rrnga Musa chulu Yova bbʉngʉe kpa dho ná yadha krʉ dho. (Mt. 5:17-19) Nde, Yesu pongʉeri fø Wayahudi nyó ndi ndí ndirigoti kpa jø ndi ju ná føri ngʉe nzá djo le ka le ddinga ná lo. Ro, fø loroji chulu Yesu ngʉ ji ndi ddinga kpa dho nari kʉ ngbaribbai ma ndrŭ ka ndima ba “nŭnŭ di ná shinga” nari.—Yoh. 6:54.
6. Yesu ngʉ ripo le nyó ndi ndí ndirigoti le jø ndi ju ná føri ká ko ka ko famu ngbá chu nǎ?
6 Føri na ká ke ngʉ ri ji ndi pori ngbǎ? Ke ngʉ loti ndi ró ji ró, Samaria nǎ isɨle na ndi ngʉ loti ná saa na ndi njingʉeri nari bbai: “Njati ddikpa le jø ndi dho ma si bbʉ ná dda ró, fø le ki ro dda-dyu si hwi ngbá dyi ma nzɨ, ro ma si bbʉ le dho ná dda si ngʉ ndi le nǎ cho ró nŭnŭ di ná shinga bbʉ ná dda tø ná nga.” (Yoh. 4:7, 14) b Yesu nzɨ ngʉ ri ji ndi po Samaria nǎ fø le jø nì ndrŭ adi jø ná dda dhé ri ndiro ndi ba cho ró nŭnŭ di ná shinga d’e ri. Føri bbai, ke nzɨ ngʉ ripo Kapernaumu nǎ ndi ngʉ lo ti dho ná ndrŭ nyó ndi ndí ndirigoti kpa jø ndi ju nganga ndiro kpa di theinga dho d’e ri.
ARO FØ LO KANA NJONJONGA
7. Nja ndrŭ ká adi ripo ngbǎ Yesu po Yohana 6:53 nǎ ná lo djo?
7 Bí kʉ ná dini nǎ ndrŭ adi ripo Yesu po Yohana 6:53 nǎ, le nyó ndi ndí ndirigoti le jø ndi ju ná føri na ke ngʉ dhǒ nari ngʉe, Bboke dzá Ngasdjo nga dhi Nyo dhi ngana le ka le njí ná lo dhonalo fø saa na ma ke njingʉe njí fø lo nganga na dhé. (Mt. 26:26-28) Kpa adi ripo Bboke dzá Ngasdjo nga dhi Nyo dhi ngana si ná ndrŭ krʉ ka ndima nyó mukati ndirigoti ndima jø divai. Føri ká kʉ bbʉbbʉlo? Ri kʉ bbo na mana kʉ ná lo ko ba fø logoti dhonalo krʉ cho ró dz’ djolu gble bí kʉ ná ndrŭ adi ndima tso gba ko na ndima njí fø lo d’e. Ko si njonjonga nja Yohana 6:53 nǎ Yesu pongʉe ná lo ma kana Bboke dzá Ngasdjo nga dhi Nyo dhi saa na ke pongʉe ná lo na.
8. Aro fø lo kana njonjonga ká kʉ addu? (Anja ji maddi.)
8 Akonja aro kʉ ná fø lo kana njonjonga. Ya kwanza, Yohana 6:53-56 nǎ kʉ ná fø lo ká Yesu pongʉe ngbaga ndirigoti ngbá saa na? Ke pongʉe fø lo Wayahudi dho Galilaya nǎ cho 32 na Y.G.G. Føri ngʉe chøchø cho ddi Bboke dzá Ngasdjo nga dhi Nyo ke si nji Yerusalemu nǎ nari njí. Ya pili, fø lo ká ke ngʉ po ie ma dho? Galilaya nǎ ngʉ kedhó lo rr ná ndrŭ lingʉe ndima thí le ndí ronga dhi da si da ná ritsi djo ndima dhó kiroho nǎ lo djo ndima lie ndima thí nari rɨngana. (Yoh. 6:26) Yesu tingʉe lo nzá kpa famu ná lo djo ná saa na, kpa vingʉe ke djo ndima ngʉe na ná udha vi. (Yoh. 6:14, 36, 42, 60, 64, 66) Ke una nja kpa ma bbangʉe ke ulu ndima ra nari tso bba ddi. Fø ndrŭ kana ngʉe bbò njonjonga Yesu una chi ngʉ tøni ná 11 ngʉe ná mitume na, Bboke dzá Ngasdjo nga dhi Nyo dhi ngana ndima ngʉe ddinga cho 33 na Y.G.G. Fø saa na ke una chi ngʉ tøni ná 11 ngʉe ná fø kpa ngʉe ke na nì dhé, nzá mai kpa famungʉe ke ngʉ ddi ná fø lo krʉ ro. Njonjo Galilaya nǎ ngʉe ná fø ndrŭ ró ro, Yesu una chi ngʉ tøni ná fø kpa ungʉeri u nari kʉ, Yesu kʉ Mungu dzá Ngba ra nǎ ro ndi si ro. (Mt. 16:16) Ke pongʉeri kpa dho: “Madzá nzadha kana ni i gbae ni tso ma na.” (Lu. 22:28) Fø njonjonga ri dhǒ nari kʉ, Yohana 6:53 nǎ Yesu nzɨ ngʉ lo ti Bboke dzá Ngasdjo nga dhi Nyo dhi ngana le ka le njí ná lo djo ri. Ro, aro kʉ ná fø lo kana kʉ nja kʉ ná njonjonga ki maddi.
