1-2. Kodhó hali ká kʉ ddiddi paragrafu 1 tilo djo ná jadda ke dhó ri na ngbá chu nǎ?

 ADDINGA mali kʉ nǎ ná familia na gøni ná jadda ke djo. Njedha dhi lo kʉ, ddikpa cha kedhó gø dhi ndrŭ cheni aksida chulu. Fø lo bʉ ke thí bbo. Nì mai ri kʉ fø ro, bbo pli ka ndi bʉ ke thí ná nja lo ki ma kʉ godhé. Luti ke ra ri utso d’i nari kʉ, ndidhó gø dhi ndrŭ sae mbø nga djolu ndirigoti ndi nǎ kpa bba bbò ddeni. Kpadjo anzi riddi ke dho ndima bba é mali nari rɨngana kedhó gø dhi ndrŭ bba bbò ddeni ke nǎ ndirigoti ddeni dhi ndrŭ ndima dhó mbø kó ke tso. Fø ddeni kʉ bbo ndirigoti ri kʉ nzɨ ro bbʉni ngbá dyi maddi ke dho ná ngatsi.

² Nja chu nǎ, ko kʉ nǎ ná hali kʉ ddiddi fø jadda ke dhó ri na. Kodhi ya kwanza gø dhi ndrŭ Adamu ma, Eva ma na ngʉe kaka ná ndrŭ ndirigoti kpa ngʉ di bbo pli d’ani ná paradiso nǎ. (Mwa. 1:27; 2:7-9) Kpa ka ndima die hwè na ndirigoti theinga dho. Ro, ddikpa che pli kʉ ná lo njingʉeni. Adamu ma, Eva ma na njingʉe chenga føri lingʉeri Yova di kpa di Edeni dhi í nǎ ro ndirigoti kpa ki nzá ka ndima die shi theinga dho ri. Nde, føro ká kpa ka ndima bbáe ngbá wi ndima dhi gosi si ná nzø dho? Biblia pori: “Ddikpa ke [Adamu] chulu chenga tsungʉe dz’ djo ndirigoti chenga chulu dhe tsungʉe, ri kʉ føri bbai i dhe løngʉe ndrŭ krʉ ronga ri dhonalo krʉ kʉ ná ndrŭ njingʉe chenga.” (Ro. 5:12) Adamu bbangʉe ko dho ná wi kʉ chenga, ná føri nǎ ro dhe adi si. Ko dho ke bbarie ná chenga dhi wi kʉ ddiddi bbò ddeni na ndirigoti ri nǎ ro nzá ko kana ddikpa le ma ka ndi wø ndi ro ddi ri.​—Zb. 49:8.

 3. Kodhó chenga ká le ka le ddi “ddeni” na addudho?

³ Yesu ddingʉe chenga “ddeni” na. (Mt. 6:12; Lu. 11:4)  Njati ko njí chenga ró, føri e Yova dzá ddeni tsu ko nǎ nari bbai. Ná fø chenga kobe ri adi ngani ko bbʉbbʉ. Njati Yova kpée kodhi chenga zø ndi ka ndi njie ná chu ro nzá ró, ko ka ko die kodhi chenga kobe bbʉ dhe na ndirigoti ko ro nga ka ko ée ngab’odha na ko ki si di shi vi ri.​—Ro. 6:7, 23.

 4. (a) Nga dhi le tsotsokodha ro ká ngbá lo ka ndi bae chenga dhi ndrŭ krʉ? (Zaburi 49:7-9) (b) “Chenga” Biblia adi nzi nari ká kʉ addu? (Anja kisanduku “ Chenga.”)

⁴ Kodhó kpakpanga na nzá ri ro ka ndi kae ko bbʉ Adamu ma, Eva ma na vingʉe ná ritsi be ro ri. (Azø Zaburi 49:7-9.) Nga dhi le tsotsokodha ro, ko ro nga ka ko ée ngab’odha na ko si di shi inga ko si gaga gosi ná saa djo ri. Ko ka ko die cheni theinga dho zǎ bbai.​—Muh. 3:19; 2 Pe. 2:12.

