Linda: Ntango nakómaki na mbula 12, mama ayebisaki ngai ete tobotamá mapasa, kasi batɛká leki na ngai ya mwasi na libota mosusu. Nazalaki komituna soki ye mpe abotamá baba lokola ngai. Tii nakómaki mokóló, nayebaki ye te.

Sally: Nayebaki te ete nazali mwana ya bato mosusu. Mama na biso azalaki kobɛta ngai mingi mpe kosala ngai makambo lokola mwana ya mosala; nakolá mawamawa mpe nazalaki lokola mwana etike, likambo mosusu ya mpasi mpenza mpo na moto oyo azali baba. Na nsima, nakutanaki na Batatoli ya Yehova mpe nakómaki koyekola Biblia. Ntango “mama” ayebaki yango, abɛtaki ngai na mokaba, atyaki fungola ya sika na porte mpe akangaki ngai na ndako. Ntango nakómaki na mbula 20, nakimaki ndako mpe Batatoli ya Yehova bazwaki ngai. Na ebandeli ya 2012, nazwaki batisimo.

 Linda: Ntango nakómaki na mbula 20, nabandaki koyekola Biblia na Batatoli ya Yehova. Na nsima, nakómaki kokende na mayangani ya etúká na Jakarta, epai bazalaki kobongola badiskur na elobeli ya bababa. Kuna, nakutanaki na bababa ebele, kati na bango Sally, Motatoli moko oyo azalaki kofanda na etúká ya Sumatra du Nord. Tokokanaki na makambo mingi, kasi nazalaki kokipe yango te.

Sally: Tokómaki baninga makasi na Linda. Ntango mosusu nazalaki komona ete bilongi na biso ekokaná, kasi nazalaki kotyela yango likebi te.

Linda: Na sanza ya mwambe na 2012, mokolo moko liboso nazwa batisimo, nayokaki mposa makasi ya komona leki na ngai oyo abungá. Nasɛngaki Yehova ete: “Nabondeli yo, salisá ngai namona leki na ngai, nalingi nayebisa ye makambo na yo.” Mwa moke na nsima, moto moko oyo ayebaki leki na ngai oyo abungá atindelaki mama mesaje. Yango nde likambo ya liboso kati na makambo ebele oyo esalisaki ngai nayeba ete Sally nde ndeko na ngai.

Sally: Ntango Linda ayebisaki ngai ete nazali leki na ye oyo abungá, nakendaki mbangu na Jakarta kokutana na ye. Ntango nazalaki kobima na libándá ya mpɛpɔ, namonaki Linda, ná papa na biso, mama, ná yaya na biso mosusu ya mwasi, bazali kozela ngai. Nazalaki kolɛnga. Toyambanaki makasi: mama akangaki ngai ntango molai koleka. Biso nyonso tolelaki. Ntango papa ná mama basɛngaki bolimbisi ndenge bapesaki ngai na libota mosusu, tolelaki mpe toyambanaki lisusu.

Linda: Lokola babɔkɔlaki biso ndenge moko te, esɛngaki tóbongola bizaleli na biso mpo tózala na boyokani. Kasi tolingani mingi mpenza.

Sally: Sikoyo ngai ná Linda tofandaka esika moko mpe tozali na lisangá moko ya elobeli ya bababa na Jakarta.

Linda: Ngai ná Sally tokabwanaki na boumeli ya mbula koleka 20. Topesaka Yehova matɔndi ndenge asalisi biso tókutana!