Yohana sura ya 6 tilo Yesu pongʉe Wayahudi dho Galilaya nǎ ná lo djo (gru djó). Cho ddi goti ke tingʉe lo ndidhó 11 ngʉe ná mitume na Yerusalemu nǎ (thá djó) (Anja paragrafu 8)
FØ LO LØ NI RONGA MADDI
9. Bboke dzá Ngasdjo nga dhi Nyo dhinga na Yesu pongʉe ná lo ká lø ie ma ronga?
9 Bboke dzá Ngasdjo nga dhi Nyo dhi ngana Yesu bbʉngʉe ndidhó mitume dho nga djó thì kʉ ná mukati ndirigoti ke pongʉeri, i ri na mana kʉ ma ndí. Ndirigoti ke bbʉngʉe divai kpa tsé nanga ndima kalu ndirigoti ke pongʉeri, i ri na mana kʉ “koddo dhi ju.” (Mk. 14:22-25; Lu. 22:20; 1 Ko. 11:24) Fø koddo djo ke pongʉe ná lo ngʉe bbo na mana kʉ ná lo. Fø wø koddo ke njingʉe “[Kiroho] nǎ Israeli dhó dzá na”—ná fø kpa dhé si kʉ pinyo Yesu ma na “Mungu dhó Pidhinga na,”—fø koddo nzá ke njingʉe ndrŭ krʉ na ri. (Ebr. 8:6, 10; 9:15) Mitume nzá chungʉe ngbá lo ro maddi fø koddo djo ri, ro føri goti tse kpa d’ringʉeni ché na roho takatifu chulu ndirigoti kpa tsungʉe wø koddo na ndiro ndima si di Yesu ma na ra nǎ d’e.—Yoh. 14:2, 3.
10. Galilaya nǎ Yesu tingʉe ná lo ma kana ká kʉ ngbá njonjonga Bboke dzá Ngasdjo nga dhi Nyo dhi saa na ke tingʉe ná lo na? (Anja ji maddi.)
10 Bboke dzá Ngasdjo nga dhi Nyo dhi saa na, Yesu tingʉe ná lo løngʉe “kundi ndogo” ronga. Fø kundi ndogo tso ngangʉe nari ngʉe chi ngʉ tøni ná mitume ddinga ndima ngʉe ke ma na fø dza nǎ ro. (Lu. 12:32) Fø ngasdjo ri kʉ fø mitume dho dhé Yesu pongʉeri kpa nyó mukati ndirigoti kpa jø divai. Føri goti sie si fø kikundi na ná ndrŭ dho maddi ringaeni ndima nyó mukati ndirigoti ndima jø divai Yesu dzá dhe nga le no ná ngana. Ri kʉ kpa dhé ka ndima si kʉ di ddinga Yesu ma na ra nǎ ri. Ngasdjo nga dhi Nyo dhi saa na ke pongʉe kundi ndogo dho ná fø lo kʉ njonjo Galilaya nǎ bí ndrʉ dho ke pongʉe ná lo na. Ro, Galilaya nǎ ke pongʉe ná lo lø bí kʉ ná ndrŭ ronga.
Mukati nyo ndirigoti divai jø nari kʉ kundi ndogo nǎ ndrŭ, ngbà dhǒ udha Yesu djo ná “ke” ka ndi si cho ró nŭnŭ di ná shinga ba (Anja paragrafu 10)
11. Addu i ká ridho Galilaya nǎ Yesu pongʉe ná lo nzá løngʉe kundi ndogo ronga ri?
11 Cho 32 na Y.G.G. ke ngʉe Galilaya nǎ ro, ke tingʉe ná lo løngʉe nyo ngʉ ne ke bbʉ ndima dho ná Wayahudi ronga. Nì mai ri kʉ fø ro, ke drrngʉe kpadhó ngaddidha ndiro kpa famu bbo na mana kʉ ná lo kimwili nǎ nyo djolu. Ná føri ngʉe cho ró nŭnŭ di ná shinga ka ndi sie bbʉ kpa dho ná lo. Ndirigoti Yesu pongʉeri checheni ná ndrŭ si gaga nja ndima si di cho ró nŭnŭ d’e. Fø lo nzɨ ke ngʉ po vʉ vʉni ná kundi ndogo dho ri, ddiddi ke pongʉeri Bboke dzá Ngasdjo nga dhi Nyo dhingana nari bbai. Føri rɨngana, Galilaya nǎ ke ngʉ lo ti krʉ ndrŭ ka si ba ná ledha djo. Ke pongʉeri: “Njati ddikpa ke nyó i mukati ró, fø ke ka ndi si di theinga dho . . . Ma si bbʉ ná mukati kʉ ma ndí dz’ djó ndrŭ dhi shinga djotsina.”—Yoh. 6:51. c