 5. Kodhi ji dhi Baba ká kongʉe ko tsotso ngbaribbai ndiro ko bbʉ ko nǎ chenga dhi ddeni d’e? (Anja ji.)

⁵ Addinga anziro ko tielo djo ná jadda ke dhó lo djo. Njati bbo dhó mali kʉ ná ke sie ripo ndi bbʉ ke nǎ ddeni krʉ ró, ká ke ka ndi mbue ndi ngbaribbai? Bbʉbbʉ dhé, fø jadda ke ka ndi poe mbai bbo ji le nanga jini ro le bbʉ ndi dho ná fø kado dho. Føri bbai kodhi ji dhi Baba Yova bbʉngʉe ddikpa kado ndiro ndi bbʉ ko nǎ Adamu bbangʉe ná chenga dhi ddeni d’e. Yesu tungʉe fø lo nanga ɨ: “Mungu jingʉe dz’ bbo nari dho ke bbʉngʉe ndidzá ddikpa dhé kʉ ná kpetsi Ngba ndiro ngbà u ke ná le nzɨ ba sadha, ro le ba cho ró nŭnŭ di ná shinga d’e.” (Yoh. 3:16) Føri kina, fø kado adi rili ri kaka ko kana nga é chøchø Yova na.

 6. I lo nǎ ká ko si loti ngbá lo djo ndirigoti addudho?

⁶ Kodhi chenga zø adi njini chulu ná ké dho le nanga keni ná fø kado nǎ ro ká ko adi faida ba ngbaribbai? Fø ngadhudha goti kʉ Biblia njinjí na ná i lo nǎ, føri i kʉ, le kana kau ki le ngʉ nari ma, chenga le sa nari ma, chenga djó nga tso le tsi nari ma, le ødha dhi be ma, le klodha ma, le nzini chølo dhi ri nari ma na. I lo nǎ ko si loti fø lo na mana djo ddi ddiro. Njati ko di ngaddi bbo Yova njingʉe ko zø njidha dho ná fø lo djo ró, ko adi mbai po bbo ke dho.

MURADI: LE KANA KAU KI LE NGɄ NARI

 7. (a) Adamu ma, Eva ma na ká vingʉe nja addu ki? (b) Adamu ma, Eva ma na nǎ gø ko kʉ ro, ko krʉ dhó lo ká ungʉe addu? (Waroma 5:10, 11)

⁷ Cho ró nŭnŭ ndima di é nari ndima vingʉe nari kina Adamu ma, Eva ma na vingʉe ndima kana bblo pli ngʉe ná kau ndima dhi Baba Yova na. Nzá ndima d’e chenga nji ro Adamu ma, Eva ma na ngʉe  Mungu dhó familia kana. (Lu. 3:38) Kpa rrngʉe nga nzá nari dho Yova dingʉe kpa di ndidhó familia kana ro, ná føri ngʉe nzá kpa d’e nzø ro gø ro. (Mwa. 3:23, 24; 4:1) Føri dzá lo dho kpa nǎ gø ko kʉ ro ringangʉeni le gba ko tso gba Yova na. (Azø Waroma 5:10, 11.) Nja chu nǎ ri ngʉ ngani ko kana nga ki ngʉ chøchø vi ke na. Føri dzá lo dho kodhó lo ungʉe le tsotsokodha ndiro ko kana kau ngʉ bblo Yova na d’e. Ringangʉeni nzɨ ko mǎ Mungu dhó mbubai, ro ko ngʉ kedzá bbakau. Le nanga ka ndi ké ná lo kʉ, Yova i kpengʉeri ko ngʉ ndidzá bbakau. Ká ngbaribbai?

KE KPENGɄE NÁ LO: CHENGA LE SA NARI

 8. (a) Chenga le sa nari ká kʉ addu? (b) Chenga djó nga tso le tsi nari ká kʉ addu?

⁸ Chenga le sa nari kʉ, Yova kpengʉe ndiro ndima kana kau ngʉ bblo chenga dhi ndrŭ na d’e ná lo. Ke kpengʉe Adamu vingʉe ná ritsi ndi ka ndi ngʉe ná chu ddiddi na ri ró dzi kʉ ná ritsi ndi bbʉngʉe nari na. Kigiriki nǎ maandiko njinjí ddiddi na mana kʉ “chenga le sa nari” na ná lo na, fø lo kʉ chenga djó nga tso le tsi nari. (Ro. 3:25) Chenga djó nga tso le tsi nari kʉ, ndiro ndrŭ ma kana é ngoi Mungu na ndirigoti ndrŭ ngʉ kedzá bbakau d’e ke njingʉe ná lo.

