Mary ma, ndibbá ke John a ma na di nǎ ná ngø nǎ le ka le d’ra hwè lo-i Philippines nǎ ro adi si ná bí kʉ ná njí dhi ndrŭ dho. Coronavirus dhi saa na, Mary ngangʉe Biblia nǎ longa ndi ddi nari tso ndi di nǎ ná ngø nǎ kʉ ná ndrŭ dho ndirigoti nja ngø na kʉ ná ndrŭ dho maddi. Nde, le ká njingʉeri fø ngbaribbai?

Mary ngʉ adi ridhu longa ndi ddi dho ná ndrŭ tso, “Ni ká chu Biblia nǎ longa ji le ddi ndima dho ná nja ndrŭ ro ddi?” Njati kpa u ritso ddio ró, le ngʉ adi ripo, kpa kó ndi tsotso nja ndi tilo kpa na d’e. Bí ina, fø di ná dhʉdhʉ kʉ ná ngadhudha adi bblo kʉ ná matokeo bbʉ. Ká addudho? Dhonalo ji nanga adi jini Mungu dzá lo dho ná ndrŭ adi riji ndima d’ra ndima chu ná lo ro ndima dhó familia ma, bbakau ma na dho. Mary ngʉ adi Biblia nǎ longa ddi dho ná ndrŭ ká ngʉ adi rinji ngbǎ fø di ná nga le dhu ndima tso ná saa na?

Mary ngʉ adi Biblia nǎ longa ddi dho ná le Jasmin dhongʉe Biblia nǎ lo djo ji ndima chu lo ná nja wø ndrŭ 4. Fø ndrŭ kana, Kristine ró dho kʉ ná le nyǒ Biblia nǎ longa le ddi ndi dho nari thongʉe bbo, ná føri dho le pongʉeri le di si longa ddi ndi dho aro ina yenga ddo kana. Mary dhungʉeri Kristine tso le ká chu Biblia nǎ longa ji le ddi ndima dho ná nja ndrŭ ro ddi, le pongʉeri, Ddio “Kristine pongʉeri ndi si ndidhó bbakau dhǒ le dho.” Sese dhé yenga da ro, Kristine dhongʉe ji nanga jini ndima chu Biblia nǎ lo ná ndidzá 4 kʉ ná bbakau le dho. Luti, Kristine dhongʉe Mary ndidzá nja bbakau dho, ná fø ndrŭ kana nja ndrŭ dho nja le-vei ngangʉe Biblia nǎ longaddidha tso.

Føri kina, Kristine jingʉeri Philippines nǎ kʉ ná ndidhó familia ma chu Biblia nǎ kʉ ná lo ddi. Føri dzá lo dho, le tingʉe lo ndidzá singba ngba Andrea na. Ya kwanza, Andrea ungʉe nari kʉ ‘Yova dzá Dimu kʉ che kʉ ná dini, kpa nzá urie Yesu ri ndirigoti kpa adi njínji Agano la kale na dhé.’ Ro, ddikpa ina dhé ndi zø nga ro nari goti, le ungʉeri u nari kʉ, Yova dzá Dimu djo ndi ngʉ ddi nari ngʉe nga kʉ bbʉbbʉ ná lo. Nga ndima zø ná saa na, le ngʉ adi ripo “njati rie Biblia i fø lo po ri ró, ri kʉ bbʉbbʉlo!”

Luti, Andrea dhongʉe ndidhó aro kʉ ná bbakau ma, ndi lai njí dhi le ma na Mary dho ná fø ndrŭ maddi ngangʉe Biblia ndima jifunza nari tso. Føri kina, nzá nga Mary chu ro Andrea dzá shangazi Angela nzɨ ndi nyǒ ngʉ adi nganja ro, ngʉ adi nga Mary ma zø Andrea na nari rrrr. Ddikpa cha Angela pongʉeri Andrea d’ra ndi djó lo Mary dho ndiro Mary nga Biblia nǎ longaddidha tso ndi dho d’e. Angela nyǒ ndi chú ná lo thongʉe bbo. Bi ddikpa kana dhé le løngʉe bí kʉ ná maandiko ndi djǒ na ndirigoti le jingʉeri ndi di ngazø tho ina yenga ddi kana! Angela ngangʉe krʉ ddo ró ndi njuni videokoferase chulu nari tso Andrea dhó nga tsotsokodha chulu.

 Mary njangʉe Kristine bbá ke Joshua ngʉ adi di chøchø ndima kuso Biblia ndima jifunza ná saa na nari ro, le dhungʉe ke ká ka ndi jiri ndima nga Biblia nǎ longanedha tso nzá ma ke na nari. Joshua pongʉeri, “Ma di nidhó lo rrrr dhé, ma tso nzɨ ni dhunga njati ni dhunga ma tso ró ma rara ni kuso ro.” Miniti mbʉ ndima zø nga nari kana dhé, ke dhungʉe nga bí Kristine djolu ndirigoti ke jingʉeri ndima ra anzi Biblia nǎ longanedha na.

Mary dhó dhʉdhʉ ngʉe ná ngadhudha lingʉeri le nga Biblia nǎ longaddidha tso bí kʉ ná ndrŭ dho. Ndrŭ kana bí kʉ ná ndrŭ na Mary kpengʉeri nja le-djoi ma, le-vei ma na di nga zø. Mary ngangʉe Biblia nǎ longaddidha tso 28 kʉ ná ndrŭ dho ndirigoti njonjo 4 kʉ ná ngø lu.

Jasmin, ya kwanza djo ko tielo ná mwanafunzi bangʉe batiso 2021 na Bi 4 nǎ. Kristine bangʉe batiso 2022 na Bi 5 nǎ ndirigoti le ngʉngʉe ndidhó familia dhi ngana Philippines na. Ndirigoti Kristine dhongʉe Mary dho ná aro kʉ ná nja ndrŭ maddi bangʉe batiso. Sese dhé bi ro da nari goti Angela maddi bangʉe batiso ndirigoti njʉ le kʉ painia wa kawaida. Kristine bbá ke Joshua ma, kpadhi singba ngba Andrea ma, nja ndrŭ ma na adi maendeleo nji bblo.

Karne ya kwanza na, hwè lo-i plingʉe ndi nanga lele familia ma, bbakau ma na kalu. (Yoh. 1:41, 42a; Mdo. 10:24, 27, 48; 16:25-33) Føri dzá lo dho, adi ridhu Biblia nǎ longa ni ddi dho ná ndrŭ ma, ngbà jiri ndima chu Biblia nǎ lo ná ndrŭ ma na tso, “Ni ká chu ngbà ji ndima jifunza Biblia nǎ lo ná ndrŭ ro ddi?” Njati ni di fø di ná dhʉdhʉ kʉ ná ngadhudha dhu ró, njaro ni ma ka ni nga Biblia nǎ longaddidha tso bí kʉ ná ji nanga jini ná ndrŭ dho ddi.