Yesu Mulamu
OLUGERO 102
Yesu Mulamu
OMUKAZI oyo n’abasajja abo ababiri obamanyi? Omukazi ye Malyamu Magudaleene, mukwano gwa Yesu. Ate abasajja abali mu byambalo ebyeru bamalayika. Ekisenge kino ekitono Malyamu ky’atunuddemu kye kifo omulambo gwa Yesu gye gwateekebwa bwe yafa. Kiyitibwa ntaana. Naye kati omulambo gwe teguliimu! Ani yagututte? Ka tulabe.
Oluvannyuma lwa Yesu okufa, bakabona bagamba Piraato: ‘Yesu ng’akyali mulamu yagamba nti ajja kuzuukizibwa oluvannyuma lw’ennaku ssatu. N’olwekyo lagira entaana ye ekuumibwe. Awo abayigirizwa be tebajja kubba mulambo gwe bagambe nti azuukiziddwa okuva mu bafu!’ Piraato agamba bakabona okusindika abaserikale okukuuma entaana.
Naye ku makya nnyo ku lunaku olw’okusatu nga Yesu amaze okufa malayika wa Yakuwa ajja. Aggyawo ejjinja ku ntaana. Abaserikale batya nnyo ne batayinza na kuva mu kifo. Oluvannyuma bwe bagenda okutunula mu ntaana, ng’omulambo teguliimu! Abamu ku baserikale bagenda mu kibuga ne bategeeza bakabona. Omanyi bakabona ababi kye bakola? Bawa abaserikale ssente boogere eby’obulimba. ‘Mugambe nti abayigirizwa be bazze ekiro, nga mwebase, ne babba omulambo,’ bwe batyo bakabona bwe bagamba abaserikale.
Mu kiseera ekyo, abakazi abamu mikwano gya Yesu bajja ku ntaana. Nga beewuunya nnyo bwe basanga ng’entaana nkalu! Amangu ago bamalayika babiri abali mu byambalo ebimasamasa balabika. ‘Lwaki Yesu mumunoonyeza wano?’ bwe batyo bwe babuuza. ‘Azuukiziddwa. Mugende mangu mutegeeze abayigirizwa be.’ Nga abakazi badduka embiro za maanyi! Naye omusajja abayimiriza mu kkubo. Omumanyi? Ye Yesu! ‘Mugende mutegeeze abayigirizwa bange,’ bw’atyo bw’abagamba.
Abakazi bwe bategeeza abayigirizwa nti Yesu mulamu era nti bamulabyeko, abayigirizwa kibazibuwalira okukkiriza. Peetero ne Yokaana badduka ne bagenda ku ntaana beerabireko n’amaaso gaabwe, naye basanga n’gentaana nkalu! Peetero ne Yokaana bwe bavaawo, Malyamu Magudaleene asigalawo. Awo w’atunuulira munda n’alaba bamalayika babiri.
Omanyi ekyatuuka ku mulambo gwa Yesu? Katonda yagubuzaawo. Katonda teyazuukiza Yesu mu mubiri gwe yafiiramu. Yawa Yesu omubiri omuppya ogw’omwoyo, ng’ogwa bamalayika ab’omu ggulu. Naye okulaga abayigirizwa be nti mulamu, Yesu ayambala omubiri abantu gwe basobola okulaba, nga bwe tujja okuyiga.
Matayo 27:62-66; 28:1-15; Lukka 24:1-12; Yokaana 20:1-12.
Era Oyinza Okwagala Okusoma Ebitundu Bino
YESU—EKKUBO, AMAZIMA, N’OBULAMU
Yesu Alabikira Bangi ng’Amaze Okuzuukizibwa
Yesu akakasa atya abayigirizwa be nti azuukiziddwa?
OMUNAALA GW'OMUKUUMI
Onooganyulwa Otya mu Kufa kwa Yesu n’Okuzuukira Kwe?
Ensonga mukaaga okuva mu Bayibuli eziraga nti okuyitira mu kufa kw’omuntu omu abantu bangi basobola okufuna obulamu obutaggwaawo.
