Mungu otu ndra a’bianzi Ibrahimu ni ’diyi ki ovuzu suru alu ru azini fe eyini azita eyi. Omve eyi suru “Israeli” ni azini ’ba eyi inzita adari ma dri cezu e’yo erini ri be. (Zaburi 147:19, 20) Ani ’ba suru dria ma alea ’diyi ndra di nga orodri isu Israeli vusi.—Mi la E’doza 22:18.

Mungu pe ndra anzi Israeli ni ’diyi ovuzu ’ba e’yo eti nzepi i ni ’diyi ru. Adi eyini drio ri e’da ’ba esuki orodri eyini azita Mungu ni ’diyi ma vuti obizu risi ngoni ngoni’ari ra. (Azita Amvizu 4:6) ’Dini geri anzi Israelini vusi, ’ba azi ’diyi ecoki di ndra Mungu adari ni ra.—Mi la Isaya 43:10, 12.

Sawa azini ma vutia, suru Israeli ni aviki di ndra drileba ovuzu ’ba Munguni ru ri ra, pari nia Yehova ’ba di amuti Kristiani ni. (Matayo 21:43; 23:37, 38) Sawa ’disi, suru Israeli ni ma paria, Kristiani ada ’diyi di ’Ba Yehova ma E’yo Eti Nzepi ’Diyi ru ni.—Mi la ’Yeta 15:14, 17.

Yesu otu ndra ’ba ima vuti bipi ’diyi ki muzu e’yo oluzu suru dria ni azini eyi ojazu ’ba ima vuti bipi ’diyi ru. (Matayo 10:7, 11; 24:14; 28:19, 20) Ace were azi ’di ni di ’ye i de sawa ewu asiza ni ’di ma alea. ’Diri pale oko adi ma alea, Yehova ni ’ba milioni milioni suru dria ma alea ’diyi ki ecizu tualu inzita ada ri ma alea ri. (E’yo Eceza 7:9, 10) Kristiani ada ’diyi otuki eyi tualu amuti alu ma alea okpo fezu azini azakoma fezu eyi ma eselea. Wudrikuru si okuta ndu ndu eyini ri ma alea, eyi ayiko zu eyini imbata alu Biblia ma alea ri isuzu risi.—Mi la ’Ba Ebraniani 10:24, 25.

E’dozu eli 1870 dri pie si, ’Ba were Biblia onipi ’diyi e’doki di e’yo ada Biblia ma alea ndra avipi te sawa izu ma vutia ri isu. Niki ndra ra kini Yesu otu ndra amuti Kristiani niri e’yo oluzu, ani e’doki di e’yo ba Suru ni ri olu Wudrikuru si. Eli 1931 si feki di eyi ma ngulupi ni ru ’Ba Yehova ma E’yo Eti Nzepi ’Diyi.—Mi la ’Yeta 1:8; 2:1, 4; 5:42.

Ewu turu aluzo oko ’dasi, amuti Kristiani ni angu kakau ma alea ri isuki ndra orodri amuti otuta otupi Yesu ni ’bapi eyi ma Dricere ru ri vu ra. (’Yeta 16:4, 5) ’Dini vini ewu andru ri ma alea, ’Ba Yehova ma E’yo Eti Nzepi ’Diyi ki orodri isu ’ba mbazaru Amuti Otuta Otupi ’diyi pini ri vu. Amuti ’di eri ofisi ’Ba Yehova ma E’yo Eti Nzepi ’Diyi pini suru dria ti ndundu ojapi, buku gbapi, azini afa esele ndundu Biblia onizu ri awapi ti 600 ma drilea si ri one ni. ’Dini Amuti Otuta Otupi ’di i okpo azini dri ceza fe E’yo Siza si ongulumu ndundu 100,000 ma drilea wudrikuru si ’diyi pi ni. Ongulumu alu alu ma alea, ’ba mbapi ’bo orindi si ’diyi azi nga mbazaru, kaniku azi onezu. ’Ba ’diyi kabilo Munguni ’diyi ma ageyi te leta si.—Mi la 1 Petero 5:2, 3.

’Ba Yehova ma E’yo Eti Nzepi ’Diyi ki eyi otu e’yo baru ri oluzu azini ’ba eyi ojazu Yesu ma vuti bizu. Ekile ndra ’ba ti pele ’diyi le, ama e’yo olu akua si akua si. (’Yeta 20:20) Ama vini Biblia oni ’ba e’yo adari lepi asi driasi ’diyi pie. Te ’Ba Yehova ma E’yo Eti Nzepi ’Diyi ovukini lu amuti ru a’dule ku. Ama ’ba aku alu ma alea Ata letaru ri be ri. Ama adripi azini amvupi asipi amasi ama eselea ra ’diyi. (2 ’Ba Tesalonikia ’Diyi 1:3) ’Ba Yehova ni ’diyi ni ovuzu amuti inzita fepi Mungu ni azini ’ba azi ’diyi ma aza kopi ’diyi risi, ovuki di ani aku ndepi ayiko si ni nyakua ’dia ri i.—Mi la Zaburi 33:12; ’Yeta 20:35.