Katonda yatuwa eddembe ly’okwesalirawo; teyatutonda nga yatuteekerateekera dda bye tulina okukola. Weetegereze Bayibuli ky’egamba.

•   Katonda yatonda abantu mu kifaananyi kye. (Olubereberye 1:26) Okwawukana ku nsolo ezikolera ku magezi agaazitonderwamu, ffe abantu tufaanana Omutonzi kuba tusobola okwoleka engeri gamba ng’okwagala n’obwenkanya. Era okufaananako Omutonzi waffe tulina eddembe ly’okwesalirawo.

•   Bye tusalawo birina akakwate n’ebiseera byaffe eby’omu maaso. Bayibuli etukubiriza ‘okweroboza obulamu nga tuwuliriza eddoboozi lya Katonda,’ kwe kugamba, nga tugondera ebiragiro bye. (Ekyamateeka 30:19, 20) Ebigambo ebyo tebyandibadde na makulu singa tetwalina ddembe lya kwesalirawo. Mu kifo ky’okutukaka okukola by’ayagala, Katonda atugamba nti: “Kale singa ossaayo omwoyo eri ebiragiro byange! Emirembe gyo gijja kuba ng’omugga.”—Isaaya 48:18.

•   Okulemererwa oba okutuuka ku buwanguzi okusingira ddala kyesigamye ku ffe. Bwe tuba twagala okutuuka ku buwanguzi tulina okukola ennyo. Bayibuli egamba nti: “Buli kintu omukono gwo kye gufuna okukola, okikolanga n’amaanyi go gonna.”(Omubuulizi 9:10) Era egamba nti: “Enteekateeka z’abanyiikivu zivaamu ebirungi.”—Engero 21:5.

 Eddembe ly’okwesalirawo kirabo okuva eri Katonda, kubanga kitusobozesa okumwagala ‘n’omutima gwaffe gwonna.’—Matayo 22:37.

 Bayibuli egamba nti Katonda ye Muyinza w’Ebintu Byonna, era amaanyi ge tegaliiko kkomo. (Yobu 37:23; Isaaya 40:26) Kyokka, takozesa maanyi ge kusalawo buli kimu ekibaawo. Ng’ekyokulabirako, Bayibuli egamba nti Katonda ‘yeefuga’ eri Babulooni eky’edda, omulabe w’abantu be. (Isaaya 42:14) Mu ngeri y’emu, ne mu kiseera kino agumiikiriza abo abakozesa obubi eddembe lyabwe ery’okwesalirawo ne batuusa akabi ku balala. Naye Katonda tajja kubagumiikiriza bbanga lyonna.—Zabbuli 37:10, 11.