 9. Yova ká njingʉeri ngbǎ ndiro Waisraeli dhó chenga zø njini d’e?

⁹ Ndiro ndima kana kau e bblo Waisraeli na d’e, Yova kpengʉe kpadhó chenga zø ndi di nji ná chu. Chenga le sa nari dhi Ddo dhi fete Waisraeli ngʉ adi nji krʉ cho ró. Fø dyi bbò kuhani ngʉ adi zǎ dhi bbʉdha bbʉ ndrŭ dhi lo dho. Bbʉbbʉ dhé, zǎ dhi bbʉdha nzá ka ndi sae ddikpa le dhó chenga ro krʉ ri dhonalo zǎ nzá le ka le ddi ndrŭ na ri. Ro, njati le leni ndima dhó chenga nǎ ro ná Waisraeli bbʉe Yova nzingʉe ndima tso ná bbʉdha ngbà ró, ke ngʉe tayari ndi njí kpadhó chenga zø. (Ebr. 10:1-4) Chenga sadha ddo dyi nǎ, Waisraeli ngʉ adi bbʉ ná bbʉdha ma, nja saa djo kpa ngʉ adi bbʉ nari ma na ngʉ adi ngano kpa dho nari kʉ, kpa kʉ chenga dhi ndrŭ ndirigoti kpadhó lo u d’i ritsi maddi ndiri i sa kpadhó chenga krʉ d’e.

10. Yova ká njingʉeri ngbǎ ndiro ndrŭ tsɨ krʉ dhó chenga sani theinga dho d’e?

¹⁰ Yova ká njingʉeri ngbǎ ndiro ri kaka ndrŭ tsɨ krʉ dhó chenga sani theinga dho d’e? Ke kpengʉeri ndi bbʉ ndidzá ddikpa bbo ndi ji ná Ngba “ddikpa ina ndiro ke d’u bí kʉ ná ndrŭ dhi chenga d’e.” (Ebr. 9:28) Yesu bbʉngʉe “ndidzá shinga le ødha dhi be bí kʉ ná ndrŭ djotsina.” (Mt. 20:28) Nde, le ødha dhi be ká kʉ addu?

KE BBɄNGɄE NÁ RITSI: LE ØDHA DHI BE

11. (a) Biblia ká pori le ødha dhi be kʉ addu? (b) Ri ká kʉ ie dhé ka ndi bbʉe le ødha dhi be ri?

¹¹ Biblia pori, le ødha dhi be kʉ, ndiro ledhó chenga sani ndirigoti le kana kau ki ngʉ vi d’e le adi bbʉ ná be. a Yova dhó nganjadha ró ro, ri le adi bbʉ ndiri na le ngʉ vivie ná ritsi d’e. Ká ngbaribbai? Anonga nari kʉ, Adamu ma, Eva ma na vingʉe ndima dhó kaka ná shinga ndirigoti cho ró nŭnŭ ndima ka ndima die ná ngab’odha. Føri dzá lo dho, ringangʉeni le bbʉ ddiddi ró dzi kʉ kpa vingʉe ná fø shinga na ná ritsi. (1 Ti. 2:6) Ri ngʉ ngani, dhidhi ná kpetsi ke bbʉ le ødha dhi be ndirigoti fø ke dho ringangʉeni ndi é (1) kaka ná ke; (2) ngbà ka ndi di cho ró nŭnŭ dz’ djó ná ke; ndirigoti (3) tayari kʉ ndi bbʉ Adamu vingʉe ná shinga bbai di na ri kodhi  lo dho ná ke. Fø lo ke njí e ró dhé kedhó shinga ka ndi ée ddiddi vi vingʉe ná shinga na.

