’Ba Gibeonia Ondua Ru ’Diyi
A’DIKO 48
’Ba Gibeonia Ondua Ru ’Diyi
AKU ambo ambo kakau kanania ’diyi otuki eyi a’di ’dizu ’ba Israelini ’diyi pie. Eyi ega kini eyi eco a’di nde ra ’dini. Te ’ba aku ambo ogogo Gibeonia ’diyi ma alia ’diyi egani eyi nga nde ra ’dini ku. Eyi a’i kini Munguni ’ba Israelini ’diyi ma azako ni ri ra, leki ni a’di ’dizu Mungu be ku. Mi ni ’ba Gibeonia ’diyi ’ye a’du afa ni’ari ra ya?
Eyi nga eyi ’ba ekile eyi o’a angu re ’daleni ma alea ni le. Eyi nga bongo oyoloko su i azini enyiriko deza ’diyi su i. Odro ki Akanya eyini ’diyi ma dria gunia iriko ru ’diyi azini o’duki mugati a’wiru ’diyi pie. Nga di mu Yosua vu ’yozu kini: ‘Ama enga angu izi rua, adusiku ama eri e’yo Mungu emini okpobe, Yehova ma dria. Ama eri afa dria erini ’yele emi ni Misiria ri ra. Ani ’ba ama dri cepi ’diyi nga ’yo amani kini ama ma otu nyaka amani muzu acia beni, azini kini ama ma ’yo emini: “Ama emi ati’bo ni. Emi ma a’i kini emi ngani a’di ’dizu ama be ku.” Emi eco ndre ra ama bongo de ’bo amani aciria geri izu ’diri ma alia ri si azini ama mugati eca a’wiru azini deza ru.’
Yosua pi ’ba dricere ru ’diyi pie a’i e’yo ’ba Gibeonia ’diyi ni ’yo ’di ra. Eyi nga a’i kini eyi cani a’di ’dizu eyi pie ku. Te o’du na vutia nga isu oni kini ’ba Gibeoni ni ’diyi eyi o’a enyia ogogo.
‘Emi ’yo ama ni kini emi enga angu ziria a’du e’yo si ya?’ Yosua nga yi zi.
’Ba Gibeonia ’diyi nga omvi: ‘Ama ’ye ’dini a’dusiku ama eri kini emi ma Mungu Yehova fe emi dri angu Kanania ’diri dria ’bo. Ama ovu ani orisi emi ka ama odizu ku risi.’ Te ba Israelini nga eyi ma oyo soza ’diri ta mba ra, awini ba Gibeonia ’diyi o’di ku. Te nga eyi o’ba eyi ma ati’ba ru.
Opi Yerusalemua ri ovu a’okosi a’dusiku ’ba Gibeoni ni ’diyi ni ti icizu ’ba Israelini be risi. Nga ’yo opi azi su ’diyi ni kini: ‘Emi emu ma aza ko ’ba Gibeonia ’diyi be a’di ’dizu.’ ’Diri afa opi towi ’diyi ni ’ye ri. ’Ba Gibeonia ’diyi onduaru asianzu edezu ’ba Israelini ’diyi pie, fezu opi ’diyi ni eyi trazu a’di ’dizu eyi be ku ya? Ama nga ndre ra.
