1, 2. (a) Afa fepi feta ni ovuzu orodriru ri a’duni? (b) Onzeta eri feta angiri ndeni Mungu ni fe ri i a’dusi?

FETA mini ebi isu ’diyi ma eselea, ndepi orodri si ra ri ngo i? Ovuni feta ni ovu aje ru ka, eri ovu orodriru ndo ’dini ku. Afa ’ba azi ni fe mini feta ru ri ka mini ayiko fe ra, azini ka ovu afa azi mini le idri mini ma alea ni, mi ovu ani awa’difo si.

² Afa Mungu ni fe amani ’diyi ma eselea, feta alu aga azi ’diyi orodri si woro ra. Eri feta angiri ndeni Mungu ni fe ’ba ada niri. Capita ’di ma alea, ama nga oni kini Yehova epe ima Mvi Yesu Kristo ma ti amani ecozu o’azu ’dani ’dani beni. (Mi la Matayo 20:28.) Yehova ni Yesu ma ti epezu nyakua ama onzezu ri e’da le ama saaru.

3. ’Ba eyi odra a’dusi?

³ Onzeta eri geri Yehova ni ’ba ada onzezu ezata azini dra ma alea ri i. (’Ba Efesoa ’Diyi 1:7) Le ndra ’ba ma onze ama ra a’dusi yari vazu, le ama ma oni nga oko risi e’yo ndra i ’yepi drio amvu Edeni ma alea ’dale ri raka. Tipika amani oko, Adamu azini Eva, ’ye ndra ezata. E’yo eyini eza risi, odra di te. Ama vini odra ezata amani isu engazu Adamu pivu Eva be risi.​—Mi ne E’yo O’bazaru ’Diyi 9 ri.

4. Adamu ni ndra a’di i? Afa ndra Mungu ni fe erini ’diyi a’duni?

⁴ Yehova ni Adamu ni o’bazu ria, fe erini afa azi  onyiru tu ni. Fe Adamu ni idri ezata kokoru ri. Eri ma rua azini eri ma omi ni ndra azi nga ezata kokoru. Azo econi ndra eri bi ku, econi de ku, dika econi ndra vini dra ku. Erini ndra Adamu ni o’bazu ni risi, Yehova ni di Adamu ma ata ru ni. (Luka 3:38) Yehova ri e’yo nze eri be sa dria si. Ece Adamu ni e’yo dria ini le ma ’ye ’diyi azini fe erini azi ayiko fepi saaru ’diyi ’yezaru.​—E’doza 1:28-30; 2:16, 17.

5. Biblia ni ’yozu ’ba o’ba Adamu ni Mungu ma wura si ri ma efi ngoni?

⁵ Mungu o’ba Adamu ni “i ma ngulupi ma wura vusi.” (E’doza 1:27) Fe erini adriza I ma ngulupi ni ’diyi. Alenia indi ri leta ni, ondua ni, e’yo liza kililiru ri, azini okpo ni. Fe Adamu ni driwala e’yo pezu ceni ri. Adamu ovuni ndra kompiota le ku. Mungu o’ba eri ondua ecozu pezu e’yo muke ’yezu, kaniku onzi ri ’yezu ri be. Adamu ka ndra Mungu ma ti eri ra, eri ndra o’a Paradisia ’dani ’dani.

6. Adamu avi a’duni erini Mungu ma ti gazu risi? E’yo nde ’di bi di ama indi ngoniru?

⁶ Adamu ni ndra Mungu ma ti gazu si risi, isu panga amboru ni. ’Ba li eri ma dria dra ni erini Mungu ma ti gazu risi. Eza ima agyi onyiru Yehova be ri, idri ezata koko ri, dika avi vini ima aku Paradisi ru ri. (E’doza 3:17-19) Asi ’baza azi Adamu pini Eva be yo, eyini Mungu ma ti gazu si risi. Adamu ’ye e’yo onzi ra, “e’yo onzi ndesi dra efini, e’yo ’disi dra obi ’ba dria yini dria ’yele onzirisi.” (’Ba Rumia ’Diyi 5:12) E’yo Adamu ni eza ri fe erini azini amani ecazu ati’bo ru ezata ni azini dra ni. (’Ba Rumia ’Diyi 7:14) Asi ’baza azi di amani ci ya? Ee, asi ’baza ci.

7, 8. Onzeta eri a’duni?

 ⁷ Onzeta eri a’duni? Onzeta ni tuni ovu geri ndu ndu iri si. Oko ri aje ’bani ofe ’ba truzu, kaniku afa azi ’bani bi ci ni onzezu ri i. Irizu ri aje ’bani ofe afa azi ’bani eza ni ma arioti ofezu ri i.

⁸ ’Ba azi econi ezata ambo Adamu ni ’ye, dra ejipi amani ri ofe ku. Te di Yehova nzi amani geri ecozu ama onzezu ezata ma alea azini dra ma alea ri ra. Ama ma oni di nga onzeta ni azi nga ngoniru azini ama orodri isu alenia ngoniru yari.