12. Yesu dho ká ri kangʉe ka ndi bbʉ ndrŭ dhó lo ungʉe ná le ødha dhi be addudho?

¹² Akonja Yesu ka ndi bbʉe le ødha dhi be ngbà dho ná gbo kʉ ná lo di. (1) Ke ngʉe kaka ná ke ndirigoti “ke nzá njingʉe chenga ro ri.” (1 Pe. 2:22) (2) Ri ka ndi kae ka, ke di cho ró nŭnŭ dz’ djó. (3) Ke ngʉe tayari ndi dhe ndirigoti ndi bbʉ fø di ná shinga ko djotsina. (Ebr. 10:9, 10) Yesu ngʉe kaka ná kpetsi ke nari bbai, ke ngʉe ddiddi Adamu na nzá Adamu d’engʉe chenga nji ro. (1 Ko. 15:45) Føri dzá lo dho ndidzá dhe chulu, Yesu bbʉngʉe Adamu vingʉe ná shinga na kʉ ddiddi ná shinga nganga. (Ro. 5:19) Føri chulu Yesu ngʉngʉe “ya mwisho Adamu.” Føri dzá lo dho, kodhó lo nzá u kaka ná nja kpetsi ke ki ro ndi si dhe Adamu njingʉe ná chenga djotsina ri. Yesu dhengʉe “ddikpa ina theinga dho.”​—Ebr. 7:27; 10:12.

13. Chenga le sa nari ma kana njonjonga ká kʉ addu le ødha dhi be na?

¹³ Nde, chenga le sa nari ma kana njonjonga ká kʉ addu le ødha dhi be na? Chenga le sa nari kʉ, ndiro ndima kana kau ngʉ ndrŭ tsɨ na d’e Mungu njingʉe ná lo. Ro, le ødha dhi be kʉ ndrŭ tsɨ dhó chenga zø njini d’e le bbʉngʉe ná ritsi. Fø ritsi kʉ kodhi lo dho Yesu d’røngʉe ná bbo ró dzi kʉ ná ju.​—Efe. 1:7; Ebr. 9:14.

MATOKEO: YOVA KLO KO CHENGA MA, DHE MA NA NǍ RO NDIRIGOTI KE NZI KO CHØLO DHI NDRŬ

14. Kpadjo ká ko loti ngbá lo djo ndirigoti addudho?

¹⁴ Chenga le sa nari nǎ ro ká ngbá bblo matokeo adi si? Biblia njinjí bí kʉ ná lo na ndiri na ndi dhǒ ri nǎ ro si ná faida d’e. Nì mai fø lo krʉ na mana kʉ njonjo ro, ri kana nja ri ddiro ngbaribbai ma chenga sadha dho le ngʉ adi bbʉ ná ritsi klongʉe chutso ndiro Yova njí kodhó chenga zø d’e nari dhǒ. Fø lo nanga ko ne nari kana, ko si ngbaribbai ma fø lo lø ko kana nja le ddiro ronga nari nja.

15-16. (a) Biblia ridho nari bbai, “le klodha” na mana ká kʉ addu? (b) Fø lo ká lø ko ronga ngbaribbai?

¹⁵ Biblia ripo ko kloni le ødha dhi be le bbʉngʉe nari dho. Mutume Petro tu fø lo nanga ɨ: “Ni chu ngbabø kʉ ná dzi na ma ni klongʉeni ni bbui dhó ro ni bangʉe ná nga na mana kʉ ná maisha nǎ ro nari chu, ri nga ngʉe sa ka ndi sani ná ritsi, feza inga or chulu i ni klongʉeni ri. Ro, ni kloni Yesu Kristo dzá bbo ró dzi kʉ ná ju chulu, nga ró tsù ma, muchafu ma na kʉ ná chembø dzá ngbà bbai ndi kʉ ro.”​—1 Pe. 1:18, 19.

¹⁶ Le ødha dhi be chulu ko klorieni bbo adi le thí nzá ná ritsi nǎ ro, føri i kʉ dhe ma, chenga ma na. (Ro. 5:21) Bbʉbbʉ dhé, ko adi mbai po bbo Yova ma dho Yesu na, kpa klongʉe ko Yesu ró bbo na mana kʉ ná ju chulu nari dho.—1 Ko. 15:22.