12. Ko ká ka ko njiri ngbǎ ndiro ko ba cho ró nŭnŭ di ná shinga d’e?
12 Galilaya nǎ Yesu tingʉe lo djo Wayahudi dho ná ledha nga ngʉe b’lo dingʉe shi ná ndrŭ inga go si gøni ná ndrŭ dho ri. Ro, ri kʉ ‘fø mukati nyo’ ná ndrŭ ma, Yesu djo ndima dhó udha li ná ndrŭ ma na dhé si fø ledha ba ri. Wakristo ndima nzi ná bí kʉ ná ndrŭ adi riddi ndima si gødha ba “[Yesu] djó ndima li ndima dhó udha” nari chulu ndirigoti kpa nja ke ndima dhó gødha ba nari dho. (Yoh. 6:29) Ro, fø ndrŭ kana Yesu u nari bbai ngʉ njani ná ndrŭ ma bbangʉe ke bba ddi. Ká addudho?
13. Ndiro le é Yesu una bbʉbbʉ mwanafunzi d’e ká ringani le njí addu?
13 Yesu ngungʉe ná ndrŭ kpari kana bí ndrŭ jingʉeri ndima rá ke ulu dhonalo ke bbʉngʉe ndima dhó lo u ná ritsi ndima dho. Kpa nyǒ ngʉ tho nari ngʉe ddù chulu ke ndrŭ gø nari ma, nyo ke bbʉ pá nari ma, kpa ji ndima rr ná lo ke ddi nari ma na. Føro mai, Yesu dhongʉe ddikpa ke ka ndi njí ná bbo na mana kʉ ná lo nja ke é ndidhó bbʉbbʉ mwanafunzi d’e. Ke nzá singʉe dz’ djo ndi bbʉ ndrŭ dhó lo ji kimwili nǎ ná ritsi dhé ri. Kpadhó lo ungʉeri kpa si “ke dhi ngana,” ná føri na mana kʉ kpa dyø krʉ ke ddi ná lo.—Yoh. 5:40; 6:44.
14. Ri ká ngani ko njí addu ndiro ko ba faida Yesu ndí ma, ke ju ma na nǎ ro d’e?
14 Yesu pongʉeri fø ndrŭ kpari dho kpadhó lo u ndima dhǒ udha. Ká ngbá chu nǎ? Yesu ddingʉeri kpa dho nari kʉ, ndi ndí ma, ndi ró ju ma na ndi si bbʉ nari si rili ri kaka kpa si di cho ró nŭnŭ nga dho. Fø udha na mana ngʉe bbo fø Wayahudi dho ndirigoti ri na mana kʉ bbo njʉ maddi. (Yoh. 6:40) Ndiro ko ba faida Yesu ndí ma, ke ju ma na nǎ ro ddiddi Yohana 6:53 pori nari bbai d’e, ringani ko é udha na le ødha dhi be nǎ. Fø ledha ka ndi kaka bí kʉ ná ndrŭ ba ndi.—Efe. 1:7.
15-16. Yohana sura 6 ká ko tsotso kó ko ddinga ngbá faida djo?
15 Yohana sura ya 6 nǎ ko chu bbo na mana kʉ ná bí kʉ ná lo ndirigoti ko krʉ ndi li kpakpa ro. Ko chu ngbaribbai ma Yesu kongʉe ndrŭ kpari tsotso nari maddi. Galilaya nǎ ke gøngʉe ndrŭ ró dhe, ke ddingʉe lo Mungu dzá Pidhinga djo ndirigoti ke bbʉngʉe nyo ndrŭ dho kpadhó lo ungʉeri ná saa na. (Lu. 9:11; Yoh. 6:2, 11, 12) Føri djolu pli, ke ddingʉeri ndi kʉ “shinga dhi mukati.”—Yoh. 6:35, 48.
16 “Nja chembø” ke nzingʉe ná ndrŭ dho nzá ringani ndima nyó mukati ndirigoti ndima jø divai krʉ cho ró le Bboke dzá Ngasdjo nga dhi Nyo ngano ná saa na ri. (Yoh. 10:16) Nì mai ri kʉ fø ro, Yesu Kristo ndí ma, ke ró ju ma na adi faida bbʉ kpa dho maddi. Fø kpa ka ndima njiri udha ndima dhǒ le ødha dhi be nǎ nari chulu. (Yoh. 6:53) Føri ró ro njonjo, mukati nyo ndirigoti divai jø ná kpa kʉ wø koddo nǎ ndirigoti kpadhó ngab’odha kʉ ndima si pinyo Yesu ma na ra nǎ. Njati ko é ché na le d’ri ná kpa kana ma inga nja chembø kana ma ri ró, Yohana sura 6 nǎ bani ná lo na mana kʉ bbo ko krʉ dho. Føri ngaddi ko dho nari kʉ, ko krʉ dho ringani ko dhǒ kpakpa kʉ ná udha le ødha dhi be nǎ ndiro ko ba cho ró nŭnŭ di ná shinga d’e.
DYI 150 Ane Mungu ni ba gødha d’e