9. ’Ba eco ndra onzeta ’di ofe ngoniru?

⁹ ’Ba azi econi idri ezata koko Adamu ni ndra avi ’da ofe ku. Econi ku a’dusi? Amani woro ovuzu ezata be risi. (Zaburi 49:7, 8) Le ndra onzeta ’bani ofe ri ma ovu idri azi ezata koko ni. ’Di bani asisile ’bani ’yozu eri ‘ariotiru ’ba dria onzezuri.’ (1 Timoteo 2:6) Le ndra aje onzeta niri ma ovu idri Adamu ni avi ri be tro tro.

10. Yehova onze ndra ama ngoniru?

¹⁰ Yehova onze ndra di ama ngoniru? Yehova epe ima Mvi ini lele tu ri ma ti nyakua. Eri ma mvi Yesu ni eri ma o’bata oko ri i. (1 Yohana 4:9, 10) Yesu a’i ndra ima ati ni kuzu azini angu ’bua ri kuzu ra. (’Ba Filipia ’Diyi 2:7) Yehova oja Yesu ma idri engazu ’bua risi nyakua. Osi ’ba ada ovupi ezata koko ri ru.​—Luka 1:35.

11. ’Ba alu eco ovu onzeta ru ’ba dria ni ngoniru?

¹¹ Adamu, ’ba ada okori avi idri ezata kokori ’ba dria ni erini Yehova ma ti gazu risi. ’Ba azi eco ndra  fe anzi Adamu ni diyi ni odrazu ku ra ya? Ee. (Mi la ’Ba Rumia ’Diyi 5:19.) Yesu, ndra ovupi ezata koko ri fe ima idri onzeta ru. (1 ’Ba Korintoa ’Diyi 15:45) Mungu ni nga Yesu ma idri ndra ezata koko erini owi ri ayu ’ba dria onzezu ezata ndra Adamu ni eji ri ma alea risi ra.​—1 ’Ba Korintoa ’Diyi 15:21, 22

12. Yesu nya candi amboru a’dusi?

¹² Biblia ece amani e’yo candi Yesu ni nya de nga drani ku ri ngopi yari ma dria ra. ’Ba co eri geri azi onzi nisi, ’ba opa eri pati rua, dra geri ’bani drazu e’yere, azopi saaru ni si. (Yohana 19:1, 16-18, 30) Yesu nya candi amboru ’dile a’dusi? A’dusiku Satani kini ’ba azi ecopi ovupi asi ada be Mungu vu o’bita amboru ma alea ni yo. Yesu e’da di nditiri, ’ba ada okpo ako kokoru ri eco ovu asi ada be ra, ka tro ocoko angiri ni isu ra ti. Mi ega di nga ayiko fu Yehova ni Yesuni ngopi!​—E’yo O’beza 27:11; mi ne E’yo O’bazaru ’Diyi 15 ri.

13. ’Ba ofe ndra aje onzeta niri ngoniru?

¹³ ’Ba ofe aje onzeta niri ngoniru? Yesu fe idri ini ri ima Ati vu onzeta ru. Eli 33 ma mba ’ba Yahudi ru ’diyi ni omve Nisani ru ri ma o’du 14 si, Yehova ku ’ba Yesu ma ari’bo ru ’diyi ni eri ’dizu. (’Ba Ebraniani 10:10) O’du na ma vutia, Yehova enga Yesu ni dika orindi ru. ’Da ma vutia, Yesu da dri ’bua orodri ima idri ezata kokoru ri niri fezu ima Ati Yehova vu onzeta ru. (’Ba Ebraniani 9:24) ’Bani di aje ama onzezu ri ofezu ’bo risi, ama di drileba o’azu ezata kokoru, azini dra kokoru ri be.​—Mi la ’Ba Rumia ’Diyi 3:23, 24.

14, 15. Le ama ma ’ye a’du afa ni ama ezata ni ecozu ovuzu truzaru?

¹⁴ Ama orodri isu ria feta amboru ndeni Mungu ni fe ri ma alea. Ama ma ne nga ama orodri isu ani ewu ’di ma alea azini ewu drusi ri ma alea ngoniru yari.

¹⁵ Ama ezata ni ovu truzaru. E’yo muke ri ’yezu sa dria si ri ovuni ewa kokoru ku. Ama eco e’yo eza ra. Ama eco e’yo onziri ’ye ’yeta si, kaniku e’yo nzeza ma alea si. (’Ba Kolosaia ’Diyi 1:13, 14) ’Ba eco ama ezata tru ngoniru? Le ama ma ovu candi si e’yo amani eza risi, dika ama ma zi Yehova ni ama truzu asi ada si. Ama di ovu asi ’baza be kini ezata amani ’diyi ovu truzaru.​—1 Yohana 1:8, 9.