17-18. (a) Chølo dhi ri le nzini nari na mana ká kʉ addu? (b) Nde, Yova ko nzi chølo dhi ri ná føri nǎ ro ká ko adi faida ba ngbaribbai?

¹⁷ Biblia pori Yova dzá njí dhi ndrŭ nzini chølo dhi ndrŭ. Føri na mana kʉ ke nzɨ adi ko nji ná chenga kobe ro kó ko tsó ri. Nì mai Yova adi rinji fø ro, ke nzɨ adi ndidhó chølo dhi yadha ro ta ri. Yova nzɨ adi ko zø chølo dhi ndrŭ ko kaka le nzi ko fø nari dho ri; ri ngae ke u kodhó chenga tso u nari dho maddi ri. Ro, Yova adi ko zø chølo dhi ndrŭ ko li kodhó udha Yesu ma na ndima bbʉngʉe ná le ødha dhi be djó nari dho.​—Ro. 3:24; Gal. 2:16.

¹⁸ Nde, Yova ko nzi chølo dhi ri ná føri  nǎ ro ká ko adi faida ba ngbaribbai? B’lo vʉni ndima si ra pinyo Yesu ma na ra na ná kpa nzini chølo dhi ndrŭ Mungu dzá nzø ndima kʉ ro. (Tit. 3:7; 1 Yo. 3:1) Ke nji kpadhó chenga zø nji. Ke adi kpa nja nzá d’erie chenga ro nji nari bbai ndirigoti ngbà ka ndima tsu ndidzá Pidhinga na nari bbai. (Ro. 8:1, 2, 30) Dz’ djó ngab’odha na kʉ ná ndrŭ maddi nzini chølo dhi ndrŭ ndirigoti Mungu dzá bbakau, kpadhi chenga zø maddi njini nji. (Yak. 2:21-23) Armagedoni lu si da ná birobiro kʉ ná ndrŭ ki ro nzɨ si kʉ cheni vi ri. (Yoh. 11:26) Che cheni ná “chølo dhi ndrŭ” ma, “nga kʉ chølo dhi ri ná ndrŭ” ma na si gaga. (Mdo. 24:15; Yoh. 5:28, 29) Føri goti, nì ngarr Yova dho dz’ djó ná ndrŭ dho “Mungu dzá nzø dhó madha dhi le klodha si che.” (Ro. 8:21) Ko adi fø di ná kau si ngʉ ko kana kodhi Baba Yova na nari b’o bbò ù na!

19. Yova ma, Yesu ma na nji ko dho ná lo ká wø kodhó maisha thika ngbaribbai? (Anja kisanduku “ Ri nǎ ro ko adi ba ná faida.”)

¹⁹ Bbʉbbʉ dhé, kodhó hali dingʉe anziro djo ko tielo ná jadda ke dhó hali bbai, krʉ kʉ ná ritsi ndi vingʉe ndirigoti bbo pli kʉ ná ddeni mangʉe ndi nǎ ro. Ro, ko adi mbai po Yova dho ke kongʉe ko tsotso nari dho. Kodhó lo thí wøngʉeni Yova kpengʉe kodhó chenga zø ka ndi njini ná chu ndirigoti Yesu bbʉngʉe le ødha dhi be nari dho. Yesu Kristo djo ko kʉ na ná udha liri ko kloni chenga ma, dhe ma na nǎ ro. Yova njí ko zø ró, ke adi ko nja nzá d’erie chenga ro nji nari bbai. Ndirigoti bbo pli na mana kʉ ná lo kʉ, njʉnga djó ro ri ka ndi kaka ko kana é bblo pli kʉ ná kau kodhi ra nǎ Baba Yova na.

20. Gosi ná lo nǎ ká ko si loti ngbá lo djo?

²⁰ Ko di ngaddi Yova ma, Yesu ma na nji ko dho ná lo djo ró, ko thí nanga adi lili hwè na. (2 Ko. 5:15) Kpa kóe ko tsotso nzá ró, ko ro nga ka ko ée ngab’odha na ri! Nde, Yova dhó le zønjidha nǎ ro ká nja le ddiro ka ndi ba faida ngbaribbai? Gosi ná lo nǎ ko si loti fø lo djo.