Munguni Iburahimu Ma A’ita O’bizuri
A’DIKO 14
Munguni Iburahimu Ma A’ita O’bizuri
MI ECO Iburahimu ni ’dia a’du ’ye’a ri ne ra ya? Erima dria ili ci, e’da ekile eri mu ima mvi ni ’di nile. Eri te afa ’dinile ri ’ye a’du e’yo si ya? Okorisi, le ama ma oniki nga Iburahimu pi isuki ndra eyi ma mva Sara be ri ngoni ngoni’a ri raka.
Mi eco ega ra kini Mungu so ndra oyo kini eyi nga mva isu ra. Te e’da ndra econi ’i ’ye ku ’dini le, Iburahimu pini ndra ovuzu Sara be dezaru risi. Te Iburahimu a’i ndra ra ada Mungu eco afa e’dapi nga ’i ’ye ku dinile ri ’ye ra. A’du ’ye di ndra ’i ni?
Munguni ima oyo ’di sozu ’bori ma vutia, eli aga alu. Iburahimuni di ovuzu elibe 100 azini Sara ni ovuzu elibe 90 ria, isuki di ndra agupiamva omvele Isaka ’i ri. Mungu mba ndra oyo soza ini ma ta ra!
Te Isaka ni zozu ’bo ri ma vutia, Yehova o’bi ndra Iburahimu ma a’ita. Omve ndra eri: ‘Iburahimu!’ Iburahimu omvi eri tia: ‘Ma ’do!’ Mungu nga di ’yo eri ma tia: ‘Mi ’du mi mvi, elipiliru, Isaka ’i, mi mu oni mani nga e’da mini ri ma dria. Mika ca ’dale ’bo, mi ’di mi mva ’di edeta ru ma ni.’
E’yo ’di fe ndra Iburahimu ni candi tu, erini ndra ima mvini lezu tu risi. Mi eco vini egara kini Mungu so ndra oyo kini Iburahimu ma anzipika yi nga o’a Kanania. Te Isaka ka di ndra dra te, ’di eco ndra ’i ’ye ngoni ngoni? Iburahimu vani ndra e’yo ’diyi dria ku, te kiriti eri Mungu ma ti ra.
Erini cazu oni ’di ma dria ’bo ria, Iburahimu nga Isaka ni ombe eri ’bazu pari edeta edezu erini ede ri ma dria. Nga di eli i’du ima mvi ni ’dizu. Sawa ’da ma alea ogogo, malaika Munguni nga eri omve: ‘Iburahimu, Iburahimu!’ Iburahimu nga omvi: ‘Ma ’do!’
‘Mi ’ye e’yo onzi, kaniku e’yo azi mva ’di ma rua ku,’ Mungu nga ’yo ra. ‘Ani di sawa ’disi ra kini mi a’ita ci, mini mi mvi elipiliru ri ogazu mani ku risi.’
Iburahimu ma a’ita Mungu ma driari ndra angiri ’doni ya! A’i ndra ra kini afa azi Munguni ndepi te ’dini ni yo, vini indi kini Yehova eco ndra Isaka ni enga ’ba draza ma eselea risi ra. Te Mungu leni dra Iburahimu ma ’di Isaka ni ada ada ku. Mungu fedi ndra erini kabilo ebizu oce zopi icizaru eri ma ageia ogogo ri ma alea, ’yo di Iburahimu ni ma ede di eri edetaru erima mvi ma paria.