16. Le di ama ma ’ye a’duni ecozu ovuzu asisile muke ri be?

¹⁶ Ama eco ovu asisile muke ri be ra. Ama asisile ka lu amani ama eza e’yo azi ’bo, eri ama to, ama ovu asi ’baza kokoru, azini ama e’da amani orodri kokoru. Te di le ama ma ande ku. Aka matu ’ba Yehova vu ama truzu, eri nga ama eri azini tru ecekokoru ra. (’Ba Ebraniani 9:13, 14) Yehova le ama ma ece ini e’yo dria ewaru amani isu ’diyi okpo ako amani ’diyi pie. (’Ba Ebraniani 4:14-16) ’Dini, ama eco di Mungu ni inzi asianzu si ra.

17. Yesu ni drazu amasi ’bo risi, ama eco tusu coza ngo yi isu?

¹⁷ Ama ovu asi’baza idri ’dani ’dani ri isuzu ri be. “Oya e’yo onzini eri drani, te afa Munguni fele avasiri eri idri ’dani ’dani Kristo Yesu Opi amani ma alea” ri i. (’Ba Rumia ’Diyi 6:23) Yesu ni drazu amasi ’bo risi, ama eco o’a ’dani ’dani azini rua alaru be ra. (E’yo Eceza 21:3, 4) Le di ama ma ’ye a’duni ecozu tusu coza ’diyi isuzu?

18. Ama ni ngoniru Yehova le ama saaru?

¹⁸ Mi ega di nga ayiko eco ga mi asia ngopi yari, ’ba azi ka mini feta azi onyiru tu ni fe ria. Onzeta eri feta onyiru tu ri i, ani le ama ma ovu Yehova ni awa’difo angiri si erini feta nderi fezu amani risi. Yohana 3:16 ece amani “Mungu ni ’ba nyakua ’diyi lele turisi, eri fe Mvi erini tile aluri.” Yehova ni ima Mvi lele tu Yesu ni fezu amasi ri e’da kini le ama saaru. Ani vini ra Yesu le ama saaru a’dusiku eri ndra ngonde drazu ama e’yo si. (Yohana 15:13) Le feta ama onzezu ri ma fe mini nizu ra Yehova pi le mi Yesu be saaru.​—’Ba Galatia ’Diyi 2:20.

19, 20. (a) Mi eco eca Yehova ma agyiru ngoniru? (b) Mi eco e’da mi ovu awa’difo si idri Yesu ni erini owi onzeta ru risi ngoniru?

¹⁹ Mi oni di sa ’disi e’yo Mungu ma leta angiri ri ma dria ’bo. Mi eco di eca eri ma agyiru ngoniru? Eri ewaru mini ’ba azi mini ni ku ni lezu. Yohana 17:3 ’yo kini ama eco Yehova ni nizu ra. Mini e’yo oniria eri ma dria, mi ma leta erini ri ni di nga eca angiri, mi nga le eri dri ayiko fe, mi di nga eca eri ma agyi ni. Le di mi ma mu drile e’yo onizu Yehova ma dria Biblia oniza si.​—1 Yohana 5:3.

²⁰ Le mi ma o’a awa’difo si idri Yesu ni erini owi onzeta ru risi. Biblia ’yo kini ’ba ‘Mvi ni a’ipiri ovu idri ’dani ’dani ri be.’ (Yohana 3:36) A’ita ’bazu ri ma efi ngoni? Efini ama e’yo Yesu ni imba amani ri ’ba ’yeta si. (Yohana 13:15) Amani ’yozu tisi ama a’i Yesu ni ra ri cani ku. Le ama ma nga azi a’ita amani ri ma dria e’dazu ama ovu awa’difo si onzeta si. Yakobo 2:26 la ’dini: “A’ita ’yeta kokoruri ovu drazaru.”

21, 22. (a) Le ama ma emu drata Kristo niri ma e’yo Egazu eli alu alu vusi ra a’dusi? (b) Ama nga Capita 6 pi ma alea 7 be e’yo oni a’du ma dria?

 ²¹ Le mi ma ece emuzu o’du drata Kristo niri ma e’yo egazu risi ku. Ondre asizu de nga drani ku ’dasi, Yesu imba ama drata ini ri ma e’yo egazu. Ama ’diri ’ye eli alu alu vusi. Ama o’du ’di omve ‘Ondre Ta Opi Niri.’ (1 ’Ba Korintoa ’Diyi 11:20; Matayo 26:26-28) Yesu le ama ma ega e’yo ini ima idri ezata kokori fezu onzeta ru ama siri. ’Yo ’dini: ‘Emi ’ye ’diri ma e’yo egazu.’ (Mi la Luka 22:19.) Mini muzu Drata Yesu Niri ma e’yo Egazu ri ni e’da mi e’yo ega onzeta ma dria azini leta angiri Yehova pini e’da amani Yesu be ri ma dria ra.​—Mi ne E’yo O’bazaru ’Diyi 16 ri.

²² Onzeta eri feta ndepi ra mini eco isu ri i. (2 ’Ba Korintoa ’Diyi 9:14, 15) Feta onyiru ’diri nga vini orodri eji ’ba milioni milioni odrapi ’bo ’diyi ni indi. Ama nga ’dileri eco i ’ye ngoniru yari oni Capita 6 pi ma alea 7 